اول یوحنا 3 - کتاب مقدس به زبان لکی - گویش مرکزی1 سِیل کَن باوَه چه مِحبتی اَر ایمَه کِردیِ تاگَه ایمَه آیلَل خدا هِنا بوئیمو! ئو هَرهُنِ‌یشَ هِیم! اَژونَسَ گه دنیا ایمَه نِمَشتاسی، اَرِیَگه او نشتاسیتی. 2 اِاِ عزیزَل، اِسگَه آیلَل خدایمو، مِنتائای اَ چیئَه گه میا بوئیمو حالامی دیار نوئیَ، مِنتائای مَذانیمو وخدی گه او ظاهر بو، موئیمون اِجور او، اَرِیَگه او هَراَ جورَ گه هَس، موئینیمو. 3 ئو هر کی هُنَ امیدیَ بی دیرِتی، ووژ پاکا مِهِه، هُنَ گه او پاکَ. 4 هر کی اِنوم گنا زِنِه‌یَ مِهِه، اَرضد شریعت رفدارَ مِهِه؛ اَرِیَگه گنا اَرضد شریعتَ. 5 هُمَه مَذانینو گه مسیح ظاهر بی تاگَه گنا اژ بِن بیَری. اِنوم او هُیچ گنای نیَ. 6 هر کی اِنوم او بِمینی، گُرّان گنا نِمِهِه ئو هر کی گُرّان گنا مِهِه، او نِئیِ ئو نِمَشتاسی. 7 اِاِ رولَه‌ل، نِیلِن کس اژ رئیتون اِرباری، کسی گه صالح‌بیئین باریَ جا صالحَ، هُنَ گه او صالحَ. 8 هر کی اِنوم گنا زِنِه‌یَ مِهِه اژ ابلیسَ، اَرِیَگه ابلیس هَر اژ اَ اولا گنا کِردیِ ئو مِهِه. اَژونَبیَ گه کُر خدا ظاهر بی تاگَه کارَل ابلیس باطل کِ. 9 اَوَه گه اژ خدا زاندَه بیَ، اِنوم گنا زِنِه‌ی نِمِهِه، اَرِیَگه ذات خدا اِنوم اوءَ مَمینی ئو نِمَتونی اِنوم گنا زِنِه‌ی بِهِه، اَرِیَگه اژ خدا زاندَه بیَ. 10 هُنَ آشگارا ماو چه کسَلی آیلَل خدان ئو چه کسَلی آیلَل ابلیس: اَوَه گه صالح‌بیئین نِماریَ جا اژ خدا نیَ ئو هَمیش اَوَه گه بِرا ووژ دوس نِری. یَکتِریتو دوس داشدوئی 11 اَرِیَگه یَسَ اَ پِغومَ گه اژ اَ اولَ شنَفتِتونَ، گه باس یَکتِریمو دوس داشدوئی. 12 ایمَه نَباس اِجور قائِن بوئیمو گه هِن اَ شریرَ بیَ ئو بِرا ووژ کُشتی. ئو اَرِه‌چَه او کُشتی؟ اَرِیَگه کارَل ووژ گَن بی ئو کارَل بِرای دُریس. 13 اِاِ بِرال، بِلُجوئیتو نای گه دنیا اژ هُمَه بیزارَ. 14 ایمَه مَذانیمو گه اژ مرگ جاواز بیمونَسَ ژییاین، اَرِیَگه بِرالمو دوس دیریم. هر کی مِحبت نِمِهِه، اِنوم مرگَ مَمینی اَر جا. 15 هر کی اژ بِرا ووژ بیزارَ، قاتلَ ئو هُمَه مَذانینو گه ژییاین ابدی لیز نَگِرتیَس اِنوم هُیچ قاتلی. 16 ایمَه دوس داشدِنمو اژ یَه شناسیَ گه او گیو ووژ کِردیَ خِر ایمَه ئو ایمِه‌یش باس گیو ووژمو بِهِیمَ خِر بِرال. 17 مِنتائای اَرّ کسی مالِ‌منال دنیا داشدوئیتی ئو بوئینی گه بِرای میتاجَ، وَه ایی حالا ریَم اَری نِهِیتی، چطور مِحبت خدا لیزَ مَگِری اِنوم هُنَ کسی؟ 18 اِاِ رولَه‌ل، بورِن یَکتِریمو دوس داشدوئی، نه وَه قصَه ئو زوئو، بلکِم اِ عمل ئو اِ حخیخت! 19 هُنَ ایمَه مَذانیمو گه هِن حخیختیم ئو اِدوارَه اَرتَک او دلَلمو قرصَ مِهِیم؛ 20 اَرِیَگه هر وخد گه دلمو ایمَه مَکوم بِهِه، خدا کَلِنگتِر اژ دل ایمِئَه ئو اژ کُل چی خَوَر دیری. 21 اِاِ عزیزَل، اَرّ دلمو ایمَه مَکوم نِهِه، اَرتَک خدا اطمینو دیریم 22 ئو هر چَمونی بِ، اَژینَ مَسینیمی، اَرِیَگه حکمَل اوءَ ماریمَ جا ئو اَ چیئَه گه خَوشالا مِهِیتی، اَنجومَ مِیم. 23 حکِم او یَسَ گه ایمو باریمَ نُم کُری عیسی مسیح ئو یَکتِریمو دوس داشدوئی، هُنَ گه مسیح‌یش هَر ایی فِربونَ داسیَ ایمَه. 24 هر کی اژ فِربونَل او اطاعتَ مِهِه، لیز گِرتیَس اِنوم خدا ئو خدایش اِنوم او؛ ئو هُنَ، وَه‌سونگَ اَ روحَ گه او بَشخیَسی‌ئونمو، مَذانیم گه او لیز گِرتیَس اِنوم ایمَه. |
@ 2024 Korpu Company