اول قرنتیان 10 - کتاب مقدس به زبان لکی - گویش مرکزی

خطر بِت‌پِرَسی

¹ اَرِیَگه بِرال، نِمِم اژ یَه خافل بوئینو گه باوَه‌جدَلمو کُل اِژیر سا اُر بین ئو کُل اژ نومجا دریا رد بین.

² ئو اونَ کُل اِنوم اُر ئو اِنوم دریا تیَمیدو گِرت، ئو هُنَ نشونو دا گه مِرید موسیِ پِخَمَرِن،

³ ئو کُل هَراَ خوراک روحانیونَ هُارد،

⁴ ئو کُل هَراَ آو روحانیونَ خُرّ دا؛ اَرِیَگه اژ اَ کمر روحانیَ خُرّو دا گه وَه دُم اُوُنا ماهات ئو اَ کمرَ مسیح بی.

⁵ وَه ایی حالا، خدا اژ ویشتِرو راضی نوئی، اَژونَبیَ گه لَشَلو اِنوم بیاوو نابود بی.

⁶ اِسَه، ایی چیئِلَ اتفاق کَت تاگَه اَرِه ایمَه عبرتی بو تا ایمِه‌یش اِجور اونَ وَه تَما گَنی نوئیمو.

⁷ ایلَهَه اِجور بِری اژ اونَل بِت‌پِرَس نوئن؛ هُنَ گه اِ تورات نُیسیاءَ: «قوم یهود نیشتِنَ هُاردِن ئو خُرّ دائِن ئو هیزو گِرت اَرِه عِیاشی.»

⁸ ایمَه نَباس بی‌عفتی بِهِیم، هُنَ گه بِری اژ اونَل کِردو ئو وَه یِه روژ بیس ئو سه هزار نفر مِردِن.

⁹ ایمَه نَباس مسیح اِنتحو بِهِیم، هُنَ گه بِری اژ اونَل ایی کارونَ کِرد ئو مارَل دائونَ بینونا ئو اژ بِن چِن.

¹⁰ گِلِی‌یش نَهَن، هَراَ جورَ گه بِری اَژینو هُنِئونَ کِرد ئو وَه دس فریشدَه مرگ نابود بین.

¹¹ ایی اتفاقِلَ اَرِه نمونَه وَه سرو هات ئو نُیسیا تا اَرِه ایمَه گه هایمِ زمونی گه آخِر زمونَ، درس عبرتی بو.

¹² اِسَه اَوَه گه گُمونَ مِهِه پایارَ، حُواس بوتی گه نَکُوءِ!

¹³ هُیچ اِنتحونی نِهاتیَس اَر سرتو گه اَرسر باقی آمَل نِهاتوئی. خدا اَمونتدارَ؛ او نِمِیلی ویشتِر اژ قویَتتو اِنتحو بوئینو، بلکِم وَه‌گَرد اِنتحونی گه موئینو، رئی اَرِه حِواین‌یش جورَ مِهِه، تاگَه بتونینو طاخَت بارینو.

جَشت بِتَل ئو شُم خداون

¹⁴ اِسَه اِاِ عزیزَل، اژ بِت‌پِرَسی بِحوان.

¹⁵ دیرِم وَه‌گَرد کسَلی گه مَفیَمِن قصَه مَهَم؛ اِبارَه چیئَلی گه موشِم، ووژتو قضاوت بِهَن.

¹⁶ اَ پیالَه بِرَکتی گه وَه خاطری شُگِرَ مِهِیم، مَر هُم‌بیَر بیئِن اِ خوین مسیح نیَ؟ اَ نونی گه کُتَ مِهِیم، مَر هُم‌بیَر بیئِن اِ لار مسیح نیَ؟

¹⁷ اَژونَسَ یِه نُو هَس، کُل ایمِه‌یش گه اِنوم هَراَ نونَ هُم‌بیَرَ موئیم، یَکی کیم.

¹⁸ قوم یهود بارِن اَر وَر چیَمتو: مَر کسَلی نوئین گه اژ قُرونیَلونی مَهُارد گه اَررُی قُرونی‌گا بین؟

¹⁹ اِسَه مصقودِم چیَ؟ یَگه خوراک پیشکَشی اَر بِتَل چیئی کَ، یا بِت چیئی کَ؟

²⁰ نه، مصقود یَسَ گه قُرونی بِت‌پِرَسَل پیشکَشَ ماو اَر مِلاکَتَل نه وَه خدا ئو مِه نِمِم گه هُمَه هُم‌بیَر مِلاکَتَل بوئینو.

²¹ نِمَتونینو هم اژ پیالَه خداون خُرّ بِینو ئو هم اژ پیالَه مِلاکَتَل؛ نِمَتونینو هم اژ سِفِرَه خداون بیَرتو داشدوئی، هم اژ سِفِرَه مِلاکَتَل.

²² یانی ایمَه میا خداون باریم‌ِ سر خیرَت؟ یانی اژ او زوردارتِریم؟

²³ «شرعاً صِلا کُل چی هَس» -مِنتائای کُل چی فادَه نِری. «شرعاً صِلا کُل چی هَس»- مِنتائای کُل چی بِنا نِمِهِه.

²⁴ هُیچ کس وَه مِنِی خِر ووژا ناو، بلکِم خِر بِرَستی اَر هُمسا.

²⁵ هر گوشدی گه اِنوم قَصاویَ مَفِروشِن، اژ رُی وِژدان هُیچ سؤالی نَهَن ئو بیرِن.

²⁶ اَرِیَگه «زَمی ئو هر چیئی گه هایت اِنوم، هِن خداونَ.»

²⁷ اَرّ یَکی اژ آمَل بی‌ایمو اَرِه شُم دَوَت اَژینتو گِرتی ئو هُمِه‌یش دوستو داشد بِچینو، بِچِن ئو هر چی نا اَر وَرتو اژ رُی وِژدان هُیچ نَپِرسِن ئو بیرِن.

²⁸ مِنتائای اَرّ کسی بوشی‌ئونتو: «ایی گوشدَ پیشکَشی بیَس اَر بِتَل.» اَسَه فَخَد وَه خاطر کسی گه یَه وِتی‌ئونتو ئو وَه خاطر وِژدان، دیَر اژ اَوَه نیرِن-

²⁹ مصقودِم وِژدان اَ آمَسَ، نه وِژدان هُمَه. اَرِیَگه اَرّا باس وِژدان کسی‌تِر مَیِّن کِ آزادی مِه تا کوءَ؟

³⁰ اَرّ خوراکی وَه شگِر کِردِنَ میرِم، اَرّا باس وَه خاطر اَوَه گه اَرِنی خدا شُگِرَ مَهَم، مَکومِم کَن؟

³¹ اِسَه، چه هُاردِن چه خُرّ دائِن، یا هر کاری‌تِر گه مِهِینو، کُل اَرِه جِلال خدا بِهَن.

³² هُیچ‌کس نَرَنجِنِن، چه یهودیَل، چه یونانیَل ئو چه کلیسا خدا،

³³ هَراَ جورَ گه مِن‌یش تقِلاءَ مَهَم تاگَه کُل کس اژ کُل چی راضی بِهَم. اَرِیَگه وَه مِنِی نفع ووژِم نیِم، بلکِم هامَ دُم نفع آمَل فِرِه، تاگَه نجاد بِگِرِن.