اول قرنتیان 14 - کتاب مقدس به زبان لکی - گویش مرکزیعطا نبوّت کِردِن ئو قصَه کِردِن وَه زوئونَلی‌تِر 1 رئی مِحبت بِگِرِنِ وَر ئو اژ تیَه دلا وَه دُم عطائَل روحانیا بوئن، مصقوصاً یَگه نبوّت بِهِینو. 2 اَرِیَگه اَوَه گه وَه زوئونی‌تِر قصَه مِهِه، نه وَه‌گَرد اِنسونَل بلکِم وَه‌گَرد خدا قصَه مِهِه. اَرِیَگه هُیچ‌کس قصَه او نِمَفیَمی؛ مِنتائای او اِنوم روحِ خدا، رازِلَ ماریَ زوئو. 3 مِنتائای کسی گه نبوّتَ مِهِه وَه‌گَرد مردِم قصَه مِهِه تاگَه اونَل اژ نظر روحانی بِنا کِ، تشویق کِ ئو دلگُوئی دِ. 4 اَوَه گه وَه زوئونی‌تِر قصَه مِهِه، ووژی اژ نظر روحانی بِنا مِهِه، مِنتائای اَوَه گه نبوّتَ مِهِه کلیسا اژ نظر روحانی بِنا مِهِه. 5 اِسگَه آواخدِم یَسَ گه کُلتو وَه زوئونَلی‌تِر قصَه بِهِینو، مِنتائای ویشتِر مِم گه نبوّت بِهِینو. کسی گه نبوّتَ مِهِه، کَلِنگتِر اژ اَوَه‌‌سَ گه وَه زوئونَلی‌تِر قصَه مِهِه، مَر یَگه ترجِمَه بِهِه تاگَه کلیسا اژ نظر روحانی بِنا بو. 6 اِسگَه بِرال، اَرّ مِه بام اِرَه تَکتو ئو وَه زوئونَلی‌تِر قصَه بِهَم، چه فادَه‌تونی اَرِه دیرِم، مَر یَگه مِکاشفَه یا علم یا نبوّت یا تیَلیمِمی اَرِه داشدوئینو؟ 7 جُ‌جُ سازَل بی‌گیون اِجور نی ئو چَنگ، اَرّ دَنگی گه هِن ووژونَ اِرنارِن چطور کسی بفیَمی چَه مَژَنِن؟ 8 اَرّ شِپور دَنگ ووژ اِرناری، کی آمادَه جنگَ ماو؟ 9 اِبارَه هُمِه‌یش هُنَسَ. اَرّ وَه زوئو ووژتو چیئَلی بوشینو گه نِماو کس بفیَمی، کسی گه هار اورَه چطور باس بفیَمی گه چَه موشینو؟ اَرِیَگه اِجور یَه مَمینی گه وَه‌گَرد هُوا قصَه بِهِینو. 10 چِرچ اِر نیِ گه اِنوم دنیا زوئونَل جوراجوری هَس ئو هُیچ کُم بی‌میَنا نیِن. 11 مِنتائای اَرّ مِه میَنا زوئو کسی نفیَمِم، اَرِه او بیگونَه‌م ئو اویش اَرِه مِه بیگونِئَه. 12 اِسَه اَرِیَگه هُمِه‌یش وَه شوق فِرِه‌یکا هاینونَ دُم آشگارا کِردِن عطائَل روحِ خدا، تقِلا بِهَن گه اِ بِنا کِردِن کلیسا اژ نظر روحانی تَرَخدی بِهِینو. 13 اِسَه، کسی گه وَه زوئونَلی‌تِر قصَه مِهِه باس دوعا بِهِه تاگَه بتونی ترجِمَه کِ. 14 اَرِیَگه اَرّ مِه وَه زوئونی‌تِر دوعا بِهَم، روحِم دوعا مِهِه، مِنتائای عَخِلِم بیَری نِمیَری. 15 ایلَهَه چَه بِهَم؟ وَه روح دوعا مَهَم ئو وَه عَخِل‌یش دوعا مَهَم؛ وَه روح سروءَ مَحیوَنِم ئو وَه عَخِل‌یش سروءَ مَحیوَنِم. 16 اَرّ هُنَ ناو، اَرّ تو وَه روحِ ووژِت شگِر خدا بِهِین، چطور کسی گه اژ ایی چیئِلَ خَوَر نِری وَه شگِر کِردِنِت بوشی، آمین؟ وخدی گه نِمَذانی چه موشین! 17 اَرِیَگه دُریسَ گه تو، خو شگِر خداءَ مِهِین، مِنتائای شگِر کِردِن تو اژ نظر روحانی باعث بِنا بیئِن اَ کسَ نِماو. 18 مِه شگِر خداءَ مَهَم گه ویشتِر اژ کُلتو وَه زوئونَلی‌تِر قصَه مَهَم؛ 19 وَه ایی حالا، ویشتِر مِم گه اِنوم کلیسا اَرِه تیَلیم دائِن وَه کسَلی‌تِر پنج کِلمَه وَه عَخِلِم قصَه بِهَم، تاگَه هزارو کِلمَه وَه زوئونی‌تِر بوشِم. 20 اِاِ بِرال، اِ درک ئو فیَم اِجور آویل نوئن، بلکِم اِ گَنی کِردِن اِجور کورپَه بوئن. برعسک، اِ درک ئو فیَم اِجور آم بالغ بوئن. 21 اِنوم تورات هُنَ نُیسیاءَ: «خداون هُنَ موشی، ”وَه زوئونَلی‌تِر ئو وَه لِچَل بیگونَه وَه‌گَرد ایی قومَ قصَه مَهَم. وَه ایی حالا گوش نِمَگِرِن اَر مِه.“» 22 اِسَه زوئونَل، نشونه‌ی کَ اَرِه بی‌ایمونَل نه اَرِه ایمودارَل؛ مِنتائای نبوّت نشونه‌ی کَ اَرِه ایمودارَل نه اَرِه بی‌ایمونَل. 23 اِسَه، اَرّ کُل کلیسا جیَم بوئن اَر دور یَکا ئو کُل وَه زوئونَلی‌تِر قصَه بِهَن، هَراَ حِنَ آمَل خَریوَه یا بی‌ایمو بان اِنوم، یانی نِموشِن هُمَه لیوِه‌ینو؟ 24 مِنتائای اَرّ وخدی کُل دیرِن نبوّتَ مَهَن، آم بی‌ایمو یا خَریوِه‌ی با اِنوم مِجِلیسو، اژ جونِم کُل مَکومَ ماو گه گناکارَ ئو اژ جونِم کُل بازخواسَ ماو، 25 رازَل دل آشگارا ماوتی. اَسَه رُیَ مَنی اَر زَمی ئو خدا مَپِرَسی ئو اِلومَ مِهِه گه: «اِراسی خدا ها نومتون‌اِر.» 26 اِسَه بِرال، مصقود چیَ؟ وخدی هُمَه جیَمَ موئینون اَر دور یَکا، هر کُم سروئی، درسی، مِکاشفه‌ی، زوئونی یا ترجِمه‌ی دیری. بِیلِن یوئنَ کُل اَرِه بِنا کِردِن کلیسا اژ نظر روحانی بو. 27 اَرّ کسی وَه زوئونی‌تِر قصَه مِهِه، دو یا نِهایت سه نفر، اویشَ گِ‌گِ قصَه بِهَن ئو بِیلِن یَکی ترجِمَه بِهِه. 28 مِنتائای اَرّ کسی ناو گه ترجِمَه بِهِه، هرکُم اژ اونَل باس اِنوم کلیسا بی‌کِش بِمینی ئو اِنوم دل ووژا قصَه گَرد خدا بِهِه. 29 بِیلِن دو یا سه نفر نبوّت‌کَر قصَه بِهَن ئو کسَلی‌تِر قصَه‌لو سُئِک سنگین کَن. 30 ئو اَرّ کسی‌تِر گه نیشتیَس اَر اورَه چیئی اَری آشگارا بوتی، اَ اولیَ باس بی‌کِش بو. 31 اَرِیَگه کُلَ مَتونینو گِ‌گِ نبوّت بِهِینو تاگَه کُل تیَلیما بِگِرِن ئو کُل تشویق بوئن. 32 روحِ نبوّت‌کَرَل فِربوبَر نبوّت‌کَرِلَ. 33 اَرِیَگه خدا، خداءِ بی‌نظمی نیَ، بلکِم خداءِ صُئل ئو سِتارَ، هَرهُنَ گه اِنوم کُل کلیسائَل ایمودارَل مسیح هُنَسَ، 34 ژِنَل باس اِنوم کلیسا بی‌کِش بِمینِن. اَرِیَگه صِلا قصَه کِردِنون‌ئون نانَ، بلکِم هَراَ جورَ گه شریعتَ موشی، باس فِربوبَر بوئن. 35 اَرّیش میا چیئی یاء بِگِرِن بِیلِن اِ مال ووژون اژ میردِه‌ئو بِپِرسِن؛ اَرِیَگه اَرِه ژَن دُریس نیَ اِنوم کلیسا قصَه بِهِه. 36 مَر کلوم خدا اژ هُمَه هاتیَ؟ مَر فَخَد رَسیَسَ هُمَه؟ 37 اَرّ کسی ووژَ نبوّت‌کَر یا آمی مَذانی گه روحِ خدا دیری، باس تایید بِهِه اَ چیئَه گه اَرِه هُمَه مَنُیسِنِم فِربونی کَ اژ جونِم خداون. 38 اَرّ کسی یَه تایید نِهِه، ووژیش تایید نِماو. 39 اِسَه بِرال، اژ تیَه دلا وَه دُم نبوّت کِردِنا بوئن ئو نوا قصَه کِردِن وَه زوئونَلی‌تِرا نَگِرِن. 40 مِنتائای کُل چی باس وَه نظم ئو ترتیبا بو. |
@ 2024 Korpu Company