اول قرنتیان 4 - کتاب مقدس به زبان لکی - گویش مرکزیخِلمت رسولَل 1 اِسَه کُل باس وَه چیَم خِلمتکارَل مسیح ئو پیشکارَلی سِیلمو کَن گه رازَل خدا وَه اَمونت سپارتیاسَ دَسو. 2 هَمیش، پیشکار باس وفادار بو. 3 مِنتائای قضاوت هُمَه یا قضاوت دادگا اِنسونی اِبارَه مِه مِهم نیَ. مِه جُ‌جُ ووژیشِم اِبارَه ووژِم قضاوت نِمَهَم. 4 اَرِیَگه عِوی اِنوم ووژِم نِموئینِم، مِنتائای یَه مِه بی‌گنا نِمِهِه. بلکِم خداونَ گه اِبارَه مِه قضاوتَ مِهِه. 5 اِسَه اِبارَه هُیچی وِر اژ اَ وخدَ گه مِ بای، قضاوت نَهَن تاگَه خداون بای. او اَ چیئَه گه اِسگَه اِ تیَریکی شاردیاسا، اِنوم روشتایی آشگارَ مِهِه ئو نیّت دلَل آشگارَ مِهِه. اِسَه هر کی اَجورَ گه لیاخَت دیرِتی، خدا اَژینی تیَریفَ مِهِه. 6 اِاِ بِرال، مِه ایی چیئِلَ گه اِبارَه ووژِم ئو آپولُس بِردِمَسَ کار اَرِه خِریَّت هُمَه بیَ گه میَنا ایی قصَه بِگِرینونا گه: «اژ اَ چیئَه گه نُیسیاءَ، نواتِر نَچِن.» تاگَه هُیچ‌کُم اژ هُمَه اَرتَک یَکی وَه یَکی‌تِر ننازی. 7 اَرِیَگه کی چیئی‌تِر اِنوم تونَ موئینی؟ چَه دیرین گه نَبَشخیاسَ بینِت؟ اِسَه اَرّ بَشخیاسَ بینِت، اَنی اَرِه‌چَه هُنَ وَه ووژتَ مَنازین گه مَری نَگِرتِتَ؟ 8 بِگِر اِسَه هُمَه وَه هر چی گه مِهِستِتو، رَسینونَ! بِگِر اِسَه ثروَدمَنا بینونَ! ئو پاتِشائیَ مِهِینو، اَویشَ بی ایمَه! کوشگُ هَر اِراسی پاتِشائیتونَ مَهَرد تاگَه ایمِه‌یش وَه‌گَرد هُمَه پاتِشائیمونَ مَهَرد! 9 اَرِیَگه مِه گُمونَ مَهَم خدا اَرِه نِشو دائِن، ایمَه اِجور اسیرَل مَکوم وَه مِردِن ناسی اَر آخِردال. اَرِیَگه ایمَه بیمونَسَ نِماش اَرِه کُل دنیا، آمَل ئو فریشدَه‌ل. 10 ایمَه وَه خاطر مسیح اَخمَخیم، مِنتائای هُمَه اِنوم مسیح حکیمینو. ایمَه ضِیفیم، مِنتائای هُمَه قویَت‌دارینو! ایمَه بی‌قُرپیم، مِنتائای هُمَه قُرپ دیرینو! 11 ایمَه تا هَراِسگَه هم تینیئیم ئو هم وِرسِنی ئو جِنِکَلمو پیتِرکیانَ. کتک هُاردی ئو آواره‌یم. 12 ایمَه وَه دَسَل ووژمو کارَ مِهِیم ئو جُورَ مَکیشیم. وخدی نُم‌نَسَقَ مَنِنَ بینمونا، دوعا خِرَ مِهِیم؛ وخدی آزارمونَ میَن، طاخَتَ ماریم؛ 13 وخدی بُختِمَ میَن اَرینمو، وَه مِرِبونی جوواوَ مِیمونا. تا هَراِسگَه، ایمَه بیمونَسَ اِتِ‌اِشخال ایی دنیاءَ ئو پَس‌مَنَه کُل چیئَل. 14 یَه نِمَنُیسِنِم تاگَه هُمَه خجالتا کَم، بلکِم تاگَه اِجور آیلَل عزیزگرامیم نصیحتتو کَم. 15 اَرِیَگه اَرّیش هزارون هزار رَبَر اِنوم مسیحتو داشدوئی، مِنتائای باوَه‌ل فِرِه نِرینو، اَرِیَگه مِه وَه‌سونگَ انجیل اِنوم مسیحْ عیسی بیمَ باوَه‌تو. 16 اِسَه مَلالکِمَ بینتو اژ مِه سرمقشا بِگِرِن. 17 اَژونَسَ گه مِه تیموتائوسِم کِل‌کِردیَس اَرِه تَکتو گه آویل عزیزگرامی مِنَ ئو اَر خداون وفادارَ. او طُرُخَل مِن اِنوم مسیحْ عیسی ماریَ ویرتو، هَراَ جورَ گه اونَل اِ کُل جا اِنوم کُل کلیسائَل تیَلیمَ میَم. 18 بِری وَه ایی گُمونَ گه دیَر نِمام اَرِه تَکتو قُراتا بینَ. 19 مِنتائای اَرّ خدا بِیتی، مِه هَر وَه ایی زویَ مام اَرِه تَکتو ئو نه فَخَد قصَه‌ل ایی آمَل قُراتَ، بلکِم قدِرت‌یشونَ موئینِم. 20 اَرِیَگه پاتِشائی خدا وَه قصَه نیَ، بلکِم وَه قدِرتَ. 21 کُمینتونَ مِ؟ وَه گُرز بام اَرِه تَکتو یا وَه مِحبت ئو مِلائمت؟ |
@ 2024 Korpu Company