اول قرنتیان 11 - کتاب مقدس به زبان لکی - گویش مرکزی

¹ اژ مِه سرمقشا بِگِرِن، هَراَ جورَ گه مِه اژ مسیح سرمقشَ مَگِرِم.

سرتو بپوشِنِن

² تیَریف اَژینتونَ مَهَم گه اِ کُل چی مِنَ مارینون‌َ ویر ئو رسمِ‌رِسیم هَراَ جورَ گه سپارتم‌ئونتو، حفظَ مِهِینو.

³ مِنتائای مِم بِذانینو گه سر هر پیای، مسیحَ، سر ژَن، میردَه‌سی ئو سر مسیح خداءَ.

⁴ هر پیای گه سرپوشیا دوعا یا نبوّت بِهِه، سر ووژ بی‌قُرپ کِردیَسی.

⁵ مِنتائای هر ژَنی گه سرنپوشیا دوعا یا نبوّت بِهِه، سر ووژ بی‌قُرپ کِردیَسی؛ ایی کاریَ دُریس اِجور یَسَ گه سر ووژ تیشیَسی.

⁶ اَرِیَگه اَرّ ژَنی سر ووژ نِمَپوشِنی، اِسَه باس گیسَل ووژ بُئِری؛ ئو اَرّ، اَرِه ژَن عارَ گه گیسَلی بُئِری یا بِتیشی، اِسَه باس سر ووژ بپوشِنی.

⁷ پیا نَباس سر ووژ بپوشِنی، اَرِیَگه او رُی ئو جِلال خداءَ؛ مِنتائای ژَن، جِلال پیاءَ.

⁸ اَرِیَگه پیا اژ ژَن دُریس نوئیَ، بلکِم ژَن اژ پیا دُریس بیَ؛

⁹ پیا اَرِه ژَن خَلک نوئیَ، بلکِم ژَن اَرِه پیا.

¹⁰ اَژونَسَ ژَن باس نشونه‌ی اژ قدِرت‌واختیار اَررُی سر ووژ داشدوئیتی، وَه خاطر فریشدَه‌ل.

¹¹ وَه ایی حالا، اِنوم خداون، نه ژَن اژ پیا جیاءَ ئو نه پیا اژ ژَن.

¹² اَرِیَگه هَراَ جورَ گه ژَن اژ پیا دُریس بیَ، پیائیش وَه‌سونگَ ژَنا ماءَ دی، مِنتائای کُل چی اژ خداءَ.

¹³ ووژتو قضاوت بِهَن: یانی دُریسَ گه ژَن وَه سر پَتی اِ درگا خدا دوعا بِهِه؟

¹⁴ مَر طبیعت، ووژ یاتو نِمِ گه اَرّ پیای گیس دُرّ داشدوئیتی باعث نَنگَسی،

¹⁵ مِنتائای اَرّ ژَنی گیس دُرّ داشدوئیتی، باعث افتخارَسی. اَرِیَگه گیس دُرّو داسَ ژَن تا سر بپوشِنتی.

¹⁶ اَرّ کسی بِیتی جَرّ بِهِه، اِنوم ایمَه ئو کلیسائَل خدا هُنَ رسمی نیَ.

شُم خداون

¹⁷ مِنتائای اَرِه فِربونی گه میَم‌ئونتو، تیَریف اَژینتو نِمَهَم، اَرِیَگه وخدی هُمَه اِ دور یَک جیَمَ موئینو، فادَه گه نِری هُیچ، ضِرَدیش دیری.

¹⁸ اَرِیَگه اولَ مَشتوئِم، وخدی هُمَه اِ دور یَک جیَمَ موئینو، موئینونَ چَن دسَه ئو کَمِ‌کُتی یَه باوارَ مَهَم.

¹⁹ اَرِیَگه باس‌یش چَن دسَه بیئِن اِنومتو بو تا کسَلی گه اِراسی ایمودارِن، شناسیا بوئن.

²⁰ وخدی هُمَه اِ دور یَک جیَمَ موئینو، اَرِه هُاردِن شُم خداون نیَ.

²¹ اَرِیَگه موقَع هُاردِن، هرکُم اژ هُمَه، اِجال یَگه چیَمَ‌رئی کسَلی‌تِر بو، شُم ووژَ میری، جوری گه یَکی وِرسِنیَ مَمینی ئو یَکی‌تِر مَسَ ماو.

²² یانی چَه؟ یانی مالی اَرِیَگه بیرینون ئو خُرّ دِینو نِرینو؟ یا یَگه کلیسا خدا خوارَ مَذانینو ئو کسَلی گه ژارِن خجالتا مِهِینو؟ چَه بوشم‌ئونتو؟ یانی تیَریف اَژینتو بِهَم؟ نه نِمَهَم.

²³ اَرِیَگه اَ چیئَه گه سپارتِمَس‌ئونتو، اژ خداونِم گِرتیَ گه عیسی خداون اِ شوئی گه اوُ داءَ گیر دشمن، نونِهَه گِرتی

²⁴ ئو هُنَ گه شگِر خدا مَهَردی، نونِهَه کُت کِردی ئو وِتی: «یَسَ لار مِه اَرِه هُمَه. یَه وَه یاء مِه بارِنَ جا.»

²⁵ هَرهُنَ، دُما شُم، پیاله‌ی گِرتی ئو وِتی: «ایی پیالَه، عتِ جدیدَ گه اِ خوین مِه رسمیَ ماو. هر گِلی گه اَژی خُرَّ مِینونی، وَه یاء مِه هُنَ بِهَن.»

²⁶ اَرِیَگه هر گِلی گه ایی نونَ میرینو ئو اژ ایی پیالَه خُرَّ مِینو، مِردِن خداون اِلومَ مِهِینو تا زمونی گه گِلابیری.

²⁷ اِسَه هر کی وَه جور نادُریسی نُو بیری ئو اژ پیالَه خداون عیسی خُرّ بِ، وَه لار ئو خوین خداون تصقیرکارَ ماو.

²⁸ اِسَه هر کی وِر اژ یَگه اژ نُو بیری ئو اژ پیالَه خُرّ بِ، ووژ اِنتحو کِ.

²⁹ اَرِیَگه هر کی بی‌یَگه لار خداون عیسی تشقیص بِ، اَژی بیرتی ئو خُرّ دِ، وَه هُنَ خُرّ دائِن ئو هُاردِنی ووژَ ماری‌ِ ژیر مکومیَت.

³⁰ اَژونَسَ بِری اژ هُمَه ضِیف ئو مریضِن ئو بِریشی مِردِنَ.

³¹ مِنتائای اَرّ، وَه ووژمو حکممونَ مَهَرد، وَه ایمَه حکِم نِموئیا.

³² مِنتائای موقِی گه خداون حکمَ مِهِه اَرینمو، اَدومونَ مِهِه تاگَه وَه‌گَرد دنیا مَکوم نوئیم.

³³ اِسَه بِرال، موقِی گه اَرِه هُاردِن شُم خداون جیَمَ موئینون‌ِ دور یَک، چیَمَ‌رئی یَکتِری بِمینِن.

³⁴ اَرّ کسی وِرسِنیَسی، اِنوم مال ووژ چیئی بیری تاگَه اِ دور یَک جیَم بیئِنتو، هُمَه مَکوم نِهِه. اِبارَه چیئَلی‌تِریش وخدی یِهاتم‌ اَرِه تَکتو، موشِم‌ئونتو.