اول پطرس 3 - کتاب مقدس به زبان لکی - گویش مرکزیژِنَل ئو میردَه‌ل 1 هَرهُنَ، هُمَه اِاِ ژِنَل، فِربوبَر میردَه‌لتو بوئن تا اَرّیش بِری اژ کلوم خدا اطاعت نِمَهَن، بی‌یَگه چیئی بوشینو، وَه خاطر رفدار ژِنَلو ایمو بارِن، 2 وخدی رفدار پاک ئو خداترستونَ موئینِن. 3 رنگینیتو اِ سیتِ‌ساو ظاهری ناو، اِجور گیسَل آچِنیا ئو طِلا ئو جوواهیر اِ قِ آوشدِن ئو کِراس اِوَر کِردِن، 4 بلکِم اِنوم اَ اِنسونی بوءَ گه ها نوم قلبتون‌اِر ئو نِماو بوئینینی، وَه رنگینی اَژبِن‌نَچیئِنی روح مِلوم ئو آرومی، گه ایی رنگینیَ اِ وَر چیَم خدا فِرَه اَرزشد دیری. 5 اَرِیَگه ژِنَل مقدّس قدیم گه امیدون اَر خدا بی، هُنَ ووژون اِرَمَرازونو. اونَل فِربوبَر میردَه‌ل ووژو بین. 6 هُنَ گه سارا فِربوبَر ابراهیم بی ئو اوءَ آقا هِنا مَهَردی. هُمِه‌یش اَرّ خوئی بِهِینو ئو اژ چیئی گه زِلَ‌تِراقتونا مِهِه زِلَتو نَچو، آیلَل اوئینو. 7 هَرهُنَ، هُمِه‌یش اِاِ میردَه‌ل، ژِنَل ووژتو بشتاسِن ئو وَه درکی گه اَژینو دیرینو زِنِه‌یَ گَردو بِهَن ئو وَه‌گَردو اِجور ظرف ظریفتِر وَه عزّتا رفدار بِهَن، اَرِیَگه وَه‌گَرد هُمَه وارثَل فیض ژییاینِن، تا چیئی نوا دوعائَلتو نَگِری. عذاو کیشین وَه خاطر صالح‌بیئین 8 آخِرسر، کُلتو هُم‌رِأ، هُم‌دل ئو بِرادوس ئو دلسوز ئو فِروتن بوئن. 9 جوواو گَنیَ گَنی ئو دُشمینَ دُشمینا نیَن، بلکِم اِجالی، بِرَکت بارِنَ دس، اَرِیَگه هَر اَرِه یَه دَوَت بینونَ تاگَه بِرَکت بوءَ نَصُیتو. 10 اَرِیَگه، «هر کی مِیتی ژییاین دوس داشدوئیتی ئو روژَل خو بوئینی باس نوا گَن وِتِن زوئو ووژ بِگِری ئو لِچَلی اژ رِنگَری بوئنی. 11 باس اژ گَنی دویرا بِگِری ئو خوئی بِهِه؛ وَه مِنِی صُئلا بو ئو بِچوتیَ تُرّا. 12 اَرِیَگه چیَمَل خداون ها اَر آمَل صالح ئو گوشَلی اَرِه دوعائَلو وازَ، مِنتائای رُی خداون ها اَرضد گَنَ‌کارَل.» 13 اَرّ اَرِه خوئی کِردِن خیرَت دیرینو، کیَ گه ضِرَد برَسِنی‌ئونتو؟ 14 مِنتائای جُ‌جُ اَرّ وَه خاطر صالح‌بیئین عذاوتو دی، بِرَکتَ مَگِرینو! «اژ چیئَلی گه اُوُ زِلِئونَ مَچو، زِلَتو نَچو ئو هولتون اِرانَگِری.» 15 بلکِم اِنوم دلتو عزّت بِنِن اَر مسیح خداون گه قدوسَ، هَر آمادَه بوئن تا هر کی دلیل امیدی گه ها دلتون‌اِر بِپِرسی، جوواوا بِینونی، مِنتائای وَه نرمی ئو عزّت. 16 وِژدانتو پاک بِیلِن تا کسَلی گه بُختِمَ میَن اَرینتو، اونَلی گه اژ رفدار خوتو اِنوم مسیح گَنَ موشِن، خجالتا بوئن. 17 اَرِیَگه اَرّ خواس خدا یَه بوءَ، بیتِرَ اَرِه کارَل خو عذاو بِکیشینو تا اَرِه کارَل گَن. 18 اَرِیَگه مسیح‌یش یِه گِل اَرِه گنائَل عذاو کیشیتی، یانی اَ آم صالحَ اَرِه آمَل ناصالح، تا باریتون اَرِه تک خدا. او اِنوم جسم کُشیا، مِنتائای اِنوم روح، زِنیا بی، 19 ئو اِنوم روح چی ئو روحَلی گه اِ زندو بین، خَوَردارا کِردی. 20 اَرِیَگه اَ روحِلَ قدیم کورفِربونیو کِرد، اَسَه گه خدا اِ زَمو نوح گه کَشتیِهَه دُریسَ موئیا، وَه صبِر چیَمَ‌رئی بی. اِنوم اَ کَشتیَ فَخَد چَن نفر، یانی هشت نفر، وَه‌سونگَ آو نجادو گِرت. 21 ایی آوَ نمونَه خُسِل تیَمیدی کَ گه هَراِسگِه‌یشَ نجادتونَ مِ، نه اَرِه شُشتِن کثیفی لار، بلکِم آواخد وِژدو پاکی کَ گه ها دارا گه خدا بوئینی ئو وَه‌سونگَ زِنیابیئِن عیسی مسیح اژ مِردیَل نجادَ مَگِری، 22 هَر او گه ویرِ آسمو چی ئو اِسگَه ها اَر دس راس خدا ئو فریشدَه‌ل ئو صائای‌قدِرتَل ئو قویَتَل فِربوبَر اوئِن. |
@ 2024 Korpu Company