یونگچیسچانّی دوس 6 - New Testament in Ladakhi Langage

تھیتسے ردون۔

¹ تینے نگے لوگوی تے تھیتسے ردونّی نانگنے دانگپوبو چاگستے پھیا زادّالا تھونگ۔ تے سروک یودکھان ژیکوے ٹونے چیگی ڈوگلدیرکھان تسوگسّی سکادّی نانّگا ”یونگ“ مولّاراگ۔

² نگے کیینلا ستاسپا، نگا ستا کارپوجیگ تھونگ، تیبویکا ژونکھانبوے ژوجیگ کھورتے یانگ کھوے گویکا تاج سکونّا زادتے دوگ۔ کھو گیالکھا تھوبتشارکھان تسوگسلا گیالکھا لینّالا بینگس۔

³ لوگوی تھیتسے نیسپابو چاگستے پھیا چیگ، سروک یودکھان نییسپابوے، ”یونگ“ مولینجیگ تشور۔

⁴ تینے یانگ ستا میے ژوگس مارپوجیگ بینگین تھونگ، تیکا ژونکھانبوا رایَ چھینموجیگ تانگ دُنیائی کانے جیدے میدکھان چوچیسّی وانگچھا سالس۔ تینے نولچیس گوزوگستے میگونّی ما تشول نگانپا نیامپو چیگ تانگ چیگ سادس۔

⁵ لوگوی تھیتسے سومپابو چاگستے پھیا چیگ، سروک یودکھان سومپابوے ”یونگ“ مولینجیگ تشور۔ نگے کیینلا ستاسپین یانگ ستا ناگپوجیگ تھونگ، تیکا ژونکھانبوے لاگپے نانّگا تاکاریجیگ دوگ۔

⁶ تینے نگے تے سروک یودکھان ژیکوے ٹونے سکادچیگی، ”جاگ چیگی لاچھا کییلوگارام چیگی ٹو یا کییلوگارام سومی ناس مانے نیومینیان۔ اِین نانگ مارناگ تانگ رگونچھانگ گُون سکونمو چھا ماچوگشیگ“ مولینجیگ تشور۔

⁷ لوگوی تھیتسے جیپابو چاگستے پھیا چیگ، نگے تے سروک یودکھان ژیپابوی، ”یونگ“ مولینجیگ تشور۔

⁸ نگے ستاسپا نگا گوگتھال ژوگس دوگ یودکھانّی ستاجیگ تھونگ، تیکا ژونکھانبوا شیچیس یانگ تیبوے ستینگرانگنے، یونگکھانّی ٹوپابوا شیکھانگونّی ساچھا زیردوگ۔ تے نییسکوا دُنیائی کھاگجیی نانگنے کھاگ چیگّا رایَ، موگے، ناد تانگ، ریی سیمسچان گُون گیُودتے میگون سادچیسّی وانگچھا سالّا زادس۔

⁹ لوگوی تھیتسے ثناپا چاگستے پھیا چیگ، قُربان تانگسای یوگا، خُدے حُکم کھانیانتے مسیح کا ایمان چوکھانّی گواہ تانگچیسپوے سادکھانّی سیمسنییدگون نگے تھونگ۔

¹⁰ تیگونّی مسیحا کُوچو تانگین زیرس، ” کھیود چان مسیح لے، ہلژخمہ تانگ ٹانگپو، نیرانگی ای دُنیائی می ایمان میدکھان میگونلا، شاگس مازادّا یانگ نگاجے ٹھاق ّی لان ماسالا نامتشوگپا ثونگستے ژوگشین لے“

¹¹ تینے تے تشانگمالا کوس کارپو سالّا زادس، یانگ کھونگ تسوگسلا کھونگونی ٹوپا فونو حضرت عیسیٰ سی جابستوگپا سادچیسچان گُونی ٹانگسکا ڈانڈا چھاچھا تشوگپا، کھونگونلا ژاپیگ آرام چو چیسلا مولس۔

¹² لوگوی تھیتسے ڈوگپابو چاگستے پھیا چیگ، سانگّول ٹاگپوجیگ یونگس۔ نییمابو راس ناگپو ژوگس مونڈیگ یانگ لزاوا نی ٹھاق ژوگس مارپو گیور۔

¹³ تینے لونگراگ ٹاگپوے سکولچیسپوے لچانگمے کانے سمین ماسمینکھانّی پھیگی کھازاس بودّا تسوگسلا نامکھے نانّگا یودکھانّی سکارماگون دُنیائیکا بُود۔

¹⁴ یانگ نامکھابو ثیلچیسچانّی شوقبُو ثیلّا تسوگسلا میدکھان سونگ۔ ری تشانگما تانگ تشولینگّون، یودسے ناسّے کانے تھینتے میدوگ۔

¹⁵ تینے دُنیائی گیالپوگون، گیالوگون، ماگمی سپونبو جیگسپوگون، چھوگپوگون، وانگچان گُون، تشیوگ تانگ رانگوانگچانّی میتشانگما، ڈاگپھوگس تانگ ریی پھولونگسّی ٹوا ایبدوگ۔

¹⁶ یانگ تے میگونّی ری تھونپوگون تانگ ڈاگّونلا، ”ژوگسٹھیسّیکا جُوگستے یودکھان یانگ لوگوی تھوگسثونے ایبچیسّی پھیا دیبستے نگاجا گُون کوبشیگّانگ۔

¹⁷ چیازیرنا کھونگی تھوگسثوے جیگسنانگچانّی جاگپو لیب تشارتے اینوگ، سُوا تیگون کھور تھوبین“ زیرس۔