རོམ༌པ༌ 9 - New Testament in Ladakhi Langage

لدامّا زادکھان بنی اِسرائیل پاگون۔

¹ نگے زیرکھانبو ٹانگپو یانگ زون تانگستے مانکھانبوے گواہ مسیحا این۔ نگے سیمس تانگ ہلژخمہ رُوح بوے تیبو تانتان چوانوگ۔

^2-3 یہُودی پے فونو ، نگارانگی میگونّی پھیا نگے سنینگبو ردوگنگال چھینمو تانگ تھامیدپے تشیرکھے گنگستے راگ۔ کالتیس مسیحا نیامپو نگے ڈیل چھادتے نگا توسگیونّی پھیا نگان پھوگچیسپوے، کھونگون سکیوبتھوبّادنا، نگا تیگون لینچیسلا تھادّاراگ۔

⁴ کھونگون بنی اِسرائیل پا، خُدے سوسبوا لدامّا زادکھانّی ٹھوگوگون اینوگ۔ خُدے شان پو کھونگونلا سنگون چوگّا زادس، یانگ کھونگون نیامپو وعدہ چوا زادتے تیگونلا کھونگرانگی شریعت سالّا زادس۔ خُدے کھونگونلا کھونگی معجزہ وعدہ گون تھوبچیس تانگ کھونّگا چولچیسّی سیوا سالّا زادس۔

⁵ حضرت اِبراہیم، حضرت اِضحاقؔ تانگ، حضرت یعقُوبؔ گُون، کھونگونی اتا اپو اینوگ۔ مسیحا میی تشولّا لتامس زانے، کھونگ بنی اِسرائیل پاجیگ جُوگستے اینپین۔ یانگ کھونگ نی خُدے جُوگستے اینوگ۔ کھونگ نی چیتشانگمیکا وانگثول زادکھان تانگ توسگیون ستودپا تھوبچیسّی اوسپا اینوگ، امین۔

⁶ تینے چیا؟ خُدے بنی اِسرائیل پاگونلا زادکھانّی وعدہ بو ڈانڈا ماڈوبّا اینّوگا؟ مانے مانوگ۔ بنی اِسرائیلی یولّا سکییسکھانگونّی نانگنیانگ تشانگما، خُدے میگونّی نانّگا تھیا مازادس۔

⁷ حضرت اِبراہیم اولاد اینکھانگونّی نانگنیانگ تشانگما، حضرت اِبراہیم لدینبے ٹھوگو مانوگ، چیاجونا ہلژخمہ شوقبُو بوے نانّگا مولتے اینوگ، ”حضرت اِضحاقؔ نی تینّا بُوژا بُو این، کا بو گیُودتے کھیرانگی اولاد گون چونگین۔“

⁸ تیبوے تون نی، زوگسّی تھوگنے حضرت اِبراہیم اولاد گون خُدے ٹھوگو ماتھیا، وعدہ زادکھانّی اولاد گون، حضرت اِبراہیم ٹھوگو تھیا زادِین۔

⁹ چیازیرنا خُدے وعدہ زادس، ”ستینگما لو، ہالام اینّاتوسشیگّا نگا لوگستے یونگ زانے حضرت سارہ، بُوژا جیگ سکیستے یونگین۔“

¹⁰ ای بُوژا بُو نگاتانگونّی اتا اپو حضرت اِضحاقؔ اینپین۔ کھوے رابیکا ناما چوس یانگ رابیکا بُوژا تشاگٹوگ جور۔

¹¹ اِین نانگ کھونگون سکیے سانگ سنگونلا، یانگ کھونگونی زانگپو یا نگانپا چوے سانگ سنگونلا، رابیکا خُدے چھوگسنے لونجیگ تھوب۔ (ای لونبوے تون نی، خُدے میگون کھونگرانگی گیونتشانجیگی پھیا لدامّا زادس،

¹² کھونگی میگون بودّا زادس، اِین نانگ تیگونّی لاس زانگپو یا نگانپا گونّیکا راگلاستے مانوگ)۔ کھونگی رابیکا مولس، ” کھیرانگی بُوژا چھیابوے چھونّگابوا جابستوگ جوین۔“

¹³ تیزوگ ڈوبچیسلا شوقبُو بوے نانّگا مولتے اینوگ، ”نگے حضرت یعقُوبؔ ا چیسپا چواد اِین نانگ عیسو گیاب گیورّاد۔“

¹⁴ تینے نگاتانگونّی، خُدے میوسپْا زادکھانجیگ جُوگستے اینوگ زیرینّا؟ مانے مانوگ۔

¹⁵ خُدے حضرت مُوسیٰؔ مولّا زادس، ”نگے لدامکھانگونّیکا سنینگرجے ستانین، یانگ نگے لدامکھانگونّیکا چامسپا ستانین۔“

¹⁶ تینّابویپھیا تیبو می دودپا یا سونڈوسّیکا مانپا، خُدے سنینگرجے کا راگلاستے اینوگ۔

¹⁷ خُدے مصری گیالپو فرِعونؔ لا مولکھانبو شوقبُو بوے نانّگا ڈِیازادتے اینوگ، ” کھیرانگی نانّگا نگے شیدپو ستانچیس تانگ نگے مینگبو دُنیا گانگپوے نانّگا پھیلچوگچیسّی پھیا نگے کھیرانگ لدامستے این۔“

