اول تِسالونیکیَل 5 - کتاب مقدس به زبان لکی - گویش مرکزیروژ گِلاهُاردِن خداون 1 اِسگَه اِبارَه وخدَل ئو زمونَل، اِاِ بِرال، اِ کار نیَ چیئی اَرِنتو بِنُیسِنِم. 2 اَرِیَگه هُمَه ووژتونَ مَذانینو گه روژ گِلاهُاردِن خداون اِجور دُزی گه اِ شوءَ مای، مَرَسی. 3 اَ موقَع گه مردِمَ موشِن: «صُئل ئو امنیت هَس»، اَسَه نابودی ناهَلمونَ ماءَ سرو، هَرهُنَ گه ژُنَ ماءَ سر ژَنی گه لَم پِرَسی، ئو نِمَتونِن اَژی بِحوانی. 4 مِنتائای هُمَه اِاِ بِرال اِنوم تیَریکی نیئینو، تاگَه اَ روژَ اِجور دُزی ناهَلمونَ‌گیرتو کِ. 5 اَرِیَگه هُمَه کُلتو آیلَل نُیر، ئو آیلَل روژینو. ایمَه هِن شو ئو تیَریکی نیئیم. 6 اِسَه باس اِجور باقی، نِئسیم، بلکِم بِمینیمَ خَوَر ئو وَه سر ووژمونا بوئیم. 7 اَرِیَگه اونَلی گه مِئسِن، اِ شوءَ مِئسِن، ئو اونَلی گه مَسَ مَهَن، اِ شو مَسَ مَهَن. 8 مِنتائای اَرِیَگه ایمَه هِن روژیم، باس وَه سر ووژمونا بوئیم، ئو ایمون ئو مِحبت اِجور زِری‌ای بوئنیم اَر وَر سینَه‌مونا ئو کِلاوخور امید نجاد بنیمِ سر. 9 اَرِیَگه خدا ایمَه اَرِه خَضو مَیِّن نَهَردیَسی، بلکِم اَرِیَگه وَه‌سونگَ خداونمو عیسی مسیح نجاد باریمَ دس. 10 گه وَه خاطر ایمَه مِرد، تاگَه چه زِنی بوئیم چه مِردی، وَه‌گَرد او زِنِه‌ی بِهِیم. 11 اِسَه تشویق یَکتِری بِهَن ئو یَکتِری بِنا بِهَن، هَرهُنَ گه دیرینو مِهِینو. پَنَل آخِر 12 اِاِ بِرال، خواهشد اَژینتونَ مِهِیم عزّت بِنِن اَر کسَلی گه اِنومتو زیَمَتَ مَکیشِن ئو اِنوم خداون رَبَرَل هُمَه‌ن ئو مِناتونَ مَهَن. 13 ئو اِنوم مِحبت، وَه خاطر کاری گه مَهَن، بی‌حد عزّت بِنِن اَرینو. وَه‌گَرد یَک اِ صُئل ئو سِلامتی زِنِه‌ی بِهَن. 14 ئو اِاِ بِرال، خواهشد اَژینتونَ مِهِیم گه کسَلی گه تَمَلِن مِنا کِینو، ئو بی‌جورَتَل تشویق کِینو، ضِیفَل یاری دِینو ئو وَه‌گَرد کُلو صبِرتو داشدوئی. 15 حُواستو بو گه هُیچ‌کس جوواو گَنی وَه گَنیا نِ، بلکِم هَر اِ دُم خوئی کِردِنَ یَکتِری ئو اَر کُل کس بوئن. 16 هَر خَوشال بوئن. 17 یِمِجو دوعا بِهَن. 18 اِ هر حالِ‌روژی شگِرگزار بوئن، اَرِیَگه یَسَ خواس خدا اِنوم مسیحْ عیسی اَرِه هُمَه. 19 آگِر روحِ خدا کورا نَهَن. 20 نبوّتَل خوار نَهَن. 21 بلکِم کُل چی اِنتحو کَن؛ سفدِسخد بچسبِنَ اَ چیئَه گه خوءَ. 22 اژ هر جور گَنی دویرا بِگِرِن. 23 اِسگَه خداءِ صُئل ئو سِلامتی ووژ هُمَه کامل تقدیس بِهِه ئو کُل روح ئو گیون ئو لارتو تا هاتِن خداونمو عیسی مسیح، بی‌عِو پایار بِمینی. 24 خدای گه هُمَه دَوَتَ مِهِه، اَمونتدارَ ئو حکماً ایی کارَ مِهِه. 25 اِاِ بِرال، دوعامون اَرِه بِهَن. 26 وَه ماچ مقدّسی سِلام برَسِنِنَ کُل بِرال. 27 اَر تک خداون قسمتونَ میَم گه ایی نُامَه اَرِه کُل بِرال بحیوَنینو. 28 فیض خداون ایمَه عیسی مسیح وَه‌گَردتو بو. |
@ 2024 Korpu Company