اول قرنتیان 16 - کتاب مقدس به زبان لکی - گویش مرکزیجیَم دائِن پیشکَشیَل اَرِه ایمودارَل مسیح 1 اِسگَه اِبارَه جیَم دائِن پیشکَشیَل اَرِه ایمودارَل مسیح: هُمِه‌یش اَ چیئَه گه وِتِمَسَ کلیسا شیَر غَلاطیَه، اَنجوم دَن. 2 اِ روژ اول هر هفتَه، هرکُم اژ هُمَه اَ چیئَه گه اژ دس اِرَمایتی بِنیِ لا، ئو باوژی‌ِ پِ دس، تاگَه وخدی مام اِرَه تَکتو، اِتیاجی وَه جیَم دائِن پیشکَشیَل ناو. 3 وخدی مِه بِرَسِم، سفارش‌نُامَه‌لی میَمَ کسَلی گه هُمَه اطمینونئونِن دیرینو ئو اونِلَ گَرد پیشکَشیَلتو کِلَ‌مَهَم اِرَه اورشلیم. 4 اَرّ صِلا یَه بوءَ گه ووژیشِم بِچِم، مَچِمَ گَردو. نَشخَه‌لی اَرِه سفر 5 مِه دُما یَگه اژ هیال مقدونیَه رد بوئم، مام اِرَه تَکتو، اَرِیَگه مِه باس اژ مقدونیَه رد بوئم. 6 ئو هایتِر مِدتی بِمینِم اَر تَکتو، یاگَه جُ‌جُ کُل زِمِسو اَرتَک هُمَه سر کَم، تاگَه بتونینو هر جا گه مَچِم، اِ ایی سفرمَ یاریِم دِینو. 7 اَرِیَگه نِمِم اِسگَه اَر سر رئی هَر بام بوئینِمتون ئو بِچِم؛ بلکِم امید دیرِم، اَرّ خداون صِلا بِ، مِدتی بِمینِم اَرتَک هُمَه. 8 مِنتائای تا عِد پِنتیکاست مَمینِم اَر نوم شیَر اَفِسُس 9 اَرِیَگه در کَلِنگی اَرِه خِلمت واز بیَسِ رُیم گه فادَه دیری ئو دشمنَل‌یش فِرَه‌ن. 10 وخدی تیموتائوس هات، حُواستو بو گه اَر تک هُمَه هُیچ دل اِ هول ناوتی. اَرِیَگه اویش اِجور مِه خِلمت اژ خداونَ مِهِه؛ 11 اِسَه نِیلِن کس او خوار کِ. یاری دَنی تاگَه بتونی وَه سِلامتی گِلابیری اِرَه تک مِه؛ اَرِیَگه مِن ئو بِرال چیَمَ‌رئی اوئیم. 12 اِسگَه اِبارَه بِرامو آپولُس، مِه فِرَه اَژینِم هِست گه وَه‌گَرد باقی بِرال با اِرَه تَکتو، مِنتائای اصِلا راضی نوئی گه اِسگَه بای. مِنتائای هر وخد مِجال داشدوئیتی، مای. 13 حُواستو بو؛ سفدِسخد بِمینِن اِنوم ایمونتو؛ اِجور پیا عمل بِهَن ئو زوردار بوئن. 14 کُل کارَلتو وَه مِحبتا بو. 15 -هُمَه مَذانینو گه هوز اِستِفاناس اول کسَلی بین گه اِنوم هیال اَخائیَه ایمونو آوِرد، ئو اونَل ووژو وَخم خِلمت اژ ایمودارَل مسیحو کِردیَ- اِسگَه بِرال، مَلالکِم‌ئونتو 16 فِربوبَر هُنَ کسَلی بوئن ئو فِربوبَر هر کی گه اِنوم ایی خِلمتَ هُمکاریَ مِهِه ئو جُورَ مَکیشی. 17 مِه اژ یِهاتِن اِستِفاناس، فورتوناتوس ئو اَخائیکوس خَوشالِم، اَرِیَگه جا حالی هُمِه‌ئو پِرا کِردیَ. 18 اَرِیَگه اونَل روح مِه ئو هَمیش روح هُمِه‌ئو تازه‌آ کِردیَ. هُنَ کسَلی بشتاسِن. سِلامَل 19 کلیسائَل هیال آسیا سِلامَ مَرِسِنِن‌ئونتو. آکیلا ئو پْریسکیلا ئو کلیسای گه اِنوم مالو دُریس بیَ، اِنوم خداون سِلام گرمَ مَرَسِنِن هُمَه. 20 کُل بِرالی گه هان اَر ایرَه سِلامَ مَرِسِنِن‌ئونتو. وَه ماچ مقدّس سِلام بِهَن اَر یَکتِری. 21 مِه، پولُس، وَه خط ووژِم ایی سِلامتون اَرِنَ مَنُیسِنِم. 22 لیَنت اَر اَوَه گه خداون دوس ناآشدوئیتی. اِاِ خداون ایمَه، بوری! 23 فیض خداون عیسی وَه‌گَرد هُمَه بو. 24 مِحبت مِن اِنوم مسیحْ عیسی وَه‌گَرد کُلتو بو. آمین. |
@ 2024 Korpu Company