اول تِسالونیکیَل 3 - کتاب مقدس به زبان لکی - گویش مرکزی

¹ دُماخِرِ اَرِیَگه دیَر طاخَتمو ناآشد، رضائَتمو دا گه اِ شیَر آتن تَنیامو بِیلِن.

² ئو ایمَه، بِرا ئو هُمکار خدا اِ کار انجیل مسیح، تیموتائوسمو کِل‌کِرد اَرِه تک هُمَه تا اِنوم ایمونتو تشویق ئو تقویتتو کِ.

³ تاگَه هُیچ‌کس وَه خاطر ایی سخدیِلَ سُسا ناو. اَرِیَگه ووژتونَ مَذانینو گه ایمَه اَرِه یَه مَیِّن بیمونَ.

⁴ اَرِیَگه وخدی وَه‌گَرد هُمَه بیمو، وِرِکار وِتمو گه میا سخدی بِکیشیم، ئو هَرهُنَ گه مَذانینو، هُنِ‌یشَ بی.

⁵ اَژونَبیَ اَرِیَگه دیَر طاختِم ناآشد، تیموتائوسِم کِل‌کِرد تاگَه اژ ایمونتو باخَوَرا بوئم، اَرِیَگه زِلَمَ مَچیا گه اَ وسوسَه‌کَرَ یانی ابلیس وَه یِه طوری وسوسَه‌تو کِردوئیتی ئو زیَمَت ایمَه یِه لا چوئی.

گزارش تیموتائوس گه دلگرمَ مِهِه

⁶ مِنتائای اِسگَه گه تیموتائوس اژ تک هُمَه هاتیَسَ اَرِه تک ایمَه، ئو خَوَر خَوش ایمون ئو مِحبت هُمَه آوِردیَسی اَرِنمو ئو گزارش داسی گه هُمَه هَر اِ خوئی هاینونِ ویر ایمَه ئو شوق دیرینو ایمَه بوئینینو هَرهُنَ گه ایمَه شوق دیریم هُمَه بوئینیم،

⁷ اَژونَسَ اِاِ بِرال، اِ کُل سخدیَل ئو عذاوَلمو اژ هُمَه وَه‌سونگَ ایمونتو، دلگرما بیمونَ.

⁸ اَرِیَگه اِسگَه زِنِه‌یَ مِهِیم، اَرّ هُمَه اِنوم خداون پایار بوئینو.

⁹ اَرِیَگه چطورَ مَتونیم، اَرِه کُل خَوشی‌ای گه ایمَه وَه خاطر هُمَه اَرتَک خدا دیریم، هُنَ گه سزاوارَ اَرِه هُمَه شگِر خدا بِهِیم؟

¹⁰ ایمَه شو ئو روژ اژ تیَه دلا دوعاءَ مِهِیم گه هُمَه اِ ویراَرویر بوئینیم ئو کمِ‌کسریتون اِ ایمو زفتِ‌رفت بِهِیم.

¹¹ اِسگَه خدا، باوَه آسمونی ایمَه، ئو خداونمو عیسی، ووژ رئی ایمَه ویرِ هُمَه واز کِ.

¹² ئو هُنَ گه مِحبت ایمَه اَر هُمَه فِرَه‌آ ماو، خداون مِحبت هُمَه اَر یَکتِری ئو اَر کُل مردِم ویشتِر ئو فِرَه‌تِرا کِ،

¹³ ئو دلَلتو قرص بِهِه تا اَسَه گه خداون ایمَه عیسی وَه‌گَرد کُل ایمودارَل ووژَ مای، اَرتَک خدا، باوَه آسمونیمو بی‌عِو ئو مقدّس بوئینو.