རོམ༌པ༌ 13 - New Testament in Ladakhi Langage

وانگثولپے وانگی یوگا دوگشیگ۔

¹ کھیوجا تشانگما وانگثولپاگونّی وانگی یوگا دُوگوس۔ خُدے چوا زادکھانبو مانپا، یانگ وانگجیگ میدتے اینوگ۔ داگسا وانگثولین یودکھانگون خُدے چوا زادتے اینوگ۔

² تیبویپھیا سوجیگی وانگثولپاگونّی گیابگال چوادنا، کھونگونی خُدے چوا زادکھانبوے گیابگال چوستے اینوگ، یانگ تیزوگ چوکھانگونلا چھادپا پھوگین۔

³ وانگثولکھانگونّی زانگپو چوکھانگونّی نانّگا مانپا، نگانپا چوکھانگونّی نانّگا جیگسنانگ کھیونّگانوگ۔ کھیوجا وانگثولکھانگونّی کانے جیگسنانگ میدپا دوگنیین راگا؟ زانگپو اینکھانبو چوشیگ، تینے کھونگونی کھیوجاگونلا سیوا چوین۔

⁴ کھونگون خُدے جابستوگپا کھیوجاگونلا پھانتھوگس چوچیسلا کالا زادکھان گُون اینوگ۔ کالتیس کھیوجاگونّی نگانپا لاس چوادنا جیگسگوس، چیازیرنا کھونگونلا چھادپا تانگچیسّی وانگ یودتے اینوگ۔ کھونگون خُدے جابستوگپا، نگانپا چوکھانگونلا چھادپا تانّگالا لامچوگکھانگون اینوگ۔

⁵ تیبویپھیا کھیوجاگونّی چھادپانے تھارچیس چیگپو مانپا، رانگی سیمسّی نانّگا نونگس میدچیسّی پھیا کھونگونی وانگی یوگا دُوگوس۔

⁶ تینّا گیونتشانبوے پھیا کھیوجاگونّی ٹھالگون شالّانوگ، چیازیرنا وانگثولکھانگون خُدے جابستوگپا اینوگ، یانگ تیگونّی توس گانگپو میگونّی جابستوگی پھیا تانّگانوگ۔

⁷ وانگثولکھان تشانگما تانگّوشیسّی اوسپا اینکھانبو تونگشیگ، سپیرنا ٹھال شالگوس یودنا شولشیگ، جانیانگ پینے شالگوشیسگون یودنا شولشیگ، سیوا تانگ کُوسپا تانگّوشیسچانگونلا سیوا تانگ کُوسپا تونگشیگ۔

خُدے گھوسدوم تشانگما چیسپے ڈوب چوگّانوگ۔

⁸ چیگ تانگ چیگی پارلا چیسپا چوچیسپو مانپا، جانیانگ بولونجیگ لوس ماگوس، چیازیرنا جانماگونلا چیسپا چوکھانّی می بوے شریعت گون ڈانڈا ڈوبچوگستے اینوگ۔

⁹ کاگیاگون نی۔ ”رانگی جیدماد مانپا جانما نیامپو لوسڈیل ماچو“ ”میساد ماگوس“ ”کو ماگوس“ ”جانما یودکھانبوے دودپا چو ماگوس “ تیگون تانگ جانیانگ حُکم تشانگما ای حُکم چیگپوے نانّگا دورلدوستے اینوگ، ”رانّگا چوکھان تسوگسلا کھییمتشیسپاگونلانگ چیسپا چوشیگ۔“

¹⁰ چیسپے، جانما نودپا سکیالّا مانوگ سونگپاسانگ، چیسپے خُدے شریعتی گھوسدومگون ڈانڈا ڈوب چوگّانوگ۔

¹¹ تیزوگ چوچیسپو مانّگا کھاگچان اینوگ۔ توسپو بودین چھاکھان یانگ کھیوجا گورتے اینکھانبو کھیوجاگونلا گیوس اینّوگ۔ نییدنے لونگشیگ، چیازیرنا گوما نگاتی ایمان چوکھانّی توسپوے سانگ، داگسا نگاتانگون تھارپابوے مانّگا نیموا لیبستے اینوگ۔

¹² تشانبو بُود تشارکییس سونگتے تھارپے جاگپو گیوگسپا لیبچیس یود پاسانگ، کھیوجاگونّی مونڈیگی لاسگون پھانگستے اودّی لدانگشان ماگچھاگون گونشیگ۔

¹³ نگاتانگون نییما لدانگشانّی اینچیسپوے، نگاتانگونّی میتشے لاگموجیگ پھودشیگ۔ سپیرنا ڈونتانگاین راروسشیسّی زاسگون لینتے ٹانبا ستور میچوگچیس تانگ چھانگ مانگپو تھونگستے را میروسشیس، لوسڈیل نگانپا تانگ اوسپے لوسڈیلّی تشادنے تھالتے میچوچیس، دزینگمو میتانگچیس تانگ سیگ میسیگچیس۔

¹⁴ تیبوے تشابسلا، کھیوجا رانگدانگرانّگا حضرت عیسیٰ مسیح سچودپاگون کوسلاگ تسوگسلا سکونشیگ، یانگ دِیگپے دودپاگون کازوگی ڈانڈا ڈوبچوگچیسّی سامبا کھیوجے نانّگا یونگ ماچوگشیگ۔