یونگچیسچانّی دوس 5 - New Testament in Ladakhi Langage

ثیلکھانّی شوقبُو تانگ لوگو۔

¹ نگے تے ژوگسٹھیسّیکا جُوگستے یودکھانّی چھاگ یاسپے نانّگا، ثیلکھانّی شوقبُو گیابدون نییسکویکا ڈیسکھان تانگ تھیتسے ردون گیابستے یودکھانبو تھونگ۔

² یانگ نگے فرشتا جیگسپو جیگی سکاد چھینموے نانّگا مولین تشور، ”ای ثیلکھانّی شوقبُوئ تھیتسیگون چاگستے پھیچیسّی اوسپا سو این؟“

³ اِین نانگ نامکھا، یا دُنیائیکا دُوگکھان، یا سے یوگا یودکھان سوجیگّانگ تے شوقبُو بو پھے یا ستا مانیان۔

⁴ نگا ثانٹے نگوسپین چیازیرنا سوجیگّانگ، تے شوقبُو پھیچیس، یا سیلچیسّی اوسپا مابینگ۔

⁵ تینے اُسکیونگونی ٹونے چیگی نگا مولس، سیمسیر مازاد ”ہلتوس یہُودیہ قومِنگ نا اِنمی سِنگے، گیالپو داؤد ّی اولاد، