اول پطرس 4 - کتاب مقدس به زبان لکی - گویش مرکزیپیشکارَل فیض خدا 1 اِسَه اَرِیَگه مسیح اِنوم جسم عذاو کیشیتی، هُمِه‌یش هَرِ هُنَ فگِری ووژتو آمادَه بِهَن، اَرِیَگه هرکی اِنوم جسم عذاو کیشیَسی، دیَر کارَ گنا نِری. 2 هُنَ باقی عمِر اِنوم جسم، اَرِه اَنجوم دائِن خواس خدا زِنِه‌یَ مِهِه، نه اَرِه هُواوهوسَل بشری. 3 اَرِیَگه قدیم اَخَ گه بس بو عمِر ووژتون اَرِه اَ چیئَه گه بِت‌پِرَسَل خدانشتاس دوس دیرِن، ناتونَ ئو روژگارتونَ بی‌عصمتی، هُواوهوس، مَسی، خیزی، عِیاشی ئو بِت‌پِرَسی ننگَ‌بار، گذَرونیَ. 4 هَرهُنَ، اِسگَه گه اِنوم هُنَ خیزیَل بی‌حدِحساوُ شیَریکونا نِموئینو، بِلُجوئیونَ مای ئو دُشمینَ میَن‌ئونتو. 5 مِنتائای وَه او گه آماده‌ءَ تا اَر زِنیَل ئو مِردیَل داوری بِهِه، حساوَ میَنَ دُما. 6 وَه ایی خاطرَ، جُ‌جُ اَر اونَلی گه اِسگَه مِردِنَ خَوَر خَوشو دا، تا وَه‌یاآگه اِجور کُل آمَل اِنوم جسم داوری بین، مِنتائای اَجورَ گه خداءَ مِیتی مِطابق روح زِنِه‌ی بِهَن. 7 آخِر کُل چی نزیکَ؛ اِسَه وَه خاطر دوعائَلتو نوا ووژتو بِگِرِن ئو وَه سر ووژتونا بوئن. 8 مِهمتِر اژ کُل چی، اژ تیَه دلا یَکتِریتو دوس داشدوئی، اَرِیَگه دوس داشدِن، گنائَل فِرِه‌ی مَپوشِنی. 9 یَکتِری بی‌خُت‌خَت مِمو کَن. 10 اِجور پیشکارَل خوئی گه فیض جوراجور خدا سپارتیاس‌ئونو، هرکُمتو عطای گه گِرتیَسی اَرِه خِلمت اژ یَکتِری بیَریَ کار. 11 هر کی قصَه مِهِه، اِجور خدا قصَه بِهِه؛ ئو هرکی خِلمتَ مِهِه، وَه قویَتی گه خدا موئَشخی خِلمت بِهِه، تاگَه اِ کُل چی، خدا وَه‌سونگَ عیسی مسیح جِلال بِگِری. جِلال ئو سِلطنت اَر او تا ابد ئو تا ابد. آمین. زجِر کیشین وَه خاطر ایمون اَر مسیح 12 اِاِ عزیزَل، اژ ایی آگِرَ گه اَرِه اِنتحو کِردِنتو ها نومتون‌اِر، بِلُجوئیتو نای، گه مَری چی بِلُجوئی‌ای هاتیَس اَر سرتو. 13 بلکِم اژ یَگه شیَریک عذاوَل مسیحَ موئینو خَوشال بوئن، تا موقَع ظاهربیئِن جِلال او وَه خَوشی دودَسمالَه بِگِرینو. 14 اَرّ وَه خاطر نُم مسیح دُشمینَ میَن‌ئونتو، خَوزگالَ ووژتو، اَرِیَگه روح جِلال، روحِ خدا اَررُی هُمَه سِتارَ مَگِری. 15 مِنتائای اَرّ عذاوَ مَکیشینو، ناخواد گه وَه نُم خوینی یا دُز یا شرَبار یا جُ‌جُ فِضول بو. 16 مِنتائای اَرّ کسی وَه نُم مسیحی عذاوَ مَکیشی، خجالت نکیشی، بلکِم وَه ایی نُمَ، خدا جِلال بِ. 17 اَرِیَگه وخد اَوَه رَسیَ گه بِنیا داوری، اژ مال خدا بِنِری؛ ئو اَرّ بِنیا اَوَه اژ ایمَه مَنِری، اِسَه عاقویَت اونَلی گه اژ انجیل خدا اطاعت نِمَهَن، چَه ماو؟ 18 ئو «اَرّ آم صالح وَه سخدی نجاد بِگِری، خدانشتاسَل ئو گناکارَل چِه‌ئون اِرَمای؟» 19 اِسَه کسَلی گه وَه خواس خدا عذاوَ مَکیشِن، باس گیونَلو بسپارنَ "خالق اَمونتدار" ئو یِمِجو کارَل خو بِهَن. |
@ 2024 Korpu Company