རོམ༌པ༌ 14 - New Testament in Ladakhi Langageایمانی نانّگا شوگسمید تانگ شوگسچان۔ 1 ایمانی نانّگا اُتھوکس یودکھانگون کھیوجاگونّی ٹوا ثیس، اِین نانگ کھونگونی سامتشول کا بو رُوحانی تھوگنے کھاگچان مان تیگونّی سکورلا دزینگمو ماتانگشیگ۔ 2 سپیرنا می چیگی ایمانی کھوا چیتشانگما زانّانگ چھوگس زیرّانوگ، اِین نانگ ایمان اُتھوکس یودکھان یانگ میجیگی، تشودما مانے زا مانوگ۔ 3 چیتشانگما زاکھانگونّی تشودما مانے مازاکھانگونلا نیامشونگ سیوا میدکھان تسوگسلا ستا ماگوس۔ یانگ شا مازاکھانگونّی، زاکھانگونلا دِیگپا چوستے اینوگ زیرتے نیادگال کال ماگوس، چیازیرنا خُدے کھونگونلا گاسوس جوا زادتے اینوگ۔ 4 جانماجیگی جابستوگپاجیگّا ٹھیمسچاد تانگکھان کھیرانگ سو این۔ کھونگون نونگسمید اینّا مان، تیبو کھورانگونّی سپونبوے تھاگچاد سالین۔ یانگ کھونگون نونگسمید لوسین، چیازیرنا مسیح، تیگون نونگسمید چونیانّا زادّانوگ۔ 5 می چیگی، جاگچیگ یانگجاگونّی سانگ مانّگا ہلژخمہ تھیانوگ۔ جانیانگ می چیگی، جاگ تشانگما ژوگس تھیانوگ۔ کھیوجا ریریے رانگرانگی سامکھانبویکا ستانپو یونگّوس۔ 6 جاگچیگ کھاگچان تھیستے مسیحا چولکھانگونّی تیبو کھونّگا سیوا پھولچیسلا چوانوگ۔ شا زاکھانگونّی مسیح سیوے نانّگا زانوگ، چیازیرنا کھونگونی زے سانگ سنگونلا خُدا شُکر جْوس تے اینوگ۔ یانگ شا مازاکھانگونّیانگ مسیح سیوے نانّگا شا زا مانوگ یانگ کھونگونی خُدا شُکر جوانوگ۔ 7 نگاتانگون نگاتانگرانگی پھیا سونتیا دوگّا مانوگ یا، نگاتانگرانگی پھیا شیا مانوگ۔ 8 کالتیس نگاتانگون سونتے میتشے پھودّادنا، تیبو مسیحا سیوے پھیا اینوگ۔ یانگ کالتیس نگاتانگون شینا تیبوانگ مسیح سیوے پھیا اینوگ۔ تیبویپھیا نگاتانگون سونتیا یودڈو یا شیتے، نگاتانگون مسیح اینوگ۔ 9 شیکھان تانگ سونتے نیسکوے مسیح گیورچیسّی گیونتشانبوے پھیا، مسیحا ڈونگسّا زادتے یانگسکیار سونتیا جانگسّا زادس۔ 10 تینے چیپھیا کھیرانگی فونو جیگّا سکیون کالّاد۔ یانگ کھونگونلا نیامشونگ سیوا میدکھان تسوگسلا چیا ستاد۔ ایدتو چوشیگ، نگاتانگ تشانگما خُدے ٹھیمسچادّی جُوگسٹھیسّی لدُونلا لانگّوسّانوگ۔ 11 ہلژخمہ شوقبُو بوے نانّگا مولتے اینوگ، ”مسیح مولس، کازوگ نگا سونتیا یودکھانبو لدینبا این، پیگمو تشوگستے تشانگمے نگا چھاگپھولین۔ لچے تشانگمے ستودپا پھولین نگا خُدے اینکھانبوے گواہ تانگین۔“ 12 تینّابویپھیا نگاتانگ ریریا خُدے سکوندونلا رانگرانگی چوکھان تشانگما شادگوسّانوگ، تینے کھونگی ٹھیمسچاد زادِین۔ 13 سونگپاسانگ چیگ تانگ چیگّا سکیون رجود ماچوشیگ۔ تیبوے تشابسلا، جانما ایمان چانجیگ گھاگیابستے گیل میچوگچیسّی میتشے جیگ پھودشیگ۔ 14 نگا گیوسیود، یانگ حضرت عیسیٰ مسیح وانگی نانّگا زاچیسّی ریگس تشانگما تشیتو مانکھانبو نگا تانتانلا لوکھیل راگ۔ اِین نانگ کالتیس سوجیگی تیبو ژانگما مانوگ سامنا، تینے کھوے پھیا تیبو ژانگما مانوگ۔ 15 کالتیس کھیوجے زاچیسپوے، جانیانگ فونو جیگّا نودپا سکیالنا، تینے کھیوجے چیسپے نانّگا لاس ماچوا اینوگ۔ کھیوجاگونّی زاچیسپوے، کھیوجارانگی فونو جیگی ایمان میدکھان ماچوشیگ، کابوے تونلا مسیحا ڈونگسّا زادس۔ 16 کھیوجے گیالّا اینوگ سامستے چوکھانبوا سوجیگیانگ سکیون رجود چو ماچوگشیگ۔ 17 خُدے گیالثیدّی نانّگا کھاگچانبو نی، زاچیس تانگ تھونگچیس مانپا، ہلژخمہ رُوح بوے نانّگا جیدے تانگ سکیدپوے میتشے ٹانگپوجیگ پھودچیسپو اینوگ۔ 18 کالتیس کھیوجاگونّی تیزوگ میتشے پھودین مسیحا جابستوگ جونا، کھیوجاگونّی خُدے تھوگنییس شوگانوگ، یانگ جانماگونّی کھیوجاگونلا سیوا چوین۔ 19 نگاتانگونّی عبادت خانہے نانّگا جیدے کھیونگچیس تانگ مسیح نانّگا چیگ تانگ چیگ لدانچوگچیسّی نانّگا ثانٹے سونڈوس چوین۔ 20 زاچیسشیگی تونلا خُدے چھاگلاسپو میدکھان ماچو۔ زاچیس تشانگما ژانگما اینوگ۔ اِین نانگ کھیوجے زاچیسپوے ژانمیجیگ ایمانی نانّگا گھاگیابچوگّادنا، تینے تیبو گیالّاجیگ چوستے مانوگ۔ 21 شا زاچیس یا چھانگ تھونگچیس یا جانیانگ لاسگونّی، کھیوجارانگی فونو جیگّا ایمانی نانّگا گھاگیابچوگّادنا، تینے تیگون ماچونا مانّگا گیالّا اینوگ۔ 22 تے تشانگمے سکورلا کھیوجاگونّی ایمان چوکھانبو خُدے تانگ کھیوجارانگونّی پارلا بورشیگ۔ زانگپو این سامستے چوکھانّی لاسپویکا نونگسچان ماتشورکھانگون، تسامشیگی برکت چان مانوگ۔ 23 اِین نانگ تھےژومس یودتے زاکھانّی می بوے دِیگپا چوستے اینوگ، چیازیرنا کھوے تے زانبو ایمان چوستے مازا اینوگ۔ یانگ کھیوجے چوسکھان تشانگما ایمان گیُودتے مانّا، کھیوجاگونّی دِیگپا چوستے اینوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation