རོམ༌པ༌ 1 - New Testament in Ladakhi Langage

حضرت پولُسی چھوگسنے سلام جْوس ۔

¹ ای ایگیبو نگا حضرت پولُس، حضرت عیسیٰ مسیح تشییوگ، خُدے لدامّا زادکھان رسُول، گاموےناتسُول شادّالا لامچوگا زادکھانّی چھوگسنے این۔

² خُدے ای گاموےناتسُولبو توس مانگپوے سنگونلا کھونگرانگی پیغمبر گون گیُودتے، ہلژخمہ شوقبُو بوے نانّگا وعدہ زادتے اینپین۔

³ گاموےناتسُولبو نی کھونگرانگی بُوژے سکورلا اینوگ۔ دُنیائی میتشیے نانّگا کھونگ، گیالپو داؤد ّی گیودنے سکییا زادتے

⁴ ہلژخمہ رُوح بوے شید گیُودتے شیکھانگونّی ٹونے سونتیا لانّگا زادتے کھونگ خُدےبوژا اینکھانبو ستانّا زادس۔ کھونگ نی حضرت عیسیٰ سی مسیحا، نگاتانگی مسیح این۔

⁵ مسیحا گیُودتے خُدے نگاجا گُونلا رسُول گُونی تشولّا، کارونگسا یہُودی مانکھان گُونلا خُدے چوا زادکھان گُون شادچیسّی وانگچھا تانگ سیوا گُون سالّا زادس۔ کھونگی تیزوگ چوا زادچیسّی گیونتشان نی، یہُودی مانکھان گُونی کھونگی کھانیانچیس تانگ ایمان چوستے کھونگی ژانلا سیوا کھیونگچیسپو اینوگ۔

⁶ یانگ کھیوجاگونّانگ، حضرت عیسیٰ مسیح کھونگرانگی می لدامّا زادکھانّی یہُودی مانکھان گُونی ٹوا اینوگ۔

⁷ نگے، خُدے چیسپا چوا زادتے کھونگی می ہلژخمہ گون گیورچیسلا بودّا زادکھانّی کھیوجا رومپا تشانگمالا ڈِیاد۔ خُدے نگاتانگونّی یاب تانگ حضرت عیسیٰ مسیح شزدے تانگ جیدے کھیوجاگونلا سالّا زادشیگ۔

خُدے گاموےناتسُول۔

⁸ تشانگمیسانگ سنگونلا، نگے کھیوجا تشانگمے پھیا حضرت عیسیٰ مسیحاگیُودتے خُدا شُکر جوین، چیازیرنا مسیح نانّگا یودکھانّی کھیوجے ایمانی سکورلا دُنیا گانگپوے میگونّی سپیرا تانگدوگ۔

⁹ نگے دُعا سلام زانے کھیوجاگون توسگیون ایدتو چواد، تیبوے گواہ خُدے این، کھونگی بُوژے گاموےناتسُولبو پھیلچوگچیسلا نگے نگارانگی سنینگی تھیلنے جابستوگ جُواد۔

¹⁰ نگے دُعا تشانگمے نانّگا، کالتیس خُدے تھوگّونگسّادنا، نگا کھیوجاگون نیامپو تھوگچیسلا سکابسشیگ سال زیرین جُووا پھولّاد۔

¹¹ مسیح نانّگا شیدچان گیورچیسلا روگس چوکھانّی رُوح بوے کھیود ریگ کھیوجاگونلا کھیونگچیسّی پھیا نگا کھیوجا نیامپو تھوگچیسلا دودپا ثانٹے راگ۔

¹² تیبوے، نگے کھیوجاگونلا، یانگ کھیوجے نگا ایمانی نانّگا سپوسپا سکییچوگ تھوبین۔

¹³ لے فونو گون، نگے لان مانگپو کھیوجاگونلا تھوگچیسّی تھابس چوسپین، اِین نانگ داگسا تشوگپا گاگستے بورکھانبو کھیوجاگونلا گیُوس چھاگوس سامّاراگ۔ نگا کھیوجاگونّی ٹوا لاس چوچیس تانگ رُوح بوے ڈاسبوگون ستاچیسّی دودپا راگ، کازوگ نگے جانیانگ یہُودی مانکھان گُونی ٹوا تھونگ۔

¹⁴ یہُودی پےلابجے نانّگا یونتان یودکھان یانگ میدکھان نییسکوا یا شیسرابسچان تانگ سامبا میدکھان نییسکوا، گاموےناتسُول شادچیسّی کھاگ نگا پھوگتے این

¹⁵ پاسانگ، کھیوجا رومی گیالسے نانّگا یودکھانگونلانگ گاموےناتسُول شادچیسلا نگا رینگسّاراگ۔

¹⁶ ای گاموےناتسُولبوا نگا ٹھیلّا میراگ، چیازیرنا ایبو نی ایمان چانّی میتشانگما سکیوبتھوبچیسّی خُدے ستوبسپو اینوگ، تانگپو یہُودی پاگونلا تینے یہُودی مانکھان گُونلا۔

¹⁷ ای گاموےناتسُولبوے نگاتانگ خُدے سکوندونلا کازوگی ٹانگپو گیورچیسپو ستانّانوگ، کا بو گوزوگنے جوگما تشوگپا ایمان گیُودتے ڈوبّانوگ۔ کازوگ ہلژخمہ شوقبُو بوے نانّگا مولتے یودتے اینوگ، ”ایمان گیُودتے می ڈانگپوجیگّا میتشے تھوبّانوگ۔“

سدیگپیکا خُدے تھوگسثو۔

¹⁸ اِین نانگ کھورانگونّی نگانپے لاسگونّی گیابّا، لدینبابو کابستے بورکھانّی می، نگانپا تانگ دِیگپاچان تشانگمے گیابگالّا، خُدے تھوگسثو نامکھانے ستانّا زادِین اینوگ۔

¹⁹ تیگونلا خُدے لدینبے سکورلا گیوسیودتے اینوگ، چیازیرنا کھونگی تیگون کھونگونلا سالپو زادتے ستانّا زادتے اینپین۔

²⁰ دُنیا زادپانے پھارلا میگونّی، خُدے زادکھان تشانگما گیُودتے، سالپو چوستے، ماتھونگکھانّی کھونگی کھیودگون تھونگستے اینوگ، کاگون کھونگی تھامیدپے وانگ تانگ خُدے سچودپاگون اینوگ۔ تینّابویپھیا کھونگونی چانگ سکیون چو مینیان۔

²¹ تیگونّی خُدے شیساین یودتیانگ، کھونّگاا اوسپے سیوا ماتانگس یا تھوگرجیچھیانگ ماجوس۔ اِین نانگ خُدے کازوگشیگ این، تے سکورلا سامبا میدکھان گُون تسوگسلا سامبا تانگچیس گوزوگس، کابوے جاستے تیگون لدادپا میدکھان ژوگس گیورتے لاگمو سامبا تانگ مانیان۔

²² کھونگونی کھورانگّون سامباچان این زیرنانگ، تیگون بونگبو ژوگس گیورتے اینوگ۔

²³ یانگ کھونگونی شان چان تانگ توسگیون سونپو اینکھانّی خُدا ماچولّا شیچیسچانّی می یا، چیپا یا، سیمسچان یا، رگالچیگی ریگس گُونی زوستے نانّگا چوکھانّی سکونڈا چولّانوگ۔

²⁴ تیبویپھیا خُدے تے میگون کھورانگونّی دِیگپے دودپا نانگجین چوچیسلا پھانّگا زادس۔ تیبوے جاستے کھونگونی کھورانگ چیگ تانگ چیگی زوگسپو نیامپو کھاملوگ تانگ تشیتو لاسگون چوس۔

²⁵ کھونگونی خُدے لدینبے تشابسلا زون لابجاگون کولس، یانگ دُنیا زادکھان خُدے کابوا توسگیون ستودپے اوسپا این، ا مین۔ کھونّگا ماچولّا کھونگی تشابسلا کھونگی زادکھانگونلا چولچیس تانگ جابستوگ جْوس ۔

²⁶ تینّابویپھیا خُدے تیگون کھورانگونّی ٹھیلمیدّی دودپاگون چوچیسلا پھانّگا زادس۔ بوموگونّیانگ رانگژینّی لوسڈیلّی تشابسلا کھورانگ چیگ تانگ چیگی پارلا لوسڈیلگون بورس۔

²⁷ تینّا تسوگسلا بُوژا گونّیانگ رانگژینّی لوسڈیلبو پھانگستے، کھورانگ بُوژا گُونی پارلا لوسڈیلّی دودپا ثانٹے چوس۔ یانگ بُوژا گُونی جانما بُوژا نیامپو ٹھیلمیدّی لاس چوسپا، کھونگونلا کھورانگونّی زوگسپے نانّگا تے لاسنگانبوے چھادپا پھوگ۔

²⁸ کھونگونی خُدے شیسگوشیسپو نی پھانمیتھوگسشیگ اینوگ سام پاسانگ، خُدے تیگون سامبا میدکھان گُون تسوگسلا سامبا تانگچیسلا پھانّگا زادس۔ تیزوگ چوا زادچیسپوے، تیگونّی چو میگوشیسّی لاسنگانگون چوس۔

²⁹ تیگونّی میتشیبو نگانپا تشانگمے گانگس، سپیرنا دِیگپا، نابس، ناپھراد، سیمسّی نانّگا تشیگکھان، میساد، دزینگمو تانگچیس، گوبسکورچیس، مینگنانگ جانماگونلا سیمسّی نانّگا پھوگچوگچیس تانگ سپیرمین تانگچیس۔

³⁰ تے میگون جانماگونّی سکورلا سپیرا سوگپو زیرکھان، خُدا ناپھراد چوکھان، جانلا رسیوا ماچوکھان، پھوسوچان تانگ رانگستود تانگکھان اینوگ۔ تیگون دِیگپا چوچیسّی لام سومے سکورلا سامبا تانگکھان تانگ کھورانگونّی پھامے کھا مانیانکھان،

³¹ ہاگونین میدکھان، کھاچھاد چاگکھان، چامسپا تانگ سنینگرجے میدکھان گُون اینوگ۔

³² خُدے حُکم نانگجین تیزوگ لاس چوکھانگونلا شیگوشیس اوسپا اینکھانبو گیوسیودتیانگ، تینّا لاسنگانگون چوچیس ماتشاد، جانما تیتسوگس چوکھانگونلا ستودپا تانگدوگ۔