یونگچیسچانّی دوس 8 - New Testament in Ladakhi Langage

تھیتسے ردونپا چاگس۔

¹ لوگوی تھیتسے ردونپابو چاگستے پھیا چیگ، نامکھے نانّگا چھوتشود پھید زامشیگ چانگ سکاد میدپا جامتھینّگے لوس۔

² تینے نگے خُدے سکوندونلا لانگستے جوگسکھانّی فرشتا ردون تھونگ، یانگ کھونگونلا تُونگ ریرے سالّا زادس۔

³ سیرّی سپوسّی نود نامسکھانّی جان فرشتاجیگ سکیودتے قُربان تانگسای لدُونلا لانگستے ژوگس۔ کھوا سپوس مانگپوجیگ خُدے میگونّی دُعا گونی نانّگا ثیستے جُوگسٹھیسّی لدُونلا یودکھانّی سیرّی قُربان تانگسایکا پھولّا سالس۔

⁴ سپوسّی ٹیجیم چانّی دودپابو خُدے میگونّی دُعا تانگ ثیستے فرشتے پھولکھانّی قُربان تانگسای کانے خُدے چھوگسلا کیینلا سونگ۔

⁵ تینے تے فرشتابوے سیرّی سپوسّی اوت پو نامستے قُربان تانگسا کانے سولے میے سکانگستے دُنیائیکا پھانگسپا، دُنیائیکا سکاملاگی اود، ڈوگلدیرکھانّی سکاد تانگ سانگّول یونگس۔

تونگ ردون۔

⁶ تے ستینگنے تونگ ردون یودکھانّی فرشتا ردونکوے تیگون پھوچیسلا ڈالڈیگ چوس۔

⁷ فرشتا دانگپوبوے تونگ پھواچیگ، ٹھاق ڈیسکھانّی سیرارو تانگ میے دُنیائیکا بابس، کابوے دُنیائی کھاگ سومی نانگنے کھاگ چیگی نانّگا یودکھانّی سپانگ سنگونپو تانگ لچانگما تشانگما میا ثاگستانگس۔

⁸ فرشتا نیسپے تونگ پھواچیگ، میا بارین یودکھانّی ری چھینمو تسوگسشیگ گیاتشوے نانّگا پھانگستانگس، کابوے گیاتشوے کھاگ سومی نانگنے کھاگ چیگپو ٹھاقّا گیور۔

⁹ تے گیاتشوے نانّگا یودکھانّی سیمسچان کھاگ سومی نانگنے کھاگ چیگپو شی، یانگ تے گیاتشوے نانّگا یودکھانّی ٹُھوزینگ کھاگ سومی نانگنے کھاگچیگ میدکھان سونگ۔

¹⁰ تینے فرشتا سومپابوے تونگ پھواچیگ، نامکھانے پامبارّی میے ژوگس یودکھانّی سکارما چھینموجیگ، لژانگسپو تانگ چھومیگ کھاگ سومی نانگنے کھاگ چیگیکا بُود۔

¹¹ تے سکارمابوے مینّگا کھانتے زیردوگ، کابوے چھو کھاگ سومی نانگنے کھاگ چیگپو کھانتے گیورچوگس، یانگ کھانتے گیورکھانّی چھوبو تھونگستے می مانگپوجیگ شی۔

¹² تینے فرشتا جیپے تونگ پھواچیگ، نییما، لزاوا تانگ سکارمے کھاگ سومی نانگنے کھاگچیگ کابس تانگس، یانگ مونڈیگ گیور۔ نیما تانگ ژانی کھاگ سومی نانگنے کھاگ چیگپو اوت میدپا لوس۔

¹³ تینے نگے ستاسپا نامکھے سکیلّا اُورین یودکھانّی لاگی، سکاد چھینموے نانّگا زیرین تشور، ”دُنیائی نانّگا ایمان میدکھانّی میگونلا جیگسپا، جیگسپا، جیگسپا، لوسکھانّی فرشتا سومکوے تونگبو پھواچیگ، چی میچھا۔“