اول قرنتیان 8 - کتاب مقدس به زبان لکی - گویش مرکزی

اِبارَه خوراک پیشکَشی اَر بِتَل

¹ ئو مِنتائای اِبارَه خوراکَلی گه پیشکَشیَ ماو اَر بِتَل: مَذانیم گه «ایمَه کُل صائای علمیم.» ایی علمَ باعث قُراتیَ ماو، مِنتائای مِحبت بِنا مِهِه.

² اَرّ کسی گُمونَ مِهِه چیئی مَذانی، هَنی اَجورَ گه باس، نِمَذانی.

³ مِنتائای اَ کسَ گه خدا دوس دیری، وَه‌سونگَ خدا شناسیا ماو.

⁴ اِسَه اِبارَه هُاردِن خوراکی گه پیشکَشیَ ماو اَر بِتَل، ایمَه مَذانیم گه «وِجودِ بِت واقعی نیَ،» ئو «بِخِر اژ یِه خدا، خدای‌تِر نیَ.»

⁵ اَرِیَگه دُریسَ هَن، اونَلی گه موشِنَ بینو خدائَل، چه اَر زَمی ئو چه اِ آسمو -هَرهُنَ گه ’خدائَل‘ ئو ’خداونَل‘ فِرِه هَس-

⁶ وَه ایی حالا فَخَد یِه خدا اَرِه ایمَه هَس، یانی باوَه آسمونی، گه کُل چی اژ اوءَ، ئو ایمَه اَرِه اوئیم؛ ئو فَخَد یِه خداون هَس، یانی عیسی مسیح، گه کُل چی وَه‌سونگَ اوءَ ئو ایمَه وَه‌سونگَ او هِیم.

⁷ وَه ایی حالا کُل ایی درکَ نِرِن. اَرِیَگه بِری وِر اژ یَه اَخَ وَه‌گَرد بِتَل سروکارو داشدیَ گه هَنی‌ش اَرّ هُنَ خوراکَلی بیرِن گُمونَ مَهَن اَ خوراکَ اِراسی پیشکَشی بیَس اَر بِتَل ئو اَرِیَگه وِژدانو ضِیفَ، ناپاک بینَ.

⁸ «خوراک، ایمَه اَر خدا نزیک نِمِهِه»؛ نه وَه نَهُاردِن بَتِرَ موئیم، نه وَه هُاردِن بیتِر.

⁹ مِنتائای حُواستو بو، ایی صِلای گه اژ ووژتو دیرینو اِجور کُچِکی ناو گه پا آمَل ضِیف گیرَ مِهِیتی اَری ئو مَکُوئِن.

¹⁰ اَرِیَگه اَرّ کسی گه وِژدان ضِیفی دیری، تو گه آم دونای کین بوئینی گه نیشتینَس اِنوم معبد بِتَل ئو اژ اَ خوراکِلَ میرین، یانی اویش جوخ نِمَچوتی گه خوراک پیشکَشی اَر بِتَل بیری؟

¹¹ اِسَه، علم تو باعثَ ماو اَ آم ضِیفَ، اَ بِرای گه مسیح وَه خاطر او مِرد، نابود بو.

¹² اِسَه، وخدی هُنَ اَرضد بِرال ووژتو گنا مِهِینو ئو لَدمَه مِینون اَر وِژدان ضِیفو، اَرضد مسیح گناءَ مِهِینو.

¹³ اِسَه، اَرّ خوراک اِجور کُچِکی بو گه پا بِرام گیرَ مِهِیتی اَری ئو مَکُوءِ، هرگِس گوشد نِمیرِم تاناخواد باعث کَتِن او بوئم.