اول تِسالونیکیَل 4 - کتاب مقدس به زبان لکی - گویش مرکزی

زِنِه‌ی‌ای گه وَه دل خداءَ

¹ دُماخِرِ، اِاِ بِرال، ایمَه اِنوم خداون عیسی مَلالکیمَ بینتو ئو خواهشد اَژینتونَ مِهِیم، هُنَ گه اژ ایمَه‌تو گِرتا گه چطور باس زِنِه‌ی بِهِینو ئو وَه دل خدا بوئینو، هَرهُنَ گه دیرینو مِهِینو، هَر یَه ویشتِرِ ویشتِر بِهَن.

² اَرِیَگه مَذانینو چه حکمَلمونی وَه‌سونگَ خداون عیسی، داءَ هُمَه.

³ اَرِیَگه خواس خدا یَسَ گه مقدّس بوئینو: ووژتون اژ بی‌عصمتی دویر بِگِرِن.

⁴ هرکُم اژ هُمَه باس بِذانی گه چطور لار ووژ اِ پاکی ئو عزّت حفظ کِ،

⁵ نه اِ هُواوهوس شَوَت، اِجور خِرِیهودیَلی گه خدا نِمَشتاسِن.

⁶ تاگَه هُیچ‌کس اِ ایی گپَ خطا ئو دس‌دریژی اَر حخ بِرا ووژ نِهِه، اَرِیَگه خداون تقاص کُل ایی کارِلَ مَسینیا، هُنَ گه وِرِکار وِتمونَ بینتو ئو سفدِسخد هُشتارمو دا.

⁷ اَرِیَگه خدا ایمَه دَوَت کِردیَسیَ مقدّس‌بیئین نه ناپاکی.

⁸ اِسَه هرکی یَه رد بِهِه، نه اِنسو، بلکِم خدای ردَ مِهِه گه روح‌القدس ووژَ موئَشخیَ بینتو.

⁹ اِسگَه اِبارَه مِحبت بِرائی نیازی نیَ کسی چیئی اَرِنتو بِنُیسِنی، اَرِیَگه هُمَه ووژتون اژ خدا گِرتِتونَسا گه یَکتِریتو دوس داشدوئی.

¹⁰ اَرِیَگه اِراسی هُمَه، کُل بِرال اِ سِرُسَر هیال مقدونیَه دوس دیرینو. مِنتائای اِاِ بِرال، تشویقتونَ مِهِیم گه ویشتِرِ ویشتِر یَه بِهِینو.

¹¹ آواخدتو یَه بوءَ گه زِنِه‌ی آرومتونی داشدوئی، ئو سرتونِ کار ووژتو بو، ئو وَه دَسَل ووژتو کار بِهِینو، هَرهُنَ گه حکِممو کِرد اَرینتو.

¹² تاگَه اَر تک اونَلی گه اژ کلیسا هانَ دِریر، خو زِنِه‌ی بِهِینو ئو هَوَجَه‌تو نَکُوءِ کسی.

گِلاهُاردِن خداون عیسی

¹³ مِنتائای اِاِ بِرال، نِمِمو اژ ایمودارَلی گه مِردِنَ بی‌خَوَر بوئینو، ناخواد هُمِه‌یش اِجور باقی مردِم گه امید نِرِن، بنیشینونَ خُصَه هُاردِن.

¹⁴ اَرِیَگه اَرّ ایمَه ایمو دیریم گه عیسی مِرد ئو اِدوارَه زِنیا بی، اِسَه هَرِ ایی جورَ خدا ایمودارَلی گه مِردِنَ، وَه‌گَرد او اِرَمَگیردِنی.

¹⁵ اَرِیَگه وَه‌سونگَ کلوم خداون یَه موشیمَ بینتو: ایمَه گه زِنیئیم ئو تا هاتِن خداون مَمینیم اَر جا، نِمِیمون اَر قِ ایمودارَلی گه مِردِنَ.

¹⁶ اَرِیَگه خداون ووژ وَه حکمی گه وَه قارَه کَلِنگ، وَه دَنگ رِئیس فریشدَه‌ل ئو دَنگ شِپور خدا، اژ آسمونَ ماءَ هُار. ئو اول‌بار مِردیَل اِنوم مسیح، هیزَمَگِرِن.

¹⁷ اَسَه ایمَه گه زِنیئیمون ئو مَنیمَس اَر جا، وَه گَرد اُوُ اِنوم اُرَل میَرِنمو ویرِ بِلِنگ تاگَه اِ آسمو خداون بوئینیم، اَسَه ایمَه هَر هایمَ ‎گَرد خداون.

¹⁸ اِسَه وَه ایی قصه‌لَ دلگُوئی یَکتِری دَن.