རོམ༌པ༌ 15 - New Testament in Ladakhi Langage

جانمے پھانتھوگسّی پھیا میتشے پھود۔

¹ نگاتانگ ایمانی نانّگا شوگسچان یودکھانگونّی، نگادانگرانگون تھادچوگچیس مانپا، ایمانی نانّگا اُتھوکس یودکھانگونّی گھوسدومی سکورلا سامبا تانگّوشیس اینوگ۔

² نگاتانگونّی جان فونو گونّی پھانتھوگسّی پھیا روگس چوستے کھونگون مسیحا ایمان چوچیسّی نانّگا لدانچوگّوس۔

³ ایدتو چوشیگّانگ، مسیحا نگ کھونگرانگ تھادچوگچیسلا میتشے پھودّا مازادس۔ کازوگ ہلژخمہ شوقبُو بوے نانّگا مولتے اینوگ، ”تے تشیگس، کاگون خُدا تامنگان تانّگا کولس، تیگون نگیکا بابستے اینوگ۔“

⁴ نگاتانگونلا لابچیسّی پھیا تے تشانگما ہلژخمہ شوقبُو بوے نانّگا ڈِیازادتے اینوگ۔ خُدے وعدہ گون ڈوبچیسلا نگاتانگ زودپا نیامپو ثونگستے یود زانے، ہلژخمہ شوقبُو بوے نگاتانّگا ریوا تانگ سپوسپا تانّگانوگ۔

⁵ سنینگروس تانگ سپوسپا سالّا زادکھانّی تینّا خُدابوے کھیوجاگون چیگ تانگ چیگ نیامپو تھونتے دوگچیسلا روگس زادشیگ، کازوگ حضرت عیسیٰ مسیح گیابنے ڈولکھانگون یونگّوشیس اینوگ۔

⁶ تینے کھیوجا تشانگما چیگڈیل سونگتے سکادچیگی نانّگا نگاتانگونّی حضرت عیسیٰ مسیح یاب خُدا ستودپا تانگ سپال گُون پھول نیانین۔

⁷ مسیح کھیوجاگونلا گاسوس جوا تسوگسلا، خُدے سپالّی پھیا کھیوجاگونّی فونو تشانگما یاپھیس میدپا گاسوس جوشیگ۔

⁸ ایدتو چوشیگ، خُدے اتا اپو گونلا وعدہ زادکھانبوے نانّگا ایمان چان جُوگستے اینکھانبو ستانّا زادچیسلا، مسیحا لقپہ ہلژخمہ چھوکن گونّی ژابستوگپاجیگی تشولّا سکیودّا زادس۔

⁹ یہُودی مانکھان گُونلا سنینگرجے زادچیسپوا کھونگ یانگ خُدا سپال پھولین۔ کازوگ ہلژخمہ شوقبُو بوے نانّگا ڈِیازادتے اینوگ، ”تیبویپھیا، نگے نیرانّگا یہُودی مانکھان گُونی ٹوا ستودپا پھولین۔ نگے نیرانگی ژانلا ستودپے لو پھولین ۔“

¹⁰ ہلژخمہ شوقبُو بوے جان ناسّاجیگیکا مولتے دوگ۔ ”یہُودی مانکھان، کھیوجاگونّی کھونگی میگون نیامپو گامو چوشیگ۔“

¹¹ یانگ جان ناسّاجیگیکا مولتے دوگ۔ ”کھیوجا یہُودی مانکھان تشانگمے مسیحا ستودپا پھولشیگ۔ یانگ دُنیائی می تشانگمے کھونّگا ستودپا پھولشیگ۔“

¹² یانگ جان ناسّاجیگیکا پیغمبر حضرت یسعیاہ مولس، ”یسّی ٹھیس نورسکالّا تھوبچیسچانبو سکیودین یانگ کھونگی یہُودی مانکھان گونّیکا وانگثولین۔ تیگونّی کھونگی کا ریوابو بورین۔“

¹³ ریوا سالکھانّی خُدے کھیوجاگونّی نانّگا گامو تانگ جیدے سکانّگا زادشیگ، چیازیرنا کھیوجے کھونگی کا ایمان چوس۔ تینے ہلژخمہ رُوح یَ شید گیُودتے، کھیوجاگونّی نانّگا ریوابو لودتے چھین۔

حضرت پولُسی ڈِیازادچیسّی گیونتشان۔

¹⁴ نگے چیسپے فونو، کھیوجاگون زانگپوے گنگستے یودکھانبویکا نگا تانتانلا لوکھیل راگ۔ کھیوجاگونلا تیگون ما گیالّا چوستے شیس پاسانگ، کھیوجاگونّی چیگ تانگ چیگّا تیبوے سکورلا لابنیانین۔

¹⁵ تینیانگ کھیوجا ایدتو سکولچیسّی پھیا، نگے سپیرا کھاچیگی سکورلا ما ہامپا نیامپو ڈِیستے این۔ چیاجونا خُدے شزدے گیُودتے

¹⁶ نگا، حضرت عیسیٰ مسیح جابستوگپا کھیوجا یہُودی مانکھان گُونی پھیا اِمام ژوکسلا ہلژخمہ لون کھیونگکھان بو این۔ کھیوجاگون، خُدے تھوگستھادّا زادکھانّی چھودپا تھیا زادچیسلا گاموےناتسُولبو کھیونگسپین، کاگون ہلژخمہ رُوح گیُودتے ہلژخمہ چوا زادتے این۔