¹⁸ تینّابویپھیا خُدے سنینگرجے ستانچیسّی تھوگسدود یودکھانگونّیکا سنینگرجے ستانّا زادِین، یانگ کھونگی سنینگ سکیونگپو چوا زادچیسّی تھوگسدود یودکھانگونّی سنینگّون سکیونگپو زادِین۔

¹⁹ کھیوجاگونّی زیرثیدچیس اینوگ، ”سیمس گیورتے گیودپا ماچوکھانگونلا چیا خُدے سکیون کالا زادّانوگ؟ خُدے کھونگونلا چو چوگّا زادکھانبو کھونگونی چوستے مانوگا؟“

²⁰ اِین نانگ خُدے گیابگالّا سپیرا زیرکھان کھیرانگ می سو این؟ چوکھانبوے چوا زادکھانبوا زیرگوسّا، ”چیا نیرانگی نگا ایتسوگس چوا زادتے این؟“

²¹ دزاما چوکھانجیگی تینّا کالاگپوے کانے دزاما چیگ، سیواچانّی لاسلا کولچیس، یانگ چیگ جاگدانگی لاسلا کولچیسّی پھیا، چوچیسّی تھوبتانگ کھوا میدپا اینّوگا؟

²² تینّا تسوگسلا، جان خُدا کھونگرانگی تھوگسثو تانگ شیدپو ستانچیسّی تھوبتانگ یودنانگ، کھونگی تھوگسثو بابسشیس تانگ ٹھیسّتور چھاچیس چھوگسلا چھاکھانگونّیکا ماثانٹے زودپا گھومّا زادّانوگ۔

²³ کھونگی سنینگرجے ستانّا زادکھانگونّیکا کھونگی شزدے تسامشیگی گیاسپا اینکھانبو ستانچیسلا کھونگی تیبو چوا زادس۔ یانگ کھونگی تیگون سنگونّے پھارلا نامکھے نانّگا شان چانّی ناسّے پھیا ڈالڈیگ چوا زادتے اینپین۔

²⁴ کھونگی لدامّا زادکھانگونّی نانّگا نگاتانگونّانگ اینوگ، یہُودی پاگون چیگپوے پھیا مانپا یہُودی مانکھان گُونی پھیانگ اینوگ۔

²⁵ کازوگ یہُودی مانکھان گُونی سکورلا پیغمبر ہوشایی شوقبُوئ نانّگا خُدے مولّا زادس، ”نگے مانکھانّی میگونلا نگے نگارانگی می زیرین۔ یانگ نگے چیسپا ماچوکھانگونلا نگے چیسپا چوین۔“

²⁶ یانگ ”کھیرانگّون نگے میگون مان“ مولکھانّی تینّا ناسّابویکا کھونگونلا، ”سونپو خُدے ٹھوگوگون“ مولین۔

²⁷ یانگ بنی اِسرائیل پاگونّی سکورلا پیغمبر حضرت یسعیاہ کُوچو تانگین زیرس، ”جان بنی اِسرائیلی میگون تشوے تھاما یودکھانّی پیما ژوگس مانگپو یودتیانگ، کھاچیگ مانے میسکیوب۔

²⁸ چیازیرنا مسیح، کھونگرانگی چھادپابو ای دُنیائیکا گیوگسپا تانگ گانگپو کھیونگا زادِین۔“

²⁹ ہلژخمہ شوقبُو بوے جانیانگ ناسّاجیگی نانّگا حضرت یسعیاہ اینّا سپیرابو ڈِیازادتے اینوگ، ”کالتیس نامکھے ماگمیگونّی مسیح، نگاتی ٹھوگو نیونگونجیگ پھودّا مازادپینّا، تینے نگاتانگون سدُوؔم پا تسوگسلا میدکھان یانگ عمورہ پا تسوگسلا ٹھیسّتور چوا زادتے یودڈو۔“

ایمان میدکھانّی بنی اِسرائیل پاگون۔

³⁰ تے تشانگمے تونبو تینے چی اینوگ؟ جان یہُودی مانکھان گُونی، خُدے سکوندونلا ٹانگپو گیورچیسّی سونڈوس ماچونانگ، کھونگونی ایمان چوچیسپوے، خُدے سکوندونلا ٹانگپو گیور۔

³¹ اِین نانگ بنی اِسرائیل پاگونّی شریعت گون کھانیانتے خُدے سکوندونلا ٹانگپو گیورچیسّی ماثانٹے سونڈوس چونانگ، ٹھانگسپو مانے مالوس۔

³² چیا ٹھانگسپو مالوس؟ چیازیرنا کھونگونی ایمان مانپا، شریعت کھانیانتے لاس چوچیسپو گیُودتے، خُدے سکوندونلا ٹانگپو گیورچیسّی سونڈوس چوس۔ کھونگون کھونگرانگونّی لامیکا یودکھانّی ردوا چھینمویکا گھاگیابستے اینوگ۔

³³ خُدے یہُودی پاگونلا تیبوے سکورلا سپانگپودّا زادس، نام کھونگی ہلژخمہ شوقبُو بوے نانّگا مولس، نگے یروشالیمّی نانّگا میگونلا گھاگیاب چوگکھانّی ردواجیگ بورّاد، گییلچوگکھانّی پھولونگسجیگ۔ اِین نانگ کھونگی نانّگا ایمان چوکھانّی، ریوابو مانے چاگّا میزاد۔