རོམ༌པ༌ 5 - New Testament in Ladakhi Langage

ایمانی، تھادپو کھیونّگانوگ۔

¹ تا نگاتانگون خُدے سکوندونلا ایمانی جاستے ٹانگپو تھیا زادپا، نگاتانگی حضرت عیسیٰ مسیح ا گیُودتے، نگاتانگونلا خُدے نیامپو جیدے یودتے اینوگ۔

² نگاتانگونّی ایمانی جاستے مسیح نگاتانگونلا اوسپا میدکھانّی تے ناسّابوے نانّگا دوگچیسلا کھیونگا زادس۔ یانگ نگاتانگون لوکھیل تانگ تھادپو نیامپو خُدے شان پوے نانّگا ڈیس تھوبین۔

³ تینانّگا ماتشاد، نگاتانگونّی ناگسباردوے نانّگانگ ستودپا پھولّانوگ، چیازیرنا نگاتانّگا گیوس اینّوگ ناگسباردوے زودسیمس سکیچوگچیس،

⁴ زودسیمسّی سچودلام زانگپو لدانچوگچیس، یانگ سچودلام زانگپوے نگاتانگونلا تھارپے ریواے لوکھیل تانّگانوگ۔

⁵ یانگ ای ریوا یودچیسپوے نگاتانگونّی سپوسپا چھاگّا مانوگ، چیازیرنا خُدے نگاتانگونّی رُوح بو نگاتانّگا سالکھانّی ہلژخمہ رُوح گیُودتے، کھونگرانگی یاشے سکانّگا زادتے اینوگ۔

⁶ خُدے لدامّا زادکھانّی توسپویکا، نگاتانگونّی ستوبس تشارتے نگاتانگونّی نانّگا کھیودمید زانے، مسیحا نگاتانگ دِیگپاچانگون پھیا ڈونگسّا زادس۔

⁷ می مانگچھیاگون میڈانگپوجیگی لدُونلا شیا مانوگ، چیپاتا چیگ چیگ یودڈو کابوے نگا می زانگپوے لدُونلا شی نیانچیسراگ زیرثیداین۔

⁸ اِین نانگ نگاتانگون دِیگپاچان این زانے، خُدے مسیحا نگاتانگونّی تونلا ڈونگسّا لامچوگا زادتے، کھونگی نگاتانّگا چیسپا چھینمو زادکھانبو ستانّا زادس۔

⁹ یانگ مسیح سکو ٹھاق گیُودتے، نگاتانگون خُدے سکوندونلا ٹانگپو زاد پاسانگ، کھونگی نگاتانگون تانتان خُدے تھوگسثوے کانے سکیوبچیسپوا لوکھیل یونگّوس۔

¹⁰ نگاتانگون خُدے ڈاو این زانے، کھونگرانگی بُوژا ٹونگشیسپو گیُودتے، کھونگی نگاتانگون کھونگ نیامپو تھونڈیل زادس۔ تینّا تھونڈیلبوے، کھونگرانگی بُوژے سروک گیُودتے، کھونگی نگاتانگون سکیوبّا زادچیسپوا لوکھیل ثانٹے راگ۔

¹¹ تا نگاتانگونّی خُدے نیامپو ڈیل سومابوے نانّگا گامو چوین، چیازیرنا نگاتانگی حضرت عیسیٰ مسیح گیُودتے، نگاتانگون خُدے دزاو گیور چوگّا زادس۔

حضرت آدم تانگ مسیحا۔

¹² نام حضرت آدم می دِیگپا چوس، تے می چیگپو گیُودتے دُنیائی نانّگا دِیگپا گوزوگس۔ حضرت آدم می دِیگپے شیچیس کھیونگسپا، شیچیسپو میتشانگمیکا پھیل، چیازیرنا می تشانگمے دِیگپا چوس۔

¹³ شریعت تھوبّی سانگ سنگونلانگ دِیگپا دُنیائی نانّگا یودپین۔ اِین نانگ تیبو دِیگپا تھیا مازادس، چیازیرنا تےتےتشوگپا چاگچیسلا ٹھیمسشیگ مانے میدپین۔

¹⁴ اِین نانگ حضرت آدم می توسنے تانگستے حضرت مُوسیٰؔ سی توس تشوگپا، میگونّی حضرت آدم تسوگسلا حکم چاگستے دِیگپا ماچونانگ، کھونگون شی۔ حضرت آدم نی سکیودچیسچانبوے، ستاگس پو اینپین۔

¹⁵ اِین نانگ حضرت آدم می دِیگپا تانگ خُدے شزدے پوے نانّگا ماکھیادپار چھینموجیگ یودتے اینوگ، چیازیرنا حضرت آدم، ای می چیگپوے دِیگپے، مانگپوجیگیکا شیچیس کھیونگس۔ اِین نانگ تیسانگ ٹاگپو نی خُدے معجزہ شزدے تانگ مانگپوجیگّا شاگسپوے شزدے پو اینپین، کا بو می نیسپا حضرت عیسیٰ سی مسیحا، گیُودتے سالس۔

¹⁶ یانگ خُدے شزدے پوے ڈاسبو نی، تے می چیگپوے دِیگپے ڈاسبو دانگتسوگس میدپا اینوگ۔ حضرت آدم می دِیگپے جاستے خُدے شیچیسّی چھادپے ٹھیمسچاد سالس۔ اِین نانگ خُدے رین ماشالکھانّی شزدے پوے، نگاتانگونّیکا دِیگپا مانگپوے سکیون یودنانگ، خُدے سکوندونلا ٹانگپو چوچیسلا ٹھیدّانوگ۔

¹⁷ ای حضرت آدم، می چیگپوے دِیگپے جاستے شیچیسّی وانگ می مانگپوجیگیکا ثولس۔ اِین نانگ حضرت عیسیٰ سی مسیحا، می چیگپو گیُودتے، خُدے معجزہ شزدے تانگ ٹانگپو گیورچیسّی شزدے تھوبکھان تشانگمے نانّگا تسامشیگی مانّگا ٹاگپو وانگ میثول۔

¹⁸ اونا، حضرت آدم می دِیگپا چیگ چیگپوے، میتشانگمیکا شیچیسّی چھادپا پھوگ۔ اِین نانگ مسیح چھاگلاس ٹانگپو چیگ چیگی، خُدے سکوندونلا ٹانگپو چوا زادتے میتشانگمالا میتشیے سوماجیگ سالّا زادس۔

¹⁹ می چیگ ای خُدے کھا مینیانچیسپوے، مانگپوجیگ دِیگپاچان گیورچوگس۔ اِین نانگ جانیانگ می چیگی خُدے کھانیانچیسپوے، مانگپوجیگ می ٹانگپو گیور چوگّا زادِین۔

²⁰ میگون تسامشیگ دِیگپاچان اینکھانبو ستانچیسّی پھیا خُدے شریعت پو سالّا زادس۔ اِین نانگ شریعت دیکا دِیگپا نگانپا اینکھانبو مانّگا سالپو چوادنانگ، خُدے معجزہ شزدے بو تیسانگ مانّگا ٹاگا اینوگ۔

²¹ کازوگ دِیگپے میتشانگمیکا وانگثولتے شیچیسپو کھیونگس، تیبوے تشابسلا خُدے معجزہ شزدے سو لراسپوے وانگثولّا زادتے، نگاتانگونّی حضرت عیسیٰ مسیح ا گیُودتے، خُدے سکوندونلا نگاتانگون ٹانگپو چوا زادِین۔ یانگ نگاتانگونلا تھامیدپے میتشے چھوگسلا ٹھیدّا زادِین۔