¹⁷ خُدے جابستوگی نانّگا حضرت عیسیٰ سی مسیح، نگا گیُودتے، زادکھان تشانگمے پھیا نگا ما تھادپو راگ۔

¹⁸ تینیانگ مسیح، نگا گیُودتے، چوا زادکھانگونّی پھیا مانپا، یانگ چیجیگّانگ پھوسو چوچیسّی ہامپا چوامید، کا بو نگے یہُودی مانکھان گُونی ٹوا لون تانگ لاس چوتشول گُون گیُودتے، کھونگونلا خُدے نانّگا ایمان چوچوگچیسپو این۔

¹⁹ معجزہ کھیود گُون تانگ ستاگس گُونی شوگس یانگ ہلژخمہ رُوح بوے شوگس گیُودتے، کھونگونی نگے لون ٹانگپو اینکھانبویکا لوکھیل۔ تینّا تشولّا نگے مسیح گاموےناتسُول گانگپو یروشالیمّی گیالسانے ایلیریکامّی گیالسا تشوگپا شادپین۔

²⁰ جانماجیگی ماگلدان تانگسکھانبویکا میسیگچیسّی پھیا نگے مسیح تشان مانے میتشورسے ناسّاگونّی نانّگا گاموےناتسُول شادچیسپو نی، توسگیون نگے میگژی اینپین۔

²¹ کازوگ ہلژخمہ شوقبُو بوے نانّگا مولتے دوگ، ”کاگونلا کھونگی سکورلا مانے ماشادس تیگونّی کھونگ جالین یانگ کھونگی سکورلا مانے ماتشورکھانگونّی ہاگوین۔“

²² تینّابویپھیا نگا کھیوجاگون یودسا یونگچیسپو گورتے اینوگ، چیازیرنا نگا تے ناسّاگونّی نانّگانگ چھوسشادگوستے اینوگ۔

حضرت پولُسی رومّا چھاچیسّی تھابسلدینگس۔

²³ اِین نانگ تا نگے ای یولجونگسگونّی نانّگا لاسگون چوتشار۔ یانگ لو مانگپوجیگنے پھارلا کھیوجا تھوگچیسلا رینگسین یودپا،

²⁴ نگا سپینّ نی یولّا چھا زانے، کھیوجا تُھوگا یونگین۔ تیرو چھا زانے نگا کھیوجا یودسا دُوگستے کھیوجاگون نیامپو سکیدپوے توسشیگ پھودین۔ یانگ نگے سپین لا چھاچیسّی پھیا گھوسدومگونّی نانّگا کھیوجے روگس چونیانین ریوا راک۔

²⁵ اِین نانگ نگا یونگی سانگ سنگونلا، یروشالیمّی نانّگا یودکھانّی ایمان چانگونلا روگسپو کھیرّالا چھاگوشیس یود۔

²⁶ مکدنیہ تانگ اخیہ پا ایمان چانگون، یروشالیمّی ایمان چانگونّی ٹوا یودکھانّی نیالباچانگونلا، روگس چوستے پینے کالچیسلا تھادپو یودتے اینوگ۔

²⁷ کھونگون تے چوسکھانبویکا ماثانٹے تھادپو اینوگ، نگوسپوا کھونگونی تیبو بولونجیگ شالگوستے اینوگ۔ کالتیس یہُودی مانکھان گُونی، یہُودی پاگونلا خُدے برکت تھوبکھانگون گوادنا، تینے کھونگونلا یودکھانّی نورگونّانگ یہُودی پے ایمان چانگون نیامپو گوگوس۔

²⁸ نگے ای پینے لدوسکھانبو کھونگونلا تانگستے نگارانگی کھاگپو ڈانڈا ڈوبچوگستے ستینگنے، سپینلا چھا زانے، نگا کھیوجا تھوگستے چھین۔

²⁹ یانگ نگا تانتان راگ، نگا کھیوجا یودسا لیبستے نگاتانگون نیامپو یودکھانّی توسپوا مسیح، برکت مانگپو سالّا زادِین۔

³⁰ لے فونو گون، نگے کھیوجاگونلا حضرت عیسیٰ مسیح نانّگا سپوسپا تانگین، نگے باردوی توسلا نگے پھیا خُدا دُعا پھولچیسلا جُووا پھولّاد۔ ہلژخمہ رُوح بوے سالّا زادکھانّی کھیوجاگونّی چیسپا، نگے پھیا یودچیسپوے تیبو چوشیگ۔

³¹ یہُودیہ نانّگا یودکھانّی یہُودی پا ایمان میدکھانگونّی کانے نگا سکیوبچیسلا خُدا دُعا پھولشیگ۔ یانگ نگے یروشالیمّا کھیرچیسچانّی روگسّی پینیبو تیرو یودکھانّی ایمان چانگونّی تھادپو نیامپو لینچیسلانگ دُعا پھولشیگ۔

³² تینے خُدے تھوگّونگس یودنا، نگا کھیوجاگون یودسا سیمس تھادپو نیامپو یونگین، یانگ نگاتانگونّی چیگ تانگ چیگّا سپوسپا تانگ تھوبین۔

³³ جیدیے خُدے کھیوجا تشانگما نیامپو جوگسشیگ، امین۔