اول قرنتیان 2 - کتاب مقدس به زبان لکی - گویش مرکزی

پِغوم ایمَه مسیحَ گه کیشیاس‌ اَر صلیب

¹ مِن‌یش، اِاِ بِرال، وخدی گه هاتم اَرِه تَکتو، نِهاتِم تاگَه شاتی خدا وَه قصَه‌ل کَلِنگ‌کَلِنگ ئو حکمت بشری اِلوم کَم اَرِنتو.

² اَرِیَگه قَصِم داشد گه اِنومتو چیئی نَذانِم بِخِر اژ عیسی مسیح، اویشَ مسیحی گه کیشیون اَر صلیب.

³ مِه وَه ضیَف ئو ترسِم‌لرزِم فِرِه‌ی اَرتَک هُمَه بیم،

⁴ ئو موعظَه ئو پِغومِم وَه قصَه‌ل قانی‌کَر حکمت نوئی، بلکِم وَه روح‌القدس ئو قدِرت خدا بی.

⁵ تاگَه ایمونتو اَررُی حکمت بشر نو، بلکِم اَررُی قدِرت خدا بو.

حکمت روحِ خدا

⁶ وَه ایی حالا، ایمَه اِنوم کسَلی گه کَلِنگِن، حکمتَ موشیم، مِنتائای نه حکمتی گه هِن ایی زمونَه یاگَه حکِمرونَل ایی زمونِئَه گه مَکومِن تاگَه اژ بِن بِچِن،

⁷ بلکِم حکمت خدا اِلومَ مِهِیم گه اِنوم یِه رازی پنهو بی گه خدا اژ اَ اولَ اَرِه جِلال ایمَه نا.

⁸ هُیچ‌کُم اژ حکِمرونَل ایی دنیاءَ ایی حِکمتونَ نَفیَمی، اَرِیَگه اَرّ اونَ مَفیَمیان، خداون جِلالو نِمَکیشیا اَر صلیب.

⁹ مِنتائای هَراَ جورَ گه اِشعیا پِخَمَر نُیسونیِ: «اَ چیئَه گه هُیچ چیَمی نِئیَسی، هُیچ گوشی نَشتَفتیَسی، ئو وَه فگِر هُیچ کس نَرَسیَ، خدا اَرِه دوسدارَل ووژ، آمادَه کِردیَسی.»

¹⁰ خدا ایی چیئِلَ وَه‌سونگَ روحِ ووژ آشگار کِردیَسی اَر ایمَه، اَرِیَگه روحِ خدا کُل چی، جُ‌جُ عمقَل خدائیشَ مَجوری.

¹¹ اَرِیَگه کیَ گه اژ فگِرَل آم باخَوَر بو، بِخِر اژ روحِ ووژ گه هایتِ دَرین؟ هَرایی جوریشَ فَخَد روحِ خداءَ گه اژ فگِرَل خدا باخَوَرَ.

¹² ایمَه نه روحِ ایی دنیاءَ، بلکِم روحمونی آوِردیَسَ دس گه اژ خداءَ تا اَوَه گه خدا پیشکَش کِردیَس اَر ایمَه، بفیَمیم.

¹³ ئو ایمَه نه وَه کلومی گه اژ حکمت بشری بو، بلکِم وَه کلومی گه روح‌القدس تیَلیمَ مِ یوئنَ موشیم؛ هُنَ حخیختَل روحانی اِلومَ مِهِیمَ کسَلی گه روحِ خدا دیرِن.

¹⁴ آم نفسونی، چیئَلی گه اژ روحِ خداءَ قبول نِمِهِه، اَرِیَگه وَه نظر او نایونیَ ئو نِمَتونی بفیَمیو، اَرِیَگه فَخَد وَه فیَم روحانیَ ماو اونِلَ بفیَمی.

¹⁵ آم روحانی اِبارَه کُل چی قضاوتَ مِهِه، مِنتائای هُیچ‌کس نِمَتونی اِبارَه او دُریس قضاوت بِهِه.

¹⁶ «اَرِیَگه کیَ گه فگِر خداون بفیَمی تاگَه تیَلیم دِیتی؟» مِنتائای ایمَه فگِر مسیح دیریمو.