རོམ༌པ༌ 8 - New Testament in Ladakhi Langage

ہلژخمہ رُوح بوے نانّگا میتشے پھودچیس۔

¹ تیبویپھیا تا حضرت عیسیٰ مسیح اینکھانگونلا شیچیسّی ٹھیمسچاد میدپا اینوگ۔

² چیازیرنا حضرت عیسیٰ مسیح گیُودتے، میتشے سالکھانّی رُوح بوے کھیود پوے کھیوجا، شیچیس چھوگسلا ٹھیدکھانّی دِیگپے وانگنے تھارچوگا زادس۔

³ نگاتانگونّی دِیگپے سچودپے، حضرت مُوسیٰؔ سی شریعت پو شوگسمید چوس پاسانگ، تا تے شریعت پوا نگاتانگون سکیوبچیسّی شوگسمیدپا اینوگ۔ تیبویپھیا ٹھیمسلا چو مانیانکھانبو خُدے زادس۔ نگاتانگ دِیگپاچانگونلا یودکھانّی زوگسپو تسوگسّی نانّگا کھونگی کھونگرانگی ثاسپو لامچوگا زادس۔ یانگ تینّا زوگسپوے نانّگا خُدے کھونگرانگی ثاسپو نگاتانگی دِیگپے پھیا قُربانلا پھولّا زادستے نگاتانگونّیکا دِیگپے وانگبو میدکھان چوا زادکھانبو ستانّا زادس۔

⁴ کھونگی تیبو چوا زادچیسّی گیونتشان نی، شریعتی اوسپے گھوسدومگون، دِیگپے سچودپے نانّگا میتشے ماپھودّا، رُوح بوے نانّگا میتشے پھودکھان نگاتانگونّی نانّگا، ڈانڈا ڈوبچیسپو اینوگ۔

⁵ دِیگپے سچودپے وانگی یوگا لوسکھانگونّی، توسگیون دِیگپے لاس چوین سامّانوگ۔ اِین نانگ ہلژخمہ رُوح بوے وانگی یوگا یودکھانگونّی، توسگیون رُوح تھوگنییسشیسّی لاس چوین سامّانوگ۔

⁶ دِیگپاچان میگونّی سامبابوے، شیچیس چھوگسلا ٹھیدّانوگ۔ اِین نانگ رُوح بوے وانگی یوگا یودکھانّی سامبابوے، میتشے تانگ جیدے چھوگسلا ٹھیدّانوگ۔

⁷ دِیگپے سچودپے توسگیون خُدے گیابگال چوانوگ، چیازیرنا تیبوے خُدے شریعت مانیانس، یانگ کھا مانے مینیان۔

⁸ تینّابویپھیا دِیگپے سچودپے وانگی یوگا دوگکھانگونّی، خُدے تھوگنییسچوگ مانے نیانّا مانوگ۔

⁹ کالتیس خُدے رُوح کھیوجے نانّگا جوگسّاد نا، کھیوجاگون دِیگپے سچودپے وانگی یوگا میدپا، رُوح بوے وانگی یوگا یودتے اینوگ۔ یانگ سوجیگی نانّگا مسیح رُوح مید، تے میبو مسیح مانوگ۔

¹⁰ مسیحا کھیوجاگونّی نانّگا جوگسانوگ، دِیگپے جاستے کھیوجا زوگسّی تھوگنے شیانوگ اِین نانگ ، رُوح بوے کھیوجا میتشے سالّانوگ، چیازیرنا کھیوجاگون خُدے سکوندونلا ٹانگپو چوا زادس۔

¹¹ حضرت عیسیٰ سی شیکھانگونّی ٹونے سونتیا ژانگشوگّا زادکھانّی خُدے رُوح کھیوجاگونّی نانّگا ناسّانوگ۔ یانگ کازوگ خُدے حضرت عیسیٰ مسیح شیکھانگونّی ٹونے سونتیا جانگشوگا زادس، کھیوجے نانّگا یودکھانّی تینّا رُوح بو گیُودتے، کھونگی، کھیوجے شیچیسچانّی زوگسپوانگ سروک سالّا زادِین۔

¹² تیبویپھیا نگے چیسپے فونو گون، کھیوجاگونلا دِیگپے سچودپے چوس زیرکھانبوا کھانیانگوس میدپا اینوگ۔

