اول یوحنا 4 - کتاب مقدس به زبان لکی - گویش مرکزیروحَل اِنتحو کَن 1 اِاِ عزیزَل، وَه هر روحی باوارتو ناآشدوئی، بلکِم روحَل اِنتحو کَن تاگَه بِفیَمینو گه اژ خدان یاگَه نه. اَرِیَگه پِخَمَرَل دِروزِنِ فِرِه‌ی چِنَس اِنوم دنیاآ. 2 روحِ خدا هُنَ مَشتاسیمو: هر روحی گه اعتراف بِهِه گه عیسی مسیح اِنوم جسمِ بشری هاتیَ، اژ خداءَ. 3 ئو هر روحی گه وَه عیسی اعتراف نِمِهِه، اژ خدا نیَ، بلکِم هَراَ روحِ ’ضدّمسیحَ‘سَ گه هُمَه شنَفتِتونَ گه دیری مای ئو اِسگِه‌یشَ ها نوم دنیااِر. 4 اِاِ رولَه‌ل، هُمَه اژ خداینو ئو فائق هاتینونَس اَر اونَل، اَرِیَگه اَوَه گه ها نوم هُمِه‌اِر کَلِنگتِر اژ اَوَه‌‌سَ گه ها نوم دنیااِر. 5 اونَ هِن دنیان ئو اَژونَسَ گه هر چی گه موشِن اژ دنیاءَ ئو دنیایش گوشَ مِ‌ئونو. 6 ایمَه اژ خدایمو ئو کسی گه خداءَ مَشتاسی، گوشَ مِ‌ئونمو؛ مِنتائای اَوَه گه اژ خدا نیَ، گوش‌ئونمو نِمِ. ایمِه‌یش هُنَ، روح حخیخت ئو روح دِرو اژ یَک اِرَماریم. خدا مِحبتَ 7 اِاِ عزیزَل، مِحبت کَن اَر یَکتِری، اَرِیَگه مِحبت اژ خداءَ ئو هر کی مِحبتَ مِهِه، اژ خدا زاندَه بیَ ئو خداءَ مَشتاسی. 8 هر کی مِحبت نِمِهِه، خدا نِمَشتاسی، اَرِیَگه خدا مِحبتَ. 9 مِحبت خدا هُنَ اِنوم ایمَه آشگارا بی گه خدا یَکونَه کُر ووژ کِل‌کِردی اِرَه دنیا تاگَه وَه‌سونگَ او ژییاینمو داشدوئی. 10 مِحبت هَر یَسَ، نه یَگه ایمَه مِحبتمو کِردوئی اَر خدا، بلکِم او مِحبت کِردی اَر ایمَه ئو کُر ووژ کِل‌کِردی تاگَه کفارَه گنائَلمو بو. 11 اِاِ عزیزَل، اَرّ خدا ایمَه هُنَ مِحبت کِردی، ایمِه‌یش باس مِحبت بِهِیم اَر یَکتِری. 12 هُیچ‌کس هرگِس خدا نِئیَسی؛ اَرّ ایمَه مِحبت بِهِیم اَر یَکتِری، خدا لیز گِرتیَس اِنوم ایمَه ئو مِحبت او اِنوم ایمَه کاملا بیَ. 13 هُنَ مَذانیمو گه ایمَه اِنوم او لیزمو گِرتیَ ئو اویش اِنوم ایمَه، اَرِیَگه اژ روحِ ووژ داسی‌ئونمو. 14 ئو ایمَه دیمونَ ئو شاتیَ مِیم گه باوَه، کُر ووژ کِل‌کِردی تاگَه نجاددهندَه دنیا بو. 15 هر کی اعترافَ مِهِه گه عیسی کُر خداءَ، خدا لیز گِرتیَس اِنوم او ئو اویش اِنوم خدا. 16 اِسَه ایمَه مِحبتی گه خدا اَر ایمَه دیری شناسیمونَ ئو باوارمو کِردیَ. خدا مِحبتَ ئو کسی گه لیز گِرتیَس اِنوم مِحبت، لیز گِرتیَس اِنوم خدا ئو خدا اِنوم او. 17 مِحبت هُنَ اِنوم ایمَه کاملا بیَ تاگَه ایمَه اِ روژ داوری اطمینونمو داشدوئی، اَرِیَگه ایمَه اِنوم ایی دنیاءَ هَراَ جوریمَ گه او هَس. 18 اِنوم مِحبتْ هُیچ ترسی نیَ، بلکِم مِحبت کامل، ترسَ مِهِئَه دِریر؛ اَرِیَگه ترس اژ مِجازاتَ ئو کسی گه زِلَه مَچوتی، اِنوم مِحبتْ کاملا نوئیَ. 19 ایمَه مِحبتَ مِهِیم اَرِیَگه اول‌بار او مِحبت کِردی اَر ایمَه. 20 اَرّ کسی بوشی گه خدا دوس دیری ئو اژ بِرا ووژ بیزار بو، دِروزِنَ. اَرِیَگه کسی گه بِرا ووژ گه موئینی، دوس نِری، نِمَتونی خدای گه نِئیِ، دوس داشدوئیتی، 21 ئو ایمَه ایی حکمَ اژ او دیریم گه هر کی خدا دوس دیری، باس بِرا ووژیشی دوس داشدوئیتی. |
@ 2024 Korpu Company