اول پطرس 5 - کتاب مقدس به زبان لکی - گویش مرکزی

ریئَن خدا شوئونی کَن

¹ مِه گه ووژِم اژ شیخَلِم ئو شات عذاوَل مسیح بیم ئو هُم‌بیَر جِلالی گه آشگارَ ماو، پَنَ میَمَ شیخَلی گه هانِ نومتون‌اِر:

² ریئَن خدا گه ها نوم هُمِه‌اِر شوئونی کَن ئو مِتیَه‌جی بوئنی، نه وَه زور بلکِم وَه میل، [هَراَ جورَ گه خدا مِیتی]؛ ئو نه اَرِه فادَه ناحخ بلکِم وَه شوقا.

³ نه یَگه اَر کسَلی گه سپارتیانَسَ دَستو آقایی کِینو، بلکِم نمونه‌ی بوئن اَرِه اَ ریئَنَ،

⁴ تا وخدی رِئیس شوئونَل ظاهر بو، تاج جِلالی گه اژ بِن نِمَچو، بارینونَ دس.

⁵ هُمِه‌یش اِاِ جِهالَل، فِربوبَر شیخَل بوئن. کُلتو اِ رفدارتو وَه‌گَرد یَکتِری جِنِک تاواضی بِهَنِ وَر، اَرِیَگه، «خدا موسی اَر نوا کسَلی گه قُراتِن، مِنتائای فیضَ موئَشخیَ کسَلی گه فِروتنِن.»

⁶ اِسَه ووژتونِ ژیر دس زوردار خدا فِروتنا بِهَن تا اِ وخد دُریس ووژ سربِلِنگتو بِهِه.

⁷ کُل دلِ‌هولیَلتو بسپارنَ او اَرِیَگه او ها فگِرتون‌اِر.

⁸ هوشیار بوئن ئو حُواستو بو، دشمن هُمَه ابلیس اِجور شیری گه مَنِرکِنی دیری گِرد سِرَ مِ ئو مِنِی کسی مِهِه تا قویت اِرادِیتی.

⁹ اِسَه اِنوم ایمونتو پایار بِمینِن ئو بوسِن اَر نوا او، اَرِیَگه مَذانینو گه بِرالتو اِنوم دنیا هَر هُنَ عذاوَلی مَکیشِن.

¹⁰ دُما یَگه مِدت کمی عذاوتو کیشی، خداءِ کُل فیضَل گه هُمَه اِنوم مسیح دَوَت کِردیَسیَ جِلال ابدی ووژ، ووژ اِدوارَه بِناتونَ مِهِه، ئو موکَم ئو زوردار ئو پایارتونا مِهِه.

¹¹ سِلطنت تا ابد ئو تا ابد هِن او بو. آمین.

سِلامَل آخِر

¹² وَه یاری سیلاس گه مَذانِم بِرا وفاداری کَ، کُئلِ‌کوتام اَرِنتو نُیسو تا تشویقتو بِهَم ئو اِلوم کَم گه هَر یَسَ فیض حخیخی خدا. اِنوم اَوَه پایار بِمینِن.

¹³ خُیِِه‌ی گه ها شیَر بابل‌اِر گه اِجور هُمَه دیاری بیَ ئو کُرِم مَرقُس، سِلامَ مَرِسِنِن‌ئونتو.

¹⁴ وَه ماچی گه اژ دوس داشدِنَ سِلام بِهَنَ یَکتِری. صُئل‌وسِلامتی اَر کُل هُمَه بو گه هاینون اِنوم مسیح.