اول تیموتائوس 1 - کتاب مقدس به زبان لکی - گویش مرکزی

¹ اژ پولُس گه وَه حکِم نجاددهندَه ایمَه خدا ئو امیدمو مسیحْ عیسی، رسول مسیحْ عیسیَ؛

² وَه تیموتائوس، آویل حَخِم اِنوم ایمو: فیض ئو ریَمَت ئو سِلامتی اژ جونِم خداءِ باوَه ئو خداونمو مسیحْ عیسی اَر تو بو.

هُشتار اِبارَه تیَلیمَل نادُریس

³ هَرهُنَ گه وخدی مِهِستِم بِچِم اَرِه مقدونیَه جُرّیام‌‌ اَرینِت، بِمین اِنوم شیَر اَفِسُس تا فِربو بِینَ بِری گه تیَلیم جوراجور نیَن

⁴ ئو ووژونَ گَرد پاچائَل ئو تَجِرَنُامچَه‌لی گه بِن نِرِن سرگرم نَهَن، اَرِیَگه یوئنَ اِجال یَگه کار خدا گه اژ رئی ایمونَ بیَرِنِ وَر، باعث دَمَرَگَلی موئن گه ثمری نِرِن.

⁵ مصقود ایی فِربون ایمَه مِحبتَ، گه اژ دل پاک، وِژدان خو ئو ایمو رُی‌راسَ مای.

⁶ بِری اژ رئی ایی چیئِلَ اِرهاتِنَ، چِنَ ویرِ چِنَه مِفت دائِن،

⁷ ئو میا مَلِمَل شریعت بوئن، وَه‌یاآگه نِمَذانِن چَه موشِن یا اِبارَه چَه هُنَ وَه اطمینو قصَه مَهَن.

⁸ اِسگَه ایمَه مَذانیمو گه شریعت خوءَ، اَرّ کسی دُریس اَژی استفادَه بِهِیتی.

⁹ هَمیش مَذانیمو شریعت نه اَرِه آمَل صالح، بلکِم اَرِه کسَلی کَ گه قانونَ مَنِنِ ژیر پا ئو کسَلی گه کورفِربونِن، اَرِه بی‌دینَل ئو گناکارَل، ئو ناپاکَل ئو کِفِرچیَل؛ اَرِه خوینیَل باوِه‌ئودا؛ اَرِه کسَلی گه آمَ مَکُشِن،

¹⁰ اَرِه زِنهاکارَل ئو پیالی گه وَه‌گَرد هُم‌جنس ووژونَ مِئسِن؛ اَرِه تاجرَل بردَه، دِروزِنَل ئو کسَلی گه شاتی دِروءَ میَن ئو هَمیش اَرِه هر کاری گه اَرضد تیَلیم دُریس بو،

¹¹ تیَلیمی گه مِطابق انجیل پِرجِلالِ خداءِ بِمارِکَ گه سپارتیاسَ مِه.

مسیحْ عیسی هات اَرِه نجاد گناکارَل

¹² شگِر خداونمو مسیحْ عیسیَ مَهَم گه قویَت داءَ بینِم ئو مِنَ وفادار ذِناسدی ئو اَرِه خِلمت ووژ اِنتخاو کِردمی.

¹³ وَه‌یاآگه اِ قدیم کِفِرچی ئو ظالم بیم ئو زورمَ موئِت، مِنتائای ریَم بی اَرینِم، اَرِیَگه اژ بی‌ایمونی نایونیِم کِرد.

¹⁴ ئو فیض خداونمونَ گَرد ایمون ئو مِحبتی گه ها نوم مسیحْ عیسی‌اِر، چَل‌چَل رِشیا اَر سر مِن‌اِرا.

¹⁵ ایی قصَه ماو اِتِمادَ بی کِینی ئو سزاوارَ گه تمومِ‌کمال قبول بو گه مسیحْ عیسی هات اِنوم ایی دنیاءَ تا گناکارَل نجاد دِ، گه مِه اژ کُل اونَل کَلِنگتِرِم.

¹⁶ وَه ایی خاطرَ، ریَم بی اَرینِم تا مسیحْ عیسی صبِر کامل ووژ اَر مِه نِشو دِ گه اژ کُل گناکارَل کَلِنگتِرِم، تا نمونه‌ی بوئم اَرِه اونَلی گه اَژیرِ دُما اَرِه ژییاین ابدی ایمونَ مارِنیَ بی.

¹⁷ عزّت ئو جِلال تا ابدالآباد اَر اَ خداءِ یَکونَه، اَ پاتِشا زمونَه‌ل، او گه هرگِس نِمَمِری ئو کس نِمَتونی بوئینتی. آمین!

¹⁸ اِاِ کُرِم، تیموتائوس، ایی فِربونتَ مَسپارِمَ بی، مِطابق نبوّتَلی گه وِرِکار اِبارَه تو بی تاگَه وَه یاریو اَ جنگ خوءَ، بِهِین.

¹⁹ ئو بچسبَ ایمون ئو وِژدان پاک، اَرِیَگه کَشتی ایمو بِری وَه رد کِردِن ایی چیئِلَ حُیردِحَلو بیَ.

²⁰ هیمِنائوس ئو اسکندر اژ ایی دَسَه‌نَ، گه سپارتِنمَسَ شِطو تا عبرت بِگِرِن دیَر کِفِر نَهَن.