ཏི༌ཏུས༌ 1 - New Testament in Ladakhi Langage

حضرت پولُسی چھوگسنے سلام۔

¹ ای ایگیبو نگا حضرت پولُسی چھوگسنے این۔ نگا نی خُدے جابستوگپا تانگ حضرت عیسیٰ مسیح رسُول این۔ خُدے لدامّا زادکھانگونلا، مسیح نانّگا ایمان چوچیسپو شادچیس تانگ، خُدے سچودلامیکا ڈولین میتشے پھودچیسّی لدینبابو، شیشیس لابّالا نگا لامچوگس۔

² ای لدینبابوے کھونگونلا تھامیدپے میتشے یودکھانّی لوکھیل تانّگانوگ، کا بو زون ماسالکھانّی خُدے دُنیا زادّی سانگ سنگونلا وعدہ زادتے اینپین۔

³ تا لدامّا زادکھانّی توسپویکا، نگے تشانگمالا چھوسشادچیس گیُودتے کھونگی ای لونبو سنگون چوگتے اینوگ۔ خُدے نگاتانگی کھوم چُوکھانی کا سالکھان نانگجینلا، کھونگرانگی پھیا ای لاسپو نگے لاگا ستادا زادس۔

⁴ نگاتانگونّی ایمانی نانّگا، نگے لدینبے بُوژا ژوگس اینکھانّی چیسپے فونو ، طِطُسا ڈِیاد۔ خُدے یاب تانگ نگاتی کھوم چُوک کھن حضرت عیسیٰ مسیح نیسکوے کھیورانّگا شزدے تانگ جیدے سالشیگ۔

ٹیتی نانّگا تیتوسّی ژابستوگّون۔

⁵ کھیرانگی نگاتانگونّی لاسگون ڈوبچوگچیس تانگ نگے لابجا نانگجین، ڈونگکھیر ریریے نانّگا اُسکیونگون سکوچیسّی گیونتشانبوے پھیا، نگے کھیرانگ کریتے نانّگا بورپین۔

⁶ اُسکیونگون سکیونمید تانگ کھورانگی ناما نیامپو ایمان چان یونگّوس۔ یانگ کھونگی ٹھوگوگون ایمان چان، یانگ سچودلام نگانپا تانگ کھامینیان یودکھانّی سکیون ماپھوگکھان ریگ یونگّوس۔

⁷ خُدے چھاگلاس گُون اُسکیونگونی لاگا ستاد پاسانگ، کھونگی میتشیبو سکیونمیدکھانجیگ یونگّوس۔ کھونگ پھوسوچان یا ثودونگچان، کھونگ چھانگ مانگپو تھونگکھان، ثوے نانّگا نودسکیالکھان یا پینے پھیا دودپاچان یونگ ماگوس۔

⁸ تھادپو نیامپو کھوے کھانگپا یونگکھانگونلا گاسوس جوکھان، یانگ زانگپو لاسگونلا کھوے چیسپا چوگوس۔ کھوے میتشیبو شیسرابسّی نانّگا پھودگوس، یانگ تھاگچادگون چھوگریس میدپا چوگوس۔ کھوے میتشیبو ہلژخمہ تانگ، رانگسیمس چونتے بورنیانکھانجیگ یونگّوس۔

⁹ لابکھانّی ایمان چانّی لونّیکا کھوا ماثانٹے ایمان یونگّوس، تینے کھوے جانماگونلا لدینبے لابجا نیامپو سپوسپا سکییچوگ نیانین، یانگ تیبوے گیابگال چوکھانگونلا نورتے اینکھانبو ستان تھوبین۔

¹⁰ نگولوگ چوکھانّی می مانگپوجیگ یودتے اینوگ، کاگون پھانمیتھوگسّی سپیرے نانّگا ڈِیستے جانماگونلا گوبسکورّاد، میگسالّی تھارپا تھوبچیسلا، بُوژا گُونلا لقپہ ہلژخمہ چوگوس زیرکھانگون۔

¹¹ کھیرانگی کھونگونلا تیتسوگس زیرچیسنے گھاگّوس، چیازیرنا تیگونّی زوسمے لابجاگونّی، نانگتشانگس گانگپو لدینبے لابجاگونّے تھاگرینّگا ٹھیدتے کھیرّانوگ۔ یانگ کھونگونی تیبو کھورانگونّی پھانتھوگسّی پھیا چوانوگ۔

¹² ایبو نی، کھورانگونّی ٹونے پیغمبر چیگی، ”کریتے پا گون زونجان، کھیی ژوگس تانگ لاسمیلام ڈودنابسچان“ زیرستے اینوگ۔

¹³ کھوے زیرکھانبو ٹانگپو اینپا، ایمانی نانّگا ستانپو لوسشیسّی پھیا، کھیرانگی تیتسوگسی فونو گونلا ماثانٹے کھاسکییتے سکیونگّوس۔

¹⁴ تیگونّی، یہُودی پے زوسمے رومس تانگ ڈانگپوا گیاب لوگستے چھاکھانگونّی کاگونلا نیان ماگوس۔

¹⁵ سیمس لاگمو یودکھانگونّی پھیا چیتشانگما ژانگما اینوگ۔ اِین نانگ سنینگی نانّگا ژانگما میدکھان تانگ، حضرت عیسیٰ سی یکا ایمان ماچوکھانگونّی پھیا چیشیگّانگ ژانگما میدپا اینوگ، چیازیرنا کھونگونی سامتشول تانگ سیمس گُون نگانپا یودتے اینوگ۔

¹⁶ تیتسوگسی میگونّی زیرّانوگ، کھونگونی خُدے شیسّاد۔ اِین نانگ تیگونّی لاسگون چو تشولّا ستانّا، کھونگی ستینگرانگنے ماڈولکھانبو، شیسدوگ۔ تیگون ناپھرادچان تانگ کھامینیان یانگ کھونگونلا چانگ لاس زانگپو چونیانّا مانوگ۔