یونگچیسچانّی دوس 9 - New Testament in Ladakhi Langage

تونگ ثناپا پھوس۔

¹ فرشتا ثناپابوے تونگ پھواچیگ، نگے نامکھانے دُنیائیکا بودتے یودکھانّی سکارما جیگ تھونگ، کابوا مانگستیانگ کونڈو یودکھانّی سادونگی پھیکولیگپو سالّا زادتے دوگ۔

² کھوے سادونگ پھیا چیگ، تینانگنے میے چھینمو ژینکھان تسوگسّی دودپا بینگ، تے دودپابوے نییمے اوت تانگ نامبو کابسپا مونڈیگ سونگ۔

³ تے دودپے نانگنے پارپارتسے مانگپو بینگتے دُنیائیکا بُود، تیگونلا دِیگپاراتسے (یانگنا بیدچھو) ژوگس تھامشیسّی کھیود سالتے دوگ۔

⁴ یانگ تیگونلا، ”سا یا سنگونپو، یا لچانگما گُونلا نودپا ماسکیال، اِین نانگ تھودپیکا خُدے تھیتسے میدکھانّی میگونلا ناگس ستون“، مولتے کا سالس۔

⁵ تیگونلا کھونگون ساد ماسادّا، لزاوا ثنا ، ردوگنگال مانگپو تانگستے ناگس ستانچیسّی وانگ سالس، کا بو دِیگپاراتسیے تھامستے ناگس تھونگکھان ژوگس یونگین۔

⁶ تیتوسلا میگونّی شیچیس ژالین، اِین نانگ کھونگونلا مانے میتھوب۔ شیچیسّی دودپا چوین، اِین نانگ شیچیسپو کھونگّونّے تھاگرینّگا شورتے چھین۔

⁷ تے پارپارتسے گون ماگی پھیا ڈالڈیگ یودکھانّی ستا ژوگس دوگ، تیگونّی گویکا گونکھانبو سیرّی تاج ژوگس یانگ لدونگ گُون می لدونگ ژوگس دوگ۔

⁸ تیگونلا بومو ژوگس ثا یانگ سوگون سینگّے سو ژوگس دوگ۔

⁹ تیگونّی ثانٹے لچاگسّی ماگچھاس ڈانگیکا گونتے کھونگی شوگپاگونّی سکادبو ماگی توسلا شینگی ستاریل مانگپوے سکاد ژوگس راگ۔

¹⁰ تیگونّی رنگامی تھامشیسپو نی، دِیگپاراتسے تھامسکھان ژوگس کابوا لزاوا ثنا میگونلا ناگس ستانچیسّی کھیود دوگ۔

¹¹ مانگستیانگ کونڈو یودکھانّی سادونگی فرشتا نی، تیگونّی گیالپو، کابوے مینگبوا عِبرانی سکادّی نانّگا ”ابدون“ تانگ یُونانی سکادّی نانّگا ”اپُلیون“ یانگنا ٹھیسّتور چوکھان زیرّانوگ۔

¹² جیگسپا دانگپوبو نی بودتشار، اِین نانگ ستوسّانگ یانگ جیگسپا نیس لیبچیسدوگ۔

¹³ فرشتا ٹُوگپے تونگ پھواچیگ، نگا خُدے لدُونلا یودکھانّی سیرّی قُربان تانگسا راچو ژیکوے کانے سکادجیگ تشور۔

¹⁴ یانگ تے سکادپوے تونگ تھامستے یودکھانّی فرشتا ڈوگپابوا مولس، ” لژانگسپو چھینمو فُرات گیوگسّے ناسّیکا چینگستے یودکھانّی فرشتا ژیکو پھود۔“

¹⁵ تے فرشتا ژیکو، تینّا توس، جاگ، لزاوا تانگ لوے پھیا ڈالڈیگ زادتے دُنیائی می گونّی کھاگ سومی نانگنے کھاگچیگ سادچیسلا پھودتے این۔

¹⁶ یانگ ستیکا ژونکھانّی ماگمیگونّی ٹانگسکا نی، نگے تشورچیسلا چیوانییشو راگ یانگنا کارور نییشو۔

¹⁷ یانگ نگے ژالزیگسّی نانّگا ستا تانگ تیکا ژونکھان گُون تھونگ، تیگونّی ماگچھاسگون میے ژوگس مارپو، سنگونپو تانگ، سیرپو، یانگ ستاگونّی گو سینگّے گو ژوگس دوگ۔ تیگونّی کھانے میے، دودپا تانگ ردوا توگچان گُون بینگدوگ۔

¹⁸ تے ستاگونّی کھے نانگنے بینگکھانّی جیگسنانگچانّی ناسلوگ سومکو، کا بو میے، دودپا تانگ ردوا توگچان گُونی دُنیائی کھاگ سومی نانگنے کھاگ چیگی میگون سادتے میدکھان چوس۔

¹⁹ تے ستاگونّی کھیود پو نی، کھونگونی کھا تانگ رنگاما گُونی نانّگا دوگ۔ تیگونّی رنگاما رُولی گو ژوگس دوگ، کا بو میگونلا ماسکیون چوچیسّی پھیا کولدوگ۔

²⁰ اِین نانگ تے ناسلوگ جیگسپاگونّی نانّگا ماشیکھان دُنیائی می گونّی رانگی لاس نگانپاگونّے گیودپا ماچوا، تارُوانگ ردود یانگ سیر، مول، راگان، ردوا تانگ شینگ گونّے چوکھانّی سکونڈاگونلا چولدوگ، کاگونلا تھونّگامید، یا تشورّامید، یا ڈولّانگ نیانّامید۔

²¹ کھونگونی می سادچیس یا چھوسنگان چوچیس (یانگنا جادُو چوچیس)، یا لوسڈیل نگانپا بورچیس، یا کوچیس گونّے گیودپا چوا میروگ۔