اول تِسالونیکیَل 1 - کتاب مقدس به زبان لکی - گویش مرکزی

¹ اژ پولُس ئو سیلاس ئو تیموتائوس وَه کلیسا شیَر تِسالونیکی گه ها نوم خداءِ باوَه ئو خداون عیسی مسیح: فیض ئو سِلامتی اَر هُمَه بو.

سرمقش بیئِن ایمودارَل تِسالونیکی

² ایمَه هَر اَرِه کُل هُمَه شگِر خداءَ مِهِیم ئو اِنوم دوعائَلمو یِمِجو ماریمتونَ ویر.

³ اَرتَک خدا ئو باوَه آسمونیمو کارتو گه اژ ایمونَ ئو زیَمَتو گه اژ مِحبتَ ئو درین‌داریتو گه اژ امید اِنوم خداونمو عیسی مسیحَ، ماریمَ ویر.

⁴ اَرِیَگه، اِاِ بِرال گه عزیزگرامی خدائینو، مَذانیم گه او اِنتخاو کِردینونَسی.

⁵ اَرِیَگه انجیل ایمَه نه فَخَد وَه قصَه بلکِم اِنوم قدِرت ئو اِنوم روح‌القدس ئو وَه اطمینو کامل رَسیَ هُمَه. هُنَ گه مَذانینو وَه خاطر هُمَه چطور اِنومتو رفدارمو کِرد.

⁶ ئو هُمَه اژ ایمَه ئو اژ خداون سرمقشتو گِرت، اَرِیَگه هُمَه اِ عذاو فِرِه‌ی، وَه اَ خَوشیَ گه اژ روح‌القدسَ مای، چینون‌ِ گِرد کلوم خدا.

⁷ هُنَ گه بینونَ سرمقشی اَرِه کُل ایمودارَل هیال مقدونیَه ئو اَخائیَه.

⁸ اَرِیَگه نه فَخَد کلوم خداون وَه‌سونگَ هُمَه اِ مقدونیَه ئو اَخائیَه پَشخا بیَ، بلکِم خَوَر ایمونتون اَر خدا رَسیَسَ کُل جا، هُنَ گه دیَر نیازی نیَ ایمَه چیئی بوشیم.

⁹ اَرِیَگه اونَل ووژو اژ یَگه چطور وَه گرمی چینونَسِ گِرد ایمَه اَرِنمونَ موشِن ئو اژ یَگه چطور بِتَلتو ناءِ لا ئو گِلتوناهُارد ویرِ خدا تاگَه خِلمت اژ خداءِ حخیخی ئو زِنی بِهِینو.

¹⁰ ئو چیَمَ‌رئی هاتِن کُر خدا اژ آسمو بوئینو، گه خدا او اژ مِردیَل زِنیا کِردی، یانی عیسی گه ایمَه اژ خَضوئی گه میا بای، نجادَ مِ.