اول قرنتیان 5 - کتاب مقدس به زبان لکی - گویش مرکزیبیعصمتی اِنوم کلیسا 1 حخیخت یَسَ گه خَوَر رَسیَ اِنوم هُمَه بی‌عصمتی هَس، اویشَ وَه اَجورَ گه جُ‌جُ بِت‌پِرَسَل‌یش طاخَت نِمارِن، اَرِیَگه شنَفتِمَ پیای کَتیَسِ ژَن‌باوَه ووژ. 2 ئو هُمِه‌یش افتخارَ مِهِینو! یانی نَباس هَری بِگِرینون‌ِ سرتو ئو کسی گه هُنَ کاری کِردیَسی اِنوم ووژتو تار کِینونی؟ 3 اَرِیَگه دُریسَ گه جسماً اَر اورَه نیِم، مِنتائای روحِم هار تَکتو؛ ئو اِسگَه، اِجور کسی گه ها نومتون‌اِر، اِبارَه کسی گه هُنَ کاری کِردیَسی، قضاوت ووژِم اِلومَ مَهَم. 4 وخدی هُمَه وَه نُم خداون عیسی اِ دور یَک جیَمَ موئینو، مِن اِنوم روح ئو وَه قدِرت خداونمو عیسی هام اِنومتو، 5 هُمَه باس حُوالَه ایی پیا بِینونَ شِطو تاگَه وَه نابودی جسمی، روحی اِ روژ خداون عیسی نجاد بِگِری. 6 یَگه وَه ووژتونَ مَنازینو، خو نیَ. یانی نِمَذانینو گه تیکُلُنجِه‌ی حمیرتُرش مَتونی کُل حمیر اِرباری؟ 7 ووژتون اژ حمیرتُرش کُینَه پاکا کَن تاگَه حمیر نوو بوئینو، هُنَ گه اِراسی فطیرینو؛ اَرِیَگه مسیح، وَرک پِسَخ ایمَه، قُرونی بیَ. 8 اِسَه بورِن ایی عِدَ جَشت بِگِریمو، نه وَه حمیرتُرش کُینَه، یانی حمیرتُرش کینَت ئو شرَباری، بلکِم وَه نونِ فطیر رُی‌راسی ئو حخیخت. 9 مِنِ نُامَه نواینِهَه ووژِم نُیسونم اَرِنتو گه وَه‌گَرد کسَلی گه بی‌عصمتیَ مَهَن، هاتِن‌چیئینتو ناآشدوئی. 10 مِنتائای مصقود یَه نیَ گه وَه‌گَرد آمَل بی‌عصمت ایی دنیاءَ یا طَمَ‌کارَل یا رِنگَرَل یا بِت‌پِرَسَل هاتِن‌چیئینتو ناآشدوئی، اَرِیَگه اَرّ اژ ایی جورَ بوءَ باس ایی دنیاءَ وِل کِینو. 11 مِنتائای اِسگَه اَرِنتونَ مَنُیسِنِم گه وَه‌گَرد کسی گه ووژَ بِرا هُمَه مَذانی، مِنتائای بی‌عصمت یا طَم‌َکار یا بِت‌پِرَس، دُشمین‌فِروش یا عِرَخی یا رِنگَرَ، هاتِن‌چیئینتو ناآشدوئی ئو وَه‌گَرد هُنَ کسی جُ‌جُ هُم‌سِفِرَه نوئن. 12 اَرِیَگه مِه چام اِبارَه کسَلی گه هانِ در قضاوت بِهَم. مَر قضاوت اِبارَه اونَلی گه هان اِنوم کلیسااِر، وَه مِل هُمَه نیَ؟ 13 خدا ووژ اِبارَه مردِمَلی گه جُزم کلیسا نیِن، قضاوتَ مِهِه. اِسَه «اَ آم گَنَ‌کارَ اِنوم ووژتو تار کَن.» |
@ 2024 Korpu Company