རོམ༌པ༌ 10 - New Testament in Ladakhi Langage

¹ لے فونو گون، نگے سنینگی دودپا تانگ خُدا دُعا پھولچیسپو نی بنی اِسرائیل پاگون سکیوبچیسّی پھیا این۔

² کھونگونی خُدے تھوگستھاد چوگچیسّی دودپے نانّگا سونڈوس ثانٹے چوکھانبوا نگے گواہ تانّگاد، اِین نانگ کھونگونی خُدے تسالچیسّی لامبو نورتے اینوگ۔

³ کھونگونلا خُدے چھوگسنے یونگکھانّی ٹانگپوے سکورلا گیُوس میدپا اینوگ۔ کھونگون خُدے ٹانگپوے لامیکا ڈولچیسلا ماتھادّا، کھورانگونّی سونڈوس گیُودتے، ٹانگپو گیورچیسلا تھادّانوگ۔

⁴ مسیح نانّگا شریعتی گھوسدوم تشانگما ڈوبّا زادتے اینوگ، تیبوے ڈاسبو کھونگی نانّگا ایمان چوکھان تشانگما، خُدے سکوندونلا ٹانگپو چوا زادّانوگ۔

تھارپا تشانگمے پھیا۔

⁵ حضرت مُوسیٰؔ سی ڈیازادس، شریعت نانگجین میجیگ خُدے سکوندونلا ٹانگپو گیورچیسّی گھوسدومبو نی ”شریعت تشانگما کھانیانگوشیس“ اینوگ۔

⁶ اِین نانگ ایمان گیُودتے خُدے سکوندونلا ٹانگپو گیورچیسّی لابجابوے مولس، ”کھیوجے سنینگی نانّگا، ’سو نامکھا چھین‘ چیا سامّاد؟ (یانگنا تُھورلا سکیودتے تھارپے لونبو نگاتانگونلا شادّا زادچیسّی پھیا مسیحا بودّالا)۔“

⁷ یا چیا سامّاد، ” یوگا شیکھانگونّی ناسّے نانّگا سو چھین؟ (یانگنا تینانگنے مسیحا بینگستے سکیودتے تھارپے لونبو نگاتانگونلا شادّا زاد زیرچیسلا)۔“

⁸ اِین نانگ ایمانی سکورلا لابجے چی مولدوگ؟ ”لونبو کھیوجے لاگا یودتے اینوگ تیبو کھیوجے کھالپاگ تانگ سنینگ گُونی نانّگا یودتے اینوگ۔“ یانگ تینّا لونبو نی، مسیح نانّگا ایمان چوچیسلا نگاجے چھوس شادکھانّی لونبو این۔

⁹ کالتیس کھیوجے رانگی کھانے، حضرت عیسیٰ مسیح اینکھانبو زیرچیس تانگ خُدے کھونگ شیکھانگونّی ٹونے سونتیا لانّگا زادتے اینکھانبوا ایمان چونا، کھیوجاگون کھوم چُوگین۔

¹⁰ کھیوجاگونّی سنینگی نانّگا ایمان یودچیسپوے، کھیوجاگون خُدے سکوندونلا ٹانگپو چوا زادس، یانگ کھانے شادچیسپوے، کھیوجاگون سکیوبّا زادس۔

¹¹ کازوگ ہلژخمہ شوقبُو بوے نانّگا مولتے اینوگ، ”کھونگی نانّگا ایمان چوکھانگونّی ریوابو مانے چاگّا میزاد۔“

¹² یہُودی پا تانگ یہُودی مانکھان گُونی نانّگا چانگ کھیاد میدپا اینوگ۔ تینّا مسیح تشانگمے مسیح اینوگ، یانگ کھونّگا جُووا پھولکھانگونلا سنینگ پھیستے سالّا زادّانوگ۔

¹³ چیاجونا ”مسیحا سکیوبچیسلا جُووا پھولکھان تشانگما کھونگی کھوم چُوگین۔“

¹⁴ تینے کھونگونی کازوگی جُووا پھولین، کالتیس تیگونّی کھونّگا ایمان ماچونا؟ یانگ کھونگونی کازوگی ایمان چوین، کالتیس تیگونّی کھونگی سکورلا مانے ماتشورّا یودنا؟ یانگ کھونگونلا کازوگی تشورین کالتیس سوجیگیانگ کھونگی سکورلا ماشادنا؟

¹⁵ یانگ کالتیس کالتے مانپینّا، کھونگون یودسا سونگتے چھوس کازوگی شادین؟ تینّابویپھیا ہلژخمہ شوقبُو بوے نانّگا مولتے اینوگ، ”گاموےناتسُول کھیونگکھانگونّی کانگپا تسامشیگی برکت چان مانوگ۔“

¹⁶ اِین نانگ سوتشانگمے گاموےناتسُولّا گاسوس ژوامانوگ، چیازیرنا پیغمبر حضرت یسعیاہ زیرس، ”مسیح لے، سوی نگاتانگی لونبوا ایمان چوس؟“

¹⁷ سونگپاسانگ لونبو نیانچیس چیگپو گیُودتے ایمان بو یونّگانوگ، یانگ تے لونبو نی مسیح سکورّی گاموےناتسُولبو اینوگ۔

¹⁸ اِین نانگ نگے ٹیاد، چی بنی اِسرائیل پاگونلا لونبو ماتشورّا اینّوگا؟ اونا، کھونگونی تشورتے اینوگ، ”لونبو دُنیا گانگپوے نانّگا پھیلتے اینوگ، یانگ کا بو دُنیائی تھاما تشوگپانگ لیبتے اینوگ۔“

¹⁹ اِین نانگ نگے یانگسکیار ٹیاد، چی بنی اِسرائیل پاگونلا ہاماگوا اینّوگا؟ کھونگونی ہاگوتے اینوگ، چیازیرنا حضرت مُوسیٰؔ سی توسلانگ خُدے مولّا زادس، ”گیالکھاگ مانکھانّی میگون گیُودتے، نگے کھیوجاگونّی نانّگا تشیگچیس سکیچُوگین ، سامبا میدکھانّی یہُودی مانکھان گُون گیُودتے، نگے کھیوجاگونّی نانّگا ثو سکیچُوگین۔“

²⁰ یانگ ستینگنے خُدے چھوگسنے حضرت یسعیاہ ہامپا نیامپو مولس، ”نگا ماتسالکھانّی میگونّی نگیکا ایمان چوس۔ نگا شیسنیین ماڈوکھان گُونلا، نگے نگارانگ سنگونچوگسپین۔“

²¹ اِین نانگ بنی اِسرائیل پاگونّی سکورلا خُدے مولس، ”نییما گانگپو نگے نگارانگی لاگپا کھونگونلا گاسوس جُوالا کیانگستے بورپین، اِین نانگ کھونگون کھامینیان تانگ نگولوگ چوکھان یودپین۔“