اول یوحنا 5 - کتاب مقدس به زبان لکی - گویش مرکزی

ایمون اَر کُر خدا

¹ هر کی ایمو دیری گه عیسی هَراَ مسیحَسَ گه باس بای، اژ خدا زاندَه بیَ؛ ئو هر کی باوَه دوس دیری، زاندَه اویش دوس دیری.

² ایمَه وخدی گه خدا دوس دیریم ئو اژ فِربونَل اطاعتَ مِهِیمی، وَه ایی جورَ مَذانیم آیلَل خدا دوس دیریم.

³ اَرِیَگه دوس داشدِن خدا یَسَ گه اژ فِربونَل اطاعت کِیمی ئو فِربونَل او بار گِرونی نیِن.

⁴ اَرِیَگه هر کی اژ خدا زاندَه بیَ، اَر دنیا فائقَ مای ئو ایمون ایمَه هَراَ پیروزیَسَ گه فائق هاتیَس اَر دنیا.

⁵ کیَ گه فائق با اَر دنیا بِخِر اژ اَوَه گه ایمو دیری گه عیسی کُر خداءَ؟

⁶ یَه هَر اَوَه‌‌سَ گه وَه آو ئو خوین هات، یانی عیسی مسیح. نه فَخَد وَه آو، بلکِم وَه آو ئو خوین؛ ئو روحِ خداءَ گه شاتیَ مِ، اَرِیَگه روحِ خدا، حخیختَ.

⁷ اَرِیَگه سه‌اِن گه شاتیَ میَن:

⁸ روحِ خدا ئو آو ئو خوین؛ ئو ایی سِئَه یَکِن.

⁹ اَرّ ایمَه شاتی اِنسو قبولَ مِهِیم، شاتی خدا فِرَه کَلِنگتِرَ، اَرِیَگه یَه شاتی خداءَ گه اِبارَه کُر ووژ داسی.

¹⁰ هر کی اَر کُر خدا ایمو دیری، ایی شاتیَ اِنوم ووژ دیری. هر کی اَر خدا ایمو ناآشدوئیتی، او کِردیَسیَ دِروزِن، اَرِیَگه ایمو ناوِردیَسی اَر شاتی‌ای گه خدا اِبارَه کُر ووژ داسی.

¹¹ ئو ایی شاتیَ یَسَ گه خدا ژییاین ابدی داسی‌ئونمو ئو ایی ژییاینَ، ها نوم کُری.

¹² هر کی کُر خدا دیری، ژییاین دیری ئو هر کی کُر خدا نِری ژییاین نِری.

اَوَه گه باس بِذانینو

¹³ مِه یوئنَتونَ اَرِنَ مَنُیسِنِم تاگَه هُمَه گه وَه نُم کُر خدا ایمو دیرینو، بِذانینو گه ژییاین ابدی دیرینو.

¹⁴ ئو یَسَ اطمینونی گه اَرتَک خدا دیریم گه اَرّ چیمونی مِطابق خواس او بِ، او دَنگمونَ مَشتوئی.

¹⁵ اَرّ بِذانیم هر چیمونی گه اَژی بِیتی، دَنگمونَ مَشتوئی، اِسَه اطمینو دیریم اَ چیئَه گه اَژینمو هِستیَ، گِرتِمونَ.

¹⁶ اَرّ کسی بوئینی بِرا او گنای مِهِه گه عاقویَت مرگ نیِ، باس دوعا بِهِه ئو خدا ژییاینَ موئَشخِتی‌ئون. یَه اِبارَه کسَلی موشِم گه عاقویَت گنائو مرگ نیَ. گنای هَس گه عاقویَت مرگِ. مِه اِبارَه هُنَ گنای نِموشِم گه باس دوعا بو.

¹⁷ هر کار نادُریسی گناءَ، مِنتائای گنای هَس گه عاقویَت مرگ نیِ.

¹⁸ ایمَه مَذانیم گه هر کی اژ خدا زاندَه بیَ دیَر اِنوم گنا زِنِه‌ی نِمِهِه، بلکِم اَ ’زاندَه خدا‘ یانی عیسی، مِتیَه‌جیَ ماوتی ئو دس شِطو نِمَرَستی‌ئون.

¹⁹ ایمَه مَذانیم گه اژ خدایم ئو کُل دنیا ها ژیر دس شِطون‌اِر.

²⁰ ایمَه مَذانیم گه کُر خدا هاتیَ ئو فیَم داسی‌ئونمو تا او گه حخیختَ، بشتاسیم ئو ایمَه هایم اِنوم او گه حخیختَ، یانی کُری عیسی مسیح. اوءَ خداءِ حخیخت ئو ژییاین ابدی.

²¹ اِاِ رولَه‌ل، ووژتون اژ بِتَل دویر بِگِرِن.