¹³ کالتیس کھیوجاگونّی تیبوے زیرکھان نانگجین میتشے پھودنا، کھیوجاگون شِین۔ اِین نانگ کالتیس ہلژخمہ رُوح بوے کھیود گیُودتے کھیوجے دِیگپے سچودپے لاسگون شیچوگنا، کھیوجاگونّی لدینبے میتشے پھودّانوگ۔

¹⁴ چیازیرنا خُدے رُوح بوے ٹھیدکھانگون خُدے ٹھوگو اینوگ۔

¹⁵ کھیوجاگونلا جیگسشیسّی تشیوگ گیورچوگکھانّی رُوح بو تھوبستے مانوگ۔ اِین نانگ خُدے، ٹھوگوی تشولّا سوسبوا لینّا زادکھانّی رُوح بو تھوبستے اینوگ۔ تا نگاتانگونّی کھونّگا ”ابا یابلے“ بودین۔

¹⁶ خُدے رُوح بوے، نگاتی رُوح نیامپو نگاتانگ خُدے ٹھوگو اینکھانبوے گواہ سالّانوگ۔

¹⁷ یانگ نگاتانگون کھونگی ٹھوگو این پاسانگ، کھونگی نورسکال لینکھان ماتشاد، مسیحا نیامپو خُدے شان، لینکھانبوانگ اینوگ۔ اِین نانگ کالتیس نگاتانگون کھونگی شان پوے نانّگا ڈیسّادنا، تینے نگاتانگون کھونگی ردوگنگالّی نانّگانگ ڈیسگوس۔

یونگچیسچانّی زیرّجید۔

¹⁸ داگسا نگاتانگونلا چونگکھانّی ردوگنگالبو، ستینگجین کھونگی نگاتانگونلا سالچیسچانّی شان نیامپو لدورنا، تینے تے ردوگنگالبو چانگ میدپا اینوگ۔

¹⁹ خُدے زادکھان تشانگما، کھونگی لدینبے ٹھوگوگون سنگون چوگّا زادچیسّی تے جاگپوا، رینگساینجیگ ثونگستے اینوگ۔

²⁰ میگونّی پھیا اینکھان خُدے نگانبو، کھونگی جانیانگ زادکھان تشانگمیکانگ پھوگ، کا بو تیگونّی دودپا مانپا تیگون زادکھان خُدے تھوگّونگس اینپین۔ اِین نانگ ریوا ثانٹے نیامپو

²¹ تے زادکھان تشانگمے یونگچیسچانّی جاگپوا ثونگس، نام تیگون خُدے ٹھوگوگون نیامپو، شیچیس تانگ رولچیس میدکھانّی، شان چانّی تھارپے نانّگا دزوماین۔

²² نگاتانّگا گیوس اینّوگ، زادکھان تشانگما داگسا تشوگپانگ، ٹھوگو سکیے زانے سکییزیر یونّگا تسوگسلا باردو چونگین اینوگ۔

²³ یانگ ہلژخمہ رُوح کا بو یونگچیسچانّی برکت گانگپوے کھاگشیگ این، تیبو تھوبکھان نگادانگونّیانگ باردو کھورین تے جاگپوا رینگسین ثونّگانوگ۔ یانگ خُدے سوسبوا لینّا زادکھانّی ٹھوگوگون تسوگسلا، کھونگی نگاتانّگا تھوبتانگ گانگپو سالچیس، ماتشاد زوگسپو سوماجیگی وعدہ زادکھانّی جاگپوے پھیا ریوا ثانٹے نیامپو ثونّگانوگ۔

²⁴ نگاتانگون سکیوبّا زاد زانے، نگاتانگونلا تے ریوابو سالّا زادس۔ (کالتیس ریوا بورکھانبو نگاتی لاگا یودپینّا، تینے نگاتانگونلا تیبویپھیا ریوا چوگوس میدپا اینوگ۔

²⁵ اِین نانگ کالتیس نگاتانگونّی داگسا نگاتی لاگا میدکھانبوے ریوا چوادنا، نگاتانگونّی تیبوا زودپا تانگ لوکھیل نیامپو ثونگّوس)۔

²⁶ یانگ نگاتانگونّی وتھوگسّی نانّگا، ہلژخمہ رُوح بوے نگاتانگونلا روگس چوا زادّانوگ۔ سپیرنا، خُدے تھوگّونگس نانگجین نگاتانگی دُعا کازوگشیگ یونگّوشیسپو نگاتانگونلا گیُوس میدپا اینوگ۔ اِین نانگ ہلژخمہ رُوح بوے، نگاتانگونّی پھیا سنیینگشوگس نیامپو دُعا پھولّانوگ، کا بو نگاتانّگا تشیگس کولتے شاد مانیانّا اینوگ۔

²⁷ یانگ سنینگ تشانگما کھیینّا زادکھانّی یابّی، رُوح بوے مولکھانبوانگ کھیینّا زادّانوگ۔ چیاجونا رُوح بوے، خُدا نگاتانگ ایمان چانگونّی پھیا کھونگی تھوگّونگس نانگجینلا جُووا پھولّا زادّانوگ۔

²⁸ خُدا چیسپا چوکھان تانگ کھونگی گیونتشان ڈوبچیسلا بودّا زادکھان نگاتانگونّی پھانتھوگسّی پھیا، کھونگی نگاتانگونّی میتشیے نانّگا جونگکھان تشانگما کولّا زادچیسپو، نگاتانگونلا گیوس اینّوگ۔

²⁹ خُدے کھونگرانگی میگون گوزوگنے پھارلا کھیینّا زادّادپین۔ یانگ کھونگی ثاسپو فونو مانگپوے ٹونے تشانگمیسانگ ٹاگشوگپو گیورچوگّا زادچیسّی پھیا، کھونگی تیگون کھونگرانگی بُوژا ژوگس گیورچیسلا لدامّا زادس۔

³⁰ یانگ لدامّا زادکھان گُون، کھونگرانگ یودسا بودّانگ زادس۔ یانگ بودّا زادکھان گُون، کھونگرانگی سکوندونلا ڈانگپوانگ چوا زادس۔ یانگ ٹانگپو چوا زادکھان گُون نیامپو کھونگرانگی شان بوانگ گوازادس۔

خُدے چیسپا۔

³¹ تے معجزہ برکت گونّی سکورلا تا نگاتانگونّی چی زیرگوس؟ کالتیس خُدے نگاتانگونّی چھوگسلا اینّا، تینے نگاتانگونّی گیابگالّا سُوا گیال تھوبین۔

³² خُدے کھونگی اوت پوانگ ماپھودّا، نگاتانگ تشانگمے تونلا سالّا زادس۔ تینے چیا کھونگی نگاتانگونلا یانگ گھوسدوم تشانگما سالّا میزادّا؟

³³ خُدے لدامّا زادکھان نگاتانگونّی گیابگالّا سکیون سُوا کالنیانین؟ خُدے نگاتانگون کھونگرانگی سکوندونلا ٹانگپو چوا زادس۔

³⁴ تینے سوی نگاتانگون شیچیسلا اوسپا اینکھانبوے ٹھیمسچاد تانگین؟ سوجیگیانگ می تانگ، چیاجونا حضرت عیسیٰ مسیح نگاتانگونّی تونلا ٹونگستے، سونتیا جانگسّا زادس۔ یانگ کھونگی خُدے چھاگ یاسپے سیواچانّی ژوگسٹھیسّیکا جُوگستے نگاتانگونّی پھیا دُعا پھولّانوگ۔

³⁵ تینے سوی نگاتانگون مسیح چیسپانے پھینیانین؟ ناگس، کاگسپو، ردوگنگال، موگے، لجیرنیال، جیگسپا یا، رایَ کانے شیچیس۔

³⁶ ہلژخمہ شوقبُو بوے نانّگا گیالپو داؤد ّی مولتے اینوگ، ”نیرانگی پھیا نگاجا گُون جاگدانگ سادّوگ۔ نگاجا گُون لُوگ تسوگسلا سکیے چادتے سادّوگ۔“

³⁷ مینیان، نگاتانگون مسیح چیسپانے مانے پھیمینیان۔ نگاتانّگا چیسپا زادکھان مسیحا گیُودتے، تے تشانگمے نانّگا نگاتانگون گیالکھا تھوبکھانّی سانگ ٹاگاجیگ اینوگ۔

³⁸ نگا تانتان لوکھیل راگ، ای وانگونّی نگاتانگ خُدے چیسپانے پھیمینیان۔ سپیرنا، شیچیس یا میتشیے، فرشتاگون یا ردودگونّی، ایتوس یا یونگچیسچانّی توسّی، یا شید، یا تھونپو، یا نیالوے،

³⁹ نامی نانّگا یودکھان یا سے یوگا، تانتانلا خُدے زادکھان تشانگمے نانگنے چیگیانگ نگاتانگون خُدے چیسپانے پھیمینیان، کا بو نگاتانگونّی حضرت عیسیٰ مسیح گیُودتے سنگون چوگّا زادتے اینوگ۔