اول قرنتیان 13 - کتاب مقدس به زبان لکی - گویش مرکزی

رئی مِحبت

¹ اَرّ وَه زوئو آمَل ئو فریشدَه‌ل قصَه بِهَم، مِنتائای مِحبتِم ناآشدوئی، اِجور زنگی مَمینِم گه مَزِری ئو سنجی گه زِرینگَ مایتی.

² اَرّ قدِرت نبوّت کِردِنِم داشدوئی ئو بتونِم کُل رازَل ئو کُل علمَل بِذانِم ئو اَرّ ایمو کاملمی داشدوئی هُنَ گه بتونِم کویَل جاواز کَم، مِنتائای مِحبتِم ناآشدوئی، هُیچِم.

³ اَرّ کُل مال‌ِمنالِم صِدقَه بیَم ئو لارِم بیَم تاگَه بِسُزی، مِنتائای مِحبتِم ناآشدوئی، هُیچ فادِه‌ی نِمیَرِم.

⁴ مِحبت صبِر دیری ئو مِرِبونَ؛ مِحبت حَسوئی نِمِهِه؛ وَه ووژ نِمَنازی ئو قُرات نیَ.

⁵ مِحبت بی‌اَدو نیَ ئو وَه دُم نفع ووژا نیَ؛ زوی آگِر اژ سر نِمَچوتی ئو کینَت اِ دل نِمَگِری؛

⁶ مِحبت اژ گَنی خَوشال نِماو، مِنتائای اژ حخیخت خَوشالیَ مِهِه.

⁷ مِحبت وَه‌گَرد کُل چیَ مَسازی، کُل چی باوار دیری، هَر امید دیری ئو کُل چی تیَمِلَ مِهِه.

⁸ مِحبت هرگِس تموم نِماو. مِنتائای نبوّتَل اژ بِنَ مَچِن ئو زوئونَل تمومَ موئن ئو علم اژ بِنَ مَچو.

⁹ اَرِیَگه ایمَه جُزمیَ مَذانیم ئو جُزمی نبوّتَ مِهِیم؛

¹⁰ مِنتائای وخدی کامل بای، دیَر جُزمیِهَه اژ بِنَ مَچو.

¹¹ وخدی آویل بیم، اِجور آیلَل قصَه‌مَ مَهَرد، اِجور آیلَل فگِرمَ مَهَرد ئو اِجور آیلَل دلیلمَ ماوِرد. مِنتائای وخدی بیمَ پیای، دیَر کارَل آویلکانَه‌م ناءِ لا.

¹² اَرِیَگه اِسگَه اِنوم آینَه تارَ موئینیم، مِنتائای اِ اَ زمونَ اژ ویرَرویرَ موئینیم. اِسگَه مِه جُزمیَ مَذانِم؛ مِنتائای زمونی مای گه مِه کاملَ مَذانِم، هَراَ جورَ گه خدا کامل اژ مِنَ مَذانی.

¹³ اِسگَه، ایی سه چیَ مَمینی، ایمون ئو امید ئو مِحبت. مِنتائای کَلِنگتِرینو مِحبتَ.