اول یوحنا 2 - کتاب مقدس به زبان لکی - گویش مرکزیمسیح شِفاعت‌کَر ایمَه 1 اِاِ رولَه‌ل، یَتونَ اَرِنَ مَنُیسِنِم تاگَه گنا نِهِینو. مِنتائای اَرّ کسی گنای بِهِه، اَرتَک باوَه شِفاعت‌کَری دیریم، یانی عیسی مسیحِ صالح. 2 او کفارَه گنائَل ایمِئَه، نه فَخَد گنائَل ایمَه، بلکِم گنائَل کُل دنیایش. 3 اَرّ حکمَل او باریمَ جا، هُنَ مَذانیم گه اومو شناسیَ. 4 هر کی بوشی اوءَ مَشتاسِم، مِنتائای حکمَل نارتیَ جا، دِروزِنَ ئو حخیخت اِنوم او نیَ. 5 مِنتائای کسی گه کلوم اوءَ ماریَ جا، مِحبت خدا اِراسی اِنوم او کاملا بیَ. هُنَ مَذانیم گه هایمون اِنوم او: 6 اَوَه گه موشی اِنوم اوءَ مَمینِم، باس هَراَ جورَ رفدار بِهِه گه عیسی رفدارَ مَهَردی. 7 اِاِ عزیزَل، حکِم تازَه‌تونی اَرِه نِمَنُیسِنِم، بلکِم حکِم قدیمی‌‌ای گه اژ اول داشدِتونَ. ایی حکِم قدیمیَ، هَراَ کَلومَسَ گه شنَفتِتونَ. 8 وَه ایی حالا، حکمی گه اَرِنتونَ مَنُیسِنِم حکِم تازه‌ی کَ گه حخیخت اَوَه، هم اِنوم او ئو هم اِنوم هُمَه دیارَ، اَرِیَگه تیَریکی دیری مَگُذَری ئو نُیر حخیخی هَراِسگِه‌یشَ بِریقَه مایتی. 9 هر کی بوشی ها نوم نُیراِر ئو اژ بِرا ووژ بیزارَ، هَنی ها نوم تیَریکی‌اِر. 10 هر کی بِرا ووژ دوس دیری، لیزَ مَگِری اِنوم نُیر ئو هُیچی باعث اِ گنا کَتِن او نِماو. 11 مِنتائای هر کی اژ بِرا ووژ بیزارَ، ها نوم تیَریکی‌اِر ئو اِنوم تیَریکیَ مَچوءَ رئیا. او نِمَذانی ویرِ کوءَ مَچو، اَرِیَگه تیَریکی چیَمَل کور کِردیَ. 12 اِاِ رولَه‌ل، اَرِه هُمَه مَنُیسِنِم، اَرِیَگه گنائَلتو وَه خاطر نُم او بَشخیان. 13 اِاِ باوَه‌ل، اَرِه هُمَه مَنُیسِنِم، اَرِیَگه اَوَه گه اژ اَ اولَ بیَسی، مَشتاسینو. اِاِ جِهالَل، اَرِه هُمَه مَنُیسِنِم، اَرِیَگه فائق هاتینونَس اَر اَ شریرَ. اِاِ آیلَل، اَرِه هُمَه مَنُیسِنِم، اَرِیَگه باوَه مَشتاسینو. 14 اِاِ باوَه‌ل، اَرِه هُمَه مَنُیسِنِم، اَرِیَگه اَوَه گه اژ اَ اولَ بیَسی، مَشتاسینو. اِاِ جِهالَل، اَرِه هُمَه مَنُیسِنِم، اَرِیَگه زوردارینو ئو کلوم خدا اِنوم هُمَه لیز گِرتیَسی، ئو فائق هاتینونَس اَر اَ شریرَ. دل نوئنِن اَر دنیا 15 دل نوئنِن اَر دنیا ئو چیئَلی گه هان اِنوم دنیااِر. اَرّ کسی دنیا دوس داشدوئیتی، مِحبت باوَه اِنوم نیِ. 16 اَرِیَگه هر چی گه ها نوم دنیااِر، یانی چیئَلی گه جسم ها دُمونا ئو چیئَلی گه چیَمَ موئینی ئو مِیتی ئو قُراتی مالِ‌مَقوم، اژ باوَه نیَ بلکِم اژ دنیاءَ. 17 دنیا ئو هُواوهوسَلی دیری مَگُذَری، مِنتائای اَوَه گه خواس خدا ماریَ جا، تا ابدَ مَمینی. هُشتار اِبارَه ’ضدّمسیح‘ 18 اِاِ آیلَل، یَه سات آخِرَ ئو هَراَ جورَ گه شنَفتِتونَ ’ضدّمسیحَ‘ مای، هَراِسگِه‌یشَ ضدّمسیحَل فِرِه هاتِنَ. اِسَه هَر اژ یَه‌آ مَذانیمو گه سات آخِرَ. 19 اونَل اِنوم ایمَه چِنَ دِریر، مِنتائای اژ ایمَه نوئین؛ اَرِیَگه اَرّ اونَل اژ ایمَه بیان، مَمَنِنَ گَرد ایمَه. مِنتائای اونَ چِنَ دِریر تا یَه بِکُوءِ در گه هُیچ‌کُم اژ اونَ اژ ایمَه نیِن. 20 مِنتائای هُمَه وَه روح‌القدس مسح بینونَ ئو کُلتو کُل چیَ مَذانینو. 21 مِه اَرِه هُمَه مَنُیسِنِم نه اَرِیَگه حخیخت نِمَذانینو، بلکِم اَرِیَگه اَوَه مَذانینو ئو هَمیش مَذانینو گه هُیچ دِروئی اژ حخیخت نیَ. 22 دِروزِن کیَ بِخِر اژ اَوَه گه مسیح بیئین عیسی حاشا مِهِه. هُنَ کسی هَراَ ’ضدّمسیحَ‘سَ گه هم باوَه ئو هم کُر حاشاءَ مِهِه. 23 هر کی کُر حاشا بِهِه، باوِه‌یش نِری ئو کسی گه کُر اعتراف بِهِه، باوِه‌یش دیری. 24 بِیلِن اَ چیئَه گه اژ اولا شنَفتِتونَ، بِمینی اِنومتو؛ اَرّ اَ چیئَه گه اژ اول شنَفتِتونَ بِمینی اِنومتو، هُمِه‌یش مَمینینون اِنوم کُر ئو اِنوم باوَه. 25 ئو یَسَ اَ چیئَه گه او وَدَه داسی‌ئونمو، یانی ژییاین ابدی. 26 مِه ایی چیئِلَ اَرِه هُمَه اِبارَه کَسَلمی نُیسونیَ گه میا هُمَه اژ رئی اِربارِن. 27 مِنتائای اَ مسحَ گه اژ اوتو گِرتیَ، اِنوم هُمَه مَمینی ئو هَوَجه‌ی نِرینو گه کسی تیَلیمتو دِ. بلکِم مسح او اِبارَه کُل چی تیَلیمتونَ مِ. اَ مسحَ، حخیخیَ نه دِروزِنِ. اِسَه هَراَ جورَ گه تیَلیمتو داسی، اِنوم او بِمینِن. آیلَل خدا 28 اِسگَه، اِاِ رولَه‌ل، اِنوم او بِمینِن تا وخدی گه او ظاهرَ ماو، اطمینونمو داشدوئی ئو موقَع هاتِنی خجالت نوم‌رُی او نوئیمو. 29 اَرّ مَذانینو گه او صالحَ، اِسَه اطمینونتو داشدوئی اَوَه گه صالح‌بیئینَ ماریَ جا، اژ خدا زاندَه بیَ. |
@ 2024 Korpu Company