اول پطرس 1 - کتاب مقدس به زبان لکی - گویش مرکزی1 اژ پطرس، رسول عیسی مسیح، وَه کسَلی گه دیاری بینَ ئو اِ پونتوس ئو غَلاطیَه ئو کاپادوکیَه ئو آسیا ئو بیطینیَه پَشخا بینَسِ خَریوی؛ 2 اونَلی گه مِطابق اَ چیئَه گه خداءِ باوَه وِرِکار مَذِناسدی، وَه‌سونگَ کار تقدیس‌کَر روحِ خدا، ئو اَرِه اطاعت اژ عیسی مسیح ئو پِشکونِن خوین او اَر اونَل، دیاری بینَ: فیض‌وسِلامتی چَل‌چَل اَر هُمَه بو. امید زِنی 3 بِمارِکَ خدا ئو باوَه خداون ایمَه عیسی مسیح گه وَه ریَمَت کَلِنگ ووژ، وَه‌سونگَ زِنیا بیئِن عیسی مسیح اژ مِردیَل تولد تازه‌ی بَشخیتیَ ایمَه، اَرِه امید زِنی‌ای 4 ئو میراتی گه اژ بِن نِمَچو ئو گَنَ نِمِهِه ئو ژَلما نِماو، گه اَرِه هُمَه نیریاسِ آسمو؛ 5 اَرِه هُمَه گه وَه قویَت خدا ئو وَه‌سونگَ ایمو، اَرِه نجادی گه اژ هَراِسگَه آمادَه بیَ تاگَه اِ زمون آخِر آشگارا بو، حفظ بینونَ؛ 6 ئو اَرِه یَه فِرَه خَوشالیَ مِهِینو، وَه‌یاآگه اِسگَه اَرِیَگه لازمَ، اَرِه مِدت کمی اِ اِنتحونَل جوراجور پَژار بینونَ، 7 تا اصِل بیئین ایمونتو اِنوم اِنتحو ثابت بو ئو موقَع ظاهربیئِن عیسی مسیح باعث ستائشت ئو جِلال ئو افتخار بو، هَراَ ایمونی گه فِرَه خیمتی‌تِر اژ طِلاءَ گه وَه‌یاآگه فانیَ وَه آگِر اِنتحونَ ماو. 8 هُمَه وَه‌یاآگه اوتو نِئیَ، دوس دیرینونی؛ ئو وَه‌یاآگه اِسگَه نِموئینینونی، ایمونَ بی دیرینونی ئو وَه خَوشی‌ای خَوشالیَ مِهِینو گه نِماو تیَریف کِینی ئو پِر اژ جِلالَ، 9 ئو ثمر ایمو ووژتو یانی نجاد گیونتونَ مارینون‌َ دس. 10 اِبارَه ایی نجادَ، پِخَمَرَل خو پاپِ بینَ، پِخَمَرَلی گه اِبارَه فیضی گه اَرِه هُمَه مَیِّن بیَ، نبوّتو کِرد. 11 اونَل تقِلائونَ مَهَرد بفیَمِن وخدی گه روحِ مسیح اِنوم اُوُ، وِرِکار اَر عذاوَل مسیح ئو جِلال دُما اَوَه شاتیَ ماتی، هَشارَه مَهَردی اَر چه کس ئو چه زمونی. 12 کَتِ در اَرِنو گه خِلمت اژ هُمَه‌ئونَ مَهَرد نه ووژو، اَسَه گه اژ چیئَلی قصه‌ئونَ مَهَرد گه اِسگَه اِبارَه اونَل اژ بشارت‌کَرَل انجیلَ مَشتوئینو، اژ اونَل گه وَه‌سونگَ روحِ خدا گه اژ آسمو کِل‌بیَ، بشارتَ میَنَ بینتو. جُ‌جُ فِریشدَه‌ل‌یش شوق سِیل کِردِن اَر ایی چیئِلَ دیرِن. مقدّس بوئن 13 اِسَه فگِرَلتو اَرِه عمل آمادَه بِهَن، هوشیار بوئن ئو امیدتو کامل اَر فیضی بو گه موقَع ظاهربیئِن عیسی مسیح ماوَ نَصُیتو. 14 اِجور آیلَل فِربوبَر، دیَر نوئن اِجور هُواوهوسَلی گه دورَه نایونی اَسگَه‌تونَ داشد. 15 بلکِم اِجور اَ قدوسَ گه دَوَتتو کِردیِ، هُمِه‌یش اِ کُل رفدارَلتو مقدّس بوئن؛ 16 اَرِیَگه نُیسیاءَ: «مقدّس بوئن، اَرِیَگه مِه قدوسِم.» 17 اَرّ وَه اوءَ موشینو باوَه گه بی‌‌جونِمداری ئو مِطابق کارَل هرکی داوریَ مِهِیتی اَری، اِسَه دورَه خَریوی ووژتونَ خداترسی بِگُذَرِنِن، 18 اَرِیَگه مَذانینو اژ طُرُخ زِنِه‌ی باطلی گه اژ باوَه‌لتو بِردوئیتونَ میرات، وَه خیمتی آزادیتو خِریاءَ، نه وَه چیئَل فانی اِجور طِلا ئو نُخِرَه، 19 بلکِم وَه خوین خیمتی مسیح، اِجور خوین وَرکی بی‌عِو ئو بی‌لکَه. 20 او وِر اژ یَگه بِنیا دنیا بِنِری مَیِّن بی، مِنتائای اِ ایی زمونَل آخِرَ وَه خاطر هُمَه ظاهر بی. 21 هُمَه گه وَه‌سونگَ او ایمونتو آوِردیَس اَر خدا، خدای گه او اژ مِردیَل زِنیا کِردی ئو جِلال داتیَ بی، تاگَه ایمون ئو امیدتون اَر خدا بو. 22 اِسگَه گه وَه اطاعت اژ حخیخت، گیونَل ووژتو پاکتونا کِردیَ تا مِحبت بِرائی خالصتو داشدوئی، باس اژ تیَه دلا فِرَه یَکتِریتو دوس داشدوئی. 23 اَرِیَگه تولد تازَ‌ه‌تو گِرتیَ، نه اژ تُئم فانی بلکِم اژ تُئم خِرِفانی، یانی کلوم خدا گه زِنیَ ئو تا ابدَ مَمینی. 24 اَرِیَگه، «جسم کُل اِجور گیاءَ ئو جِلالی کُل اِجور گل بیاوو؛ گیا حُشگا ماو ئو گُلَل مَرِزِن‌اِرا، 25 مِنتائای کلوم خدا تا ابدَ مَمینی.» ئو یَسَ اَ کلومی گه بشارتو داءَ هُمَه. |
@ 2024 Korpu Company