اول قرنتیان 9 - کتاب مقدس به زبان لکی - گویش مرکزیپولُس اژ حخ ووژَ مَگُذَری 1 مَر آزاد نیِم؟ مَر رسول نیِم؟ مَر خداونمو عیسی نیَ؟ مَر هُمَه ثمر کار مِه اِنوم خداون نیئینو؟ 2 اَرّ اَرِه کسَلی‌تِر رسول نیِم، دسِ‌کم اَرِه هُمَه گه هم؛ اَرِیَگه هُمَه میر تایید رسالتِم اِنوم خداونینو. 3 اَرِه اونَلی گه رسالت مِنَ میَرِن‌ِ ژیر سؤال، دَفاع مِه یَسَ. 4 یانی ایمَه حخ نِریم بیریم ئو خُرّ دِیم؟ 5 یانی ایمَه حخ نِریم اِجور باقی رسولَل ئو بِرال خداون ئو کیفا، ژَن ایمودارمونی وَه‌گَرد ووژمو داشدوئی؟ 6 یا فَخَد مِن ئو برنابایم گه باس اَرِه خرجِ‌بَرج زِنِه‌یمو کار بِهِیم؟ 7 کُمین سَروازَ گه وَه خرج ووژ خِلمت بِهِه؟ کیَ گه باخ انگویر باوژی ئو اژ میوَه نیرتی؟ کیَ گه ریئَنی شوئونی کِ ئو اژ شیر اَوَه بیَر نیَری؟ 8 مَر مِه ایی قصه‌لَ اژ رُی فگِرَل اِنسونیَ موشِم؟ مَر شریعت‌یش هُنَ نِموشی؟ 9 اَرِیَگه اِ شریعت موسی هاتیَ گه «دَم کِلَ‌گای گه خرمُنَ مَکوئی، نوئن.» مَر خدا ها فگِر گائَل‌اِر؟ 10 یانی اِراسی یَه اِبارَه ایمَه نِموشی؟ اَاَ، زَقین دیرِم ایی کلومَ اَرِه ایمَه نُیسیاءَ، اَرِیَگه وخدی کسی زمینی شُئمَ مِ ئو خرمُنَ مَکوءِ، باس امید داشدوئیتی گه اژ ثمری بیَرَ میَری. 11 اَرّ ایمَه اِنومتو تُئم روحانی‌مو آوشدیَ، یانی یَه فِرِهءَ گه ثمر مادی اَژینتو هیزدِیم؟ 12 اَرّ کسَلی‌تِر یَه حخ ووژونَ مَذانِن گه هُنَ چیئونی اژ هُمَه بِ، یانی ایمَه حخ ویشتِری نِریم؟ مِنتائای ایمَه اژ ایی حخَ استفادَه‌مو نَهَرد، بلکِم هر چیئی تیَمِلَ مِهِیم تاگَه چیمونی اَرسر رئی انجیل مسیح نَنیائی، 13 مَر نِمَذانینو کسَلی گه اِنوم معبد کارَ مَهَن، خوراکون اژ معبدَ مَگِرِن ئو کسَلی گه نوم قُرونی‌گا خِلمتَ مَهَن، اژ اَ چیئَه گه اَررُی قُرونی‌گا پیشکَشیَ ماو، بیَرَ میَرِن؟ 14 هَرهُنَ، خداون فِربو داسی گه کسَلی گه انجیل اِلومَ مَهَن، خرجِ‌بَرج ووژون اژ انجیل اِربارِن. 15 مِنتائای مِن اژ هُیچ‌کُم اژ ایی حَخِلَ استفادَه‌م نَهَرد ئو یوئیشَ نِمَنُیسِنِم تاگَه اَرِه مِه هُنَ بِهِینو. اَرِه مِه مِردِن بیتِر اژ یَسَ گه کسی ایی افتخارمَ اَژینِم بِگِری. 16 اَرِیَگه اَرّ مِه انجیل موعظَه مَهَم، دلیلی نِری اَر ووژِم بنازِم، اَرِیَگه وظیفَه‌مَ گه ایی کارَ بِهَم؛ هِرّو اَرّ مِه انجیل موعظَه نَهَم. 17 اَرِیَگه اَرّ وَه صِلا ووژِم ایی کارمَ مَهَرد، اَجِرمی مَگِرت، مِنتائای اَرّ وَه صِلا ووژِم ناو، فَخَد وظیفَه ووژِم اَنجومَ میَم. 18 اِسَه اَجِرِم چیَ؟ یَگه وَه مِفت خَوَر خَوش انجیل اِلوم کَم ئو اژ کُل حخ ووژِم گه اِنوم انجیل دیرِم استفادَه نَهَم. 19 اَرِیَگه وَه‌یاآگه اژ کُل کسی آزادِم، ووژِم کِردِمَسَ نوکر کُل کس تاگَه آمَل ویشتِری اَرِه مسیح بارمَ دس. 20 اَرتَک یهودیَل بیم اِجور یهودیَل، تاگَه یهودیَل اَرِه مسیح بارمَ دس. اَرتَک کسَلی گه هانِ ژیر شریعت بیم اِجور کسی گه ها اِژیر شریعت، تاگَه کسَلی گه هانِ ژیر شریعت اَرِه مسیح بارمَ دس- وَه‌یاآگه ووژِم اِژیر حکِم شریعت نیِم. 21 اَرتَک کسَلی گه اِژیر شریعت نیِن بیم اِجور اونَلی گه شریعت نِرِن، تاگَه کسَلی گه اِژیر شریعت نیِن، اَرِه مسیح بارمَ دس. وَه‌یاآگه ووژِم بی شریعت خدا نیِم، بلکِم هامِ ژیر شریعت مسیح. 22 اَرتَک آمَل ضِیف، بیمَ ضِیف تاگَه ضِیفَل اَرِه مسیح بارمَ دس. مِه اَرِه کُل کسی بیمَ کُل چی، تاگَه هر جوری بیَ بِری اَژینو نجاد بیَم. 23 مِه کُل ایی چیئِلَ وَه خاطر انجیلَ مَهَم، تاگَه اِ بِرَکتَل انجیل وَه‌گَرد اونَ هُم‌بیَر بوئم. 24 مَر نِمَذانینو گه اِ مِسابقَه دو کُلَ مَنِن اَر دو، مِنتائای فَخَد یَکی جائزَه میَری؟ اِسَه هُمَه جوری بِنِن اَر دو گه بیَرینونا. 25 هر کی مِسابقَه مِ سزاءَ مِ اَر ووژ گه اِ کُل چی نوا ووژ بِگِری. اُوُ اَرِه یَه هُنَ مَهَن تاگَه تاجی گه اژ بِنَ مَچو، بارنَ دس؛ مِنتائای ایمَه اَرِه تاجی گه اژ بِن نِمَچو، هُنَ مِهِیم. 26 اِسَه مِه بی‌هدف نِمَنم اَر دو؛ ئو اِجور کسی گه اِ هُوا مِشتَ مَشینی، مِشت نِماوژِم؛ 27 بلکِم سزا میَم اَر لار ووژِم ئو صِلا مَگِرِمِ دس، تاناخواد دُما موعظَه وَه کسَلی‌تِر، ووژِم رِفوزَه بوئم. |
@ 2024 Korpu Company