རོམ༌པ༌ 11 - New Testament in Ladakhi Langage

خُدے سنینگرجے بنی اِسرائیل پاگونّیکا۔

¹ تینے نگے ٹیاد، چی خُدے کھونگرانگی می بنی اِسرائیل پاگون پھانّگا زادسّا؟ مانے پھانّگا مازادس۔ نگا نگارانگ بنی اِسرائیل پاجیگ این، حضرت اِبراہیم اولاد، بِنیمِینؔ زیرکھانّی میریگسنے۔

² خُدے گوزوگنے پھارلا لدامّا زادکھانّی کھونگرانگی میگون پھانّگا مازادس۔ چی تیبوے سکورلا ہلژخمہ شوقبُو بوے نانّگا مولکھانبو کھیوجاگونلا گیوسمیدّا؟ پیغمبر حضرت اِلیاس بنی اِسرائیل پاگونّی گیابگالّا خُدا جُووا پھولس،

³ ”مسیح لے کھونگونی نیرانگی پیغمبر گون سادتے نیرانگی قُربان تانگساگون شیگس۔ نگارانگ چیگپو لوستے یود، یانگ کھونگونی نگانگ سادچیسّی سونڈوس چوروگ۔“

⁴ یانگ خُدے لانسالّا زادکھانبو کھیوجاگونلا ایدتو میراگّا؟ ”نگے نگارانگی پھیا بال زیرکھانّی سکونڈے لدُونلا چھاگ ماپھولکھان ستونگردون سکیوبستے بورتے یود۔“

⁵ تیتسوگس دیرینّگانگ اینوگ، خُدے شزدے جاستے، بنی اِسرائیل پا نیونگونجیگ خُدا ایمان چان لوستے اینوگ۔

⁶ یانگ کالتیس شزدے جاستے اینّا، تینے تیبو کھونگونی لاس زانگپوے جاستے مانوگ۔ کالتیس اینپینّا تینے کھونگی شزدے بو، رین ماشالّا یانگ اوسپا میدپا تھوبتے میدڈو۔

⁷ تینے چی؟ خُدے چھوگسّکیور تھوبچیسلا سونڈوس چوستے ژالین یودکھان بنی اِسرائیل پا مانگچھیابوا ماتھوبّا اینّوگا؟ خُدے لدامّا زادکھان کھاچیگّا تھوبتے اینوگ، اِین نانگ لوسکھانگونّی کھورانگونّی سنینگ سکیونگپو چوس۔

⁸ کازوگ ہلژخمہ شوقبُو بوے نانّگا مولتے اینوگ، ”خُدے کھونگونی سامباگون کھیورچوگّا زادس، کھونگونلا میگ یودتیانگ ماتھونّگا اینوگ یانگ نامچھوگ یودتیانگ ماتشورّا اینوگ۔“

⁹ تینّا تسوگسلا داؤد ّی مولس، ”کھونگونی کھارجی گنگستے یودکھانّی چوگتسیبو زومچیسّی سنییوشیگ گیورشیگ۔ کھونگونی برکت پوے کھونگونلا گھاگیابچوگشیگ۔ یانگ کھونگونلا اوسپا اینکھانبو تھوبشیگ۔

¹⁰ کھونگونلا میتھونگچیسّی پھیا کھونگونی میگ جار چوگشیگ۔ یانگ لچینتے کھورچیسپوے، کھونگون توسگیونّی پھیا زُگُورو گیورشیگ۔“

¹¹ چی بنی اِسرائیل پاگون گھاگیابستے لانگ مانے مینیانچیس، تیزام ثانٹے گیلّا؟ مانے ماگیل۔ اِین نانگ کھونگی کھا مینیانچیسپوے، خُدے تھارپابو یہُودی مانکھان گُونلا سالّا زادس۔ کھونگی تیبو چوا زادچیسّی گیونتشانبو نی بنی اِسرائیل پاگونلا تشیگچیس یونگستے، کھورانگونّی پھیا تھارپابو لینچیسلا اینوگ۔

¹² اِین نانگ کھونگونی دِیگپا چوچیسپوے، دُنیا گانگپوے میگونّی پھیا برکت، یانگ کھونگونلا خُدے چھوگسّکیور میتھوبچیسپوے، یہُودی مانکھان گُونی پھیا برکت کھیونّگادنا، تینے یہُودی پا تشانگمے مسیح نانّگا ایمان چو زانے، ایمان چان تشانگمالا تسامشیگی چھینمو برکت میتھوب۔

¹³ نگے ای تشانگما کھیوجا یہُودی مانکھان گُونلا زیرّاد، خُدے نگا یہُودی مانکھان گُونی پھیا رسُول گُونلا سکوا زادچیسپوا پھوسو تشورّاراگ۔

¹⁴ اِین نانگ نگے لاسپوے، بنی اِسرائیل پاگونلا کھیوجا یہُودی مانکھان گُونلا یودکھانبویکا تشیگچیس یونگچوگستے کھونگ کھاچیگّانگ سکیوبنیانچیسّی نگے ریوا این۔

¹⁵ کالتیس کھونگونی پھانگچیسپوے، خُدے تھارپابو جانیانگ دُنیائی می گونلا سالّا زادّادنا، تینے بنی اِسرائیل پاگونّیانگ تے تھارپابو لین زانے، تسامشیگی مانّگا تھادپو مییونگ۔ تیبو شیکھانگونّی پھیا میتشے گیورین۔

¹⁶ کالتیس گومے کھازاس تسوگسلا پاگپے کھاگچیگ پھولکھانبو ہلژخمہ اینّا، تینے پاگپے گانگپو ہلژخمہ اینوگ۔ تینّا تسوگسلا نگاتانگ یہُودی پاگونّی اتا اپو گون ہلژخمہ اینّا، تینے کھونگونی اولاد گونّانگ ہلژخمہ اینوگ۔ کالتیس ذیتونی لچانگمے پاٹاگ پو ہلژخمہ اینّا، تینے تے لچانگمے یالگاگونّانگ ہلژخمہ اینوگ۔

¹⁷ اِین نانگ تے ذیتونی لچانگمے یالگا کھاچیگ چاگستے، ماتابّا سکیکھانّی ذیتونی لچانگمے کھولگون، تیتشابسلا پیوانلا تانگس پاسانگ، تا کھیوجاگونّیانگ تے ذیتونی لچانگمے ستوبسچان پاٹھاقّی کھوابو گوستے تھونّگانوگ۔

¹⁸ تے یالگا چاگکھانگونّی تشابسلا کھیوجا پیوانلا تانگکھانبویکا پھوسو ماچوشیگ۔ کھیوجاگون تے لچانگمے پاٹاگ پو مانپا یالگاجیگ اینوگ۔

¹⁹ تینے کھیوجے زیرثیداین، ”نگا پیوانلا تانگچیسّی پھیا تے یالگاگون چاگّا زادس۔“

²⁰ تیبو لدینبا اینوگ، اِین نانگ مسیح نانّگا ایمان ماچوسپا، تے یالگاگون چاگّا زادس، یانگ کھیوجے ایمان چوچیسپوے، کھیوجاگون تے لچانگمے کھاگشیگ اینوگ۔ پھوسو ماچوشیگ، اِین نانگ چی جونگین سامستے جیگسشیگ۔

²¹ کالتیس خُدے نگوسمے یالگاگون ماپھودّا اینّا، کھونگی کھیوجاگونّانگ پھودّا میزاد۔

²² خُدے تھوگرجیچان تانگ ٹھیمسچاد ثانٹے زادکھان اینکھانبو ہاگوگوس۔ کھا مینیانکھانگونّی پھیا ٹھیمسچاد ثانٹے، اِین نانگ کھیوجے پھیا تھوگرجیچان۔ کالتیس کھیوجے کھونگی شزدے نانّگا ایمان چوین دوگ مادوگنا، کھیوجاگونّانگ کھونگی چادتے پھانّگا زادِین۔

²³ یانگ کالتیس بنی اِسرائیل پاگونّی ایمان میدچیسپو پھانگنا، کھونگونانگ یانگسکیار تے لچانگمے نانّگا پیوانلا تانّگا زادِین، چیاجونا خُدا تیزوگ زادچیسّی وانگبو یودتے اینوگ۔

²⁴ کالتیس کھیوجا، ماتابّا سکییکھان ذیتونی لچانگمے یالگا اینتیانگ، خُدے کھیوجا تابسکھانّی ذیتونی لچانگمیکا پیوانلا تانگچیسلا تھادّا زادّادنا، کا بو رانگژین اینکھانّی گولوگپو اینوگ، تینے نگوسپوے لچانگمے کھولبو تینّا نگوسما لچانگمے نانّگا پیوانلا تانّگا زادچیسلا خُدے تسامشیگ مانّگا تھادّا میزاد۔

خُدے سنینگرجے می تشانگمے پھیا۔

²⁵ فونو گون، کھیوجاگون پھوسو میتشورچیسّی پھیا نگے، ای ٹانگپوے سانگوابو کھیوجاگونلا ہاگوگوس سامّاراگ۔ بنی اِسرائیل پا مانگپوجیگی سنینگ سکیونگپو لوسین، نامتشوگپا خُدے لدامّا زادکھانّی یہُودی مانکھان تشانگمے، مسیح نانّگا ایمان میچو۔

²⁶ تینے بنی اِسرائیل پا تشانگما کھوم چُوگین، کازوگ ہلژخمہ شوقبُو بوے نانّگا مولتے اینوگ، ”سکیوبّا زادکھانبو یروشالیم نے بینگین، یانگ کھونگی حضرت یعقُوبؔ نگانپے لاسگون چوچیسنے گیور چوگّا زادِین۔

²⁷ یانگ کھونگون نیامپو نگے وعدہ بو نی، نگے کھونگی دِیگپاگون میدکھان چوین۔“

²⁸ بنی اِسرائیل پا مانگپوجیگ تا گاموےناتسُولّی ڈاو اینوگ۔ تینیانگ کھونگونلا تارُوانگ خُدے چیسپا زادّانوگ، چیازیرنا کھونگی تیگونّی اتا اپو حضرت اِبراہیم، حضرت اِضحاقؔ تانگ، حضرت یعقُوبؔ گُون لدامّا زادس۔

²⁹ نگے تیبو زیرّاد چیازیرنا، خُدے شزدے زادکھان تانگ لدامّا زادکھانّی تھاگچادبوے نانّگا گیورجا مانے کھیونگا زادّا مانوگ۔

³⁰ کھیوجا یہُودی مانکھان گُونانگ توسشیگّا خُدے کھا مانیانکھان اینپین، اِین نانگ تا یہُودی پاگونّی کھا مینیانچیسّی ڈاسبوبوے، کھیوجاگونلا کھونگی سنینگرجے تھوبتے اینوگ۔

³¹ تا کھونگون کھا مینیانکھان اینوگ، یانگ خُدے سنینگرجے نانّگا کھونگونانگ ڈیشیسّی پھیا، کھیوجاگونلا خُدے سنینگرجے تھوبتے اینوگ۔

³² خُدے میتشانگمالا سنینگرجے ستانّا زادچیسّی پھیا کھونگی میتشانگما کھا مینیانچیسّی لاگا ستادا زادس۔

³³ و، خُدے گیونور تانگ شیسرابس تانگ یونتان گُون تسامشیگی جیگسپو مانوگ۔ کھونگی ٹھیمسچاد تانگ چھاگلاس زادچیسّی تشول گُون نگاتانگونلا مانے ہاگوتھوبچیس میدپا اینوگ۔

³⁴ سوی مسیح تھوگسّامگون شیسین؟ کھونّگا کھادا تانگچیسّی ہاگو سُوا یود؟

³⁵ سوی کھونّگا تیزام مانگپوجیگ تانگستے یود، کا بو کھونّگا لوگستے پھولگوشیس گھوسدوم سکیودس۔

³⁶ کھونگی چھوگسنے چیتشانگما جُونگستے، کھونگی وانگی جاستے، تیگون لوستے اینوگ۔ یانگ تیگون کھونگی سپالّی پھیا اینوگ۔ خُدا سپال تشانگما توسگیون تھوبشیگ، امین۔