اول قرنتیان 3 - کتاب مقدس به زبان لکی - گویش مرکزیدسَهدسَه بیئِن اِنوم کلیسا 1 مِنتائای، اِاِ بِرال، نِمَتونِم وَه‌گَرد هُمَه اِجور کسَلی گه روحِ خدا دیرِن قصَه بِهَم، بلکِم اِجور کسَلی گه جسمونیِن، یانی اِجور کسَلی گه اِنوم مسیح، کورپَه‌ن قصَه مَهَم. 2 مِه شیرِم داءَ بینتو نه گوشد، اَرِیَگه اَرِه اَوَه آمادَه نوئینو ئو هَنی‌شِم آمادَه نیئینو. 3 اَرِیَگه هَنی جسمونیئینو. وخدی حَسوئی ئو جَرّ ها نومتون‌اِر، یَه نشونَه یَه نیَ گه جسمونیئینو ئو رفدارتو اِجور آمَلی‌تِرَ؟ 4 اَرِیَگه وخدی یَکی موشی: «مِه مِرید پولُسِم،» ئو یَکی‌تِرَ موشی: «مِه مِرید آپولُسِم،» یانی اِجور آمَلی‌تِر نیئینو؟ 5 مَر آپولُس کیَ؟ پولُس کیَ؟ اونَ خِلمتکارَلی کِن گه خداون وَه هرکُمو کاری سپارتیِ تاگَه هُمَه وَه‌سونگَ اونَ ایمو بارینو. 6 مِه تُئمِم آوشد ئو آپولُس آویاری کِردِنی، مِنتائای خدا باعث بی چِخِر بِکیشِن. 7 اِسَه نه اَ کسَ گه تُئمَ ماوژی کسی کَ ئو نه اَوَه گه آویاریَ مِهِه، بلکِم فَخَد خداءَ گه باعث سُز بیئِنونَ ماو. 8 کسی گه تُئمَ ماوژی ئو کسی گه آویاریَ مِهِه، هَردِک یَکی کِن ئو هرکُم وَه اَخَ گه جُورَ مَکیشِن، مِزَ مَگِرِن. 9 اَرِیَگه ایمَه هُمکارَل خدائیمو ئو هُمَه زَمی کشتِ‌کار ئو ساخدِمو خدائینو. 10 مِطابق فیضی گه خدا داسیَ مِه، اِجور مِمار سررشتَه‌داری بِناوَه ساخدِمونِم آوشدیَ ئو یَکی‌تِر اَررُی ایی بِناوَه، ساخدِمونَ ماوژی. مِنتائای هر کی باس حُواس بوتی گه چطورَ ماوژی. 11 اَرِیَگه هُیچ‌کس نِمَتونی بِخِر اژ بِناوِه‌ی گه کَتیَ، بِناوِه‌ی‌تِر باوژی ئو اَ بِناوَه هَر عیسی مسیحَ. 12 اِسگَه اَرّ کسی اَررُی ایی بِناوَه، ساخدِمونی اژ طِلا یا نُخِرَه یا کُچِکَل خیمتی یا چو یا گیا ئو کیَه باوژی، 13 کار هر کی آشگارا ماو، اَرِیَگه اَ ’روژَ‘ کُل چیئَه ماوژیِ در. اَرِیَگه آگِر آخِر کار آشگارَ مِهِه، ئو آگِر گَن ئو خو کار هر کی اِنتحونَ مِهِه. 14 اَرّ کسی چیئی بِنی اَررُی اَ بِناوَه ئو بِمینی اَر جا، اَجِرَ مَگِری. 15 مِنتائای اَرّ کار کسی بِسُزی، ضِرَدَ مِهِه؛ ئو دُریسَ ووژ نجادَ مَگِری، مِنتائای اِجور کسی کَ گه اِنوم بِلیزَل آگِر، ووژ نجاد داسی. 16 یانی نِمَذانینو گه معبد خدائینو ئو روحِ خدا لیز گِرتیَس اِنوم هُمَه؟ 17 اَرّ کسی معبد خدا بِرِمِنی، خدا او اژ بِنَ میَری؛ اَرِیَگه معبد خدا مقدّسَ ئو هُمَه اَ معبدینونَ. 18 ووژتو فن نیَن. اَرّ کسی اژ هُمَه ووژ اِنوم ایی زمونَه آم دونای مَذانی، بِیلِن نایو بو تاگَه دوناآ بو. 19 اَرِیَگه حکمت ایی دنیا وَه نظر خدا نایونیَ. اَرِیَگه اِنوم کِتاو ایوب نُیسیاءَ: «خدا آمَل دونا وَه فنِ‌فیت ووژو گرفدارَ مِهِه.» 20 ئو اِدوارَه اِنوم کِتاو مزامیر نُیسیاءَ: «خداون اژ فگِرَل آمَل دونا باخَوَرَ ئو مَذانی گه اونَ بیخود ئو باطلِن.» 21 اِسَه دیَر کسی وَه آمَل ننازی. اَرِیَگه کُل چی هِن هُمِئَه، 22 چه پولُس، چه آپولُس، چه کیفا، چه دنیا، چه زِنِه‌ی، چه مِردِن، چه اِسگَه ئو چه زمونی گه ها نوامون‌اِر، کُل هِن هُمَه‌ن، 23 ئو هُمَه هِن مسیحینو ئو مسیح هِن خداءَ. |
@ 2024 Korpu Company