اول تِسالونیکیَل 2 - کتاب مقدس به زبان لکی - گویش مرکزیخِلمت پولُس اژ ایمودارَل شیَر تِسالونیکی 1 اِاِ بِرال، ووژتونَ مَذانینو هاتِن ایمَه اَرِه تک هُمَه بی‌فادَه نوئی. 2 بلکِم هُنَ گه مَذانینو وَه‌یاآگه وِر اژ یَه اِ شیَر فیلیپی عذاومو کیشی ئو گَنیونی اَر ایمَه کِرد گه باعث خجالتَ، مِنتائای ایمَه وَه یاری خدا زِلَمو کِرد گه وَه‌یاآگه سخد اَرضد ایمَه بین، انجیل خدا اِلوم بِهِیم اَر هُمَه. 3 اَرِیَگه تشویق ایمَه، اژ ناپاکی یاگَه اَژرئی‌اِرهاتِن یا تقِلا اَرِه فن دائِنتو نیَ، 4 بلکِم هَراَ جورَ گه خدا میر تایید داسی اَر ایمَه ئو انجیل سپارتیَسیَ بینمو، اِسَه ایمَه نه اَرِیَگه وَه دل مردِم بوئیم، بلکِم اَرِیَگه وَه دل خدای بوئیمو گه دلَلمو اِنتحونَ مِهِه، قصَه مِهِیم. 5 اَرِیَگه هُنَ گه هُمَه مَذانینو ئو خدا شاتَ، ایمَه هرگِس چاپلوسیمو نَهَرد ئو قصَه‌لمو اژ طَما نوئی. 6 ایمِه‌یش وَه دُم جِلال اژ جونِم مردِما نوئیمو، چه اژ جونِم هُمَه چه اژ جونِم باقی مردِم، وَه‌یاآگه اِ مقوم رسولَل مسیح ایی حَخمونَ داشد گه اَژینتو بِمو. 7 مِنتائای اِجور تایِه‌ی گه مِتیَه‌جی آیلَل ووژَسی، اِنوم هُمَه مِلوم بیمو. 8 اَخَ دوسمو داشدینو گه حاضر بیمو گه نه فَخَد انجیل برَسِنیمَ بینتو بلکِم گیون‌یشمو اَرِنتو بِیم، اَرِیَگه هُمَه فِرَه اَرِنمو عزیزا بوئینو. 9 اَرِیَگه اِاِ بِرال، هُمَه زیَمَت ئو جُور ایمَه‌تو ها ویر، گه شو ئو روژ کارمو کِرد تاگَه وخدی انجیل خدا اَرِنتو موعظَه مِهِیم، بار گِرونی اَر کول هُیچ‌کُم اَژینتو نوئیمو. 10 هُمَه شاتینو ئو خدائیش شاتَ، گه ایمَه چَنی مقدّس ئو صالح ئو بی‌عِو وَه‌گَرد هُمَه ایمودارَل رفدارمو کِرد. 11 اَرِیَگه مَذانینو، گه ایمَه چطور اِجور باوِه گه وَه‌گَرد آیلَلی رفدارَ مِهِه 12 هرکُم اژ هُمَه‌مو تشویق کِرد ئو دلگُوئیمو دا ئو اَمونَتمو دا گه طوری رفدار بِهِینو گه لائق خدای بو گه دَوَتتونَ مِهِئَه پاتِشائی ئو جِلال ووژ. 13 ئو ایمِه‌یش یِمِجو اَرِه یَه شگِر خداءَ مِهِیم، گه وخدی چینون‌ِ گِرد کلوم خدا گه اژ ایمَه‌تو شنَفت، اَوتونَ نه اِجور کلوم اِنسو بلکِم اِجور کلوم خدا قبول کِرد، گه اِراسی‌ش هَس، کلومی گه اِنوم هُمَه ایمودارَل کارَ مِهِه. 14 اَرِیَگه اِاِ بِرال، هُمَه اژ کلیسائَل خدا اِ یهودیَه گه هان اِنوم مسیحْ عیسی، سرمقشتو گِرت. اَرِیَگه هُمِه‌یش هَراَ عذاوَلتونی اژ هُم‌‌خاکَل ووژتو دی گه اُوُ اژ یهودیَلو دی، 15 اونَلی گه هم خداون عیسی ئو هم رسولَلو کِشت ئو ایمِه‌یشو تار کِرد. اونَل وَه دل خدا نیِن ئو هان اَرضد کُل بشر. 16 ئو نِمِیلِن ایمَه وَه‌گَرد یهودیَل قصَه بِهِیم تاگَه نجاد بِگِرِن. هُنَ هَر پِمونَه گنائَل ووژو نِقُ‌نِق پِرا مَهَن. مِنتائای آخِری خَضو هاتیَسَ سرو. 17 مِنتائای اِاِ بِرال، اَرِیَگه مِدتی اژ هُمَه دویر کَتیم، اَلوَت جسماً ئو نه اژ دلا، وَه شوق فِرِه‌یکا تقِلامو کِرد تا اِ ویراَرویر بوئینیمتو. 18 اَرِیَگه مِهِستمو بایم بوئینیمتو -مِه ووژِم پولُس چَن گِل هِستِم بام- مِنتائای شِطو نِئیشتی. 19 اَرِیَگه امید ئو خَوشی ئو تاج افتخار ایمَه اَرتَک خداونمو عیسی موقَع هاتِنی چیَ؟ مَر هُمَه نیئینو؟ 20 اِراسی گه هُمَه جِلال ئو خَوشی ایمِه‌ینو. |
@ 2024 Korpu Company