یونگچیسچانّی دوس 7 - New Testament in Ladakhi Langage

کھونگرانگی میگون خُدے سکیوبین۔

¹ تے ستینگنے نگا تھونگ، دُنیائی ڈوژیکیکا فرشتا ژی لانگستے ساکیاد یا گیاتشو یا لچانگما گونّیکا گیوگ میگیوگچیسلا، دُنیائی لونگسپو ژیکو گاگستے بورّا زادتے دوگ۔

² تینے نگے، لاگپے نانّگا سونپو خُدے تھیتسے کھورکھانّی فرشتا ثنا پابو شار چھوگسنے بینّگا تھونگ۔ ای فرشتے، ساکیاد تانگ گیاتشو گُونلا نودپا تانگچیسّی وانگ سالّا زادکھانّی فرشتا دُنیائی ڈوژیکیکا لانگستے یودکھانگونلا، سکاد چھینموے نانّگا مولس،

³ ”نگاتانگی نگاتی خُدے یوگپوگونّی تھودپیکا تھیتسے تانگتانگ تشوگپا ساکیاد، یا گیاتشو، یا لچانگما گُونلا نودپا ماتانگشیگ۔“

⁴ تینے نگا تھیتسے تانگتشارکھانگونّی ٹانگسکا بو تشور، کا بو لاگچیگ تانگ ستونگژیبچو جابجی، کاگون بنی اِسرائیلی میریگس تشانگمے نانگنے

⁵ یہُودیہ میریگسنے ستونگچوگنییس، روبینّی میریگسنے ستونگچوگنییس، گادّی میریگسنے ستونگچوگنییس،

⁶ آشر ی میریگسنے ستونگچوگنییس، نفتالیؔ میریگسنے ستونگچوگنییس، ماناشیے میریگسنے ستونگچوگنییس،

⁷ شیمیونّی میریگسنے ستونگ چوگنییس، لاوی میریگسنے ستونگ چوگنییس، ییساگارّی میریگسنے ستونگ چوگنییس،

⁸ زبُولونی میریگسنے ستونگ چوگنییس، حضرت یُوسفؔ بی میریگسنے ستونگ چوگنییس، یانگ بِنیمِینؔ ی میریگسنے ستونگ چوگنییس اینوگ۔

میتشوگس چھینموے ستودپا۔

⁹ تے ستینگنے نگے سوجیگیانگ سی مینیانچیسّی میتشوگس چھینموجیگ تھونگ، کاگون گیالکھاگ، ریگس، می تانگ سکادریگ تشانگمانے ژوگسٹھیس تانگ لوگوی لدُونلا لانگستے دوگپین۔ تیگونّی کوس کارپو گونتے، کھوپے لچانگمے یالگاگون لاگپے نانّگا کھورتے،

¹⁰ سکاد چھینموے نانّگا زیرس، تھارپا نی ژوگسٹھیسّیکا جُوگسکھان خُدے تانگ لوگو نییسکوینے تھوبّانوگ۔

¹¹ ژوگسٹھیس، اُسکیونگ گُون تانگ سروک یودکھان ژیکوا تھانے سکورتے فرشتا تشانگما جانگستے دوگ۔ کھونگ تشانگمے جُوگسٹھیسّی لدُونلا چھاگپھولاین خُدا چولس۔

¹² کھونگونی مولس، ”امین۔ ستودپا، سپال، شیسرابس، شزدے، سیوا، وانگ تانگ، شید گُون تُوسگیُونّے گیُون، نگاتانگونّی خُدے اینوگ، امین۔“

¹³ تینے اُسکیونگ چیگی نگا ٹیاراگ، ”ای کوس کارپو گونکھانگون سو اینوگ؟ یانگ کانے یونگستے اینوگ؟“

¹⁴ نگے کھونّگا، ”سپونبولے، نگا گیوسمید اِین نانگ نیرانگی کھیینّانوگ“ جوسپین۔ کھونگی مولّاراگ، ”یگون ردوگنگال ما چھینمونے بینگستے یونگکھانگون اینوگ۔ کھونگونی کھورانگونّی کوسگون لوگوی سکو ٹھاق ّی نانّگا غوتا تے کارپو چوستے اینوگ۔“

¹⁵ تینّابویپھیا کھونگونی خُدے جُوگسٹھیسّی لدُونلا لانگستے خُدے بیت المقدِس سی نانّگا تشاننین میدپا کھونّگا جابستوگ جوانوگ۔ یانگ ژوگسٹھیسّیکا جُوگستے یودکھانبوے، کور تسوگسلا کھونگون کابستے کھوم چُوگین۔

¹⁶ کھونگون مانے میستوگس، یا میسکومس، ماتشاد نییمے تشاد، یا تشاد ٹاگپوے جاستے کھونگون تشیگ میتشیگ۔

¹⁷ چیازیرنا جُوگسٹھیسّی سکییلّا لانگستے یودکھانّی لوگو نی، کھونگون کھوم چُوکھانی لُوگ زی اینوگ۔ کھونگی، کھونگون سروک سالکھانّی چھومیگّونّی لدُونلا ٹھیدتے کھیرّا زادِین۔ یانگ خُدے کھونگونی چھیما پھیا زادِین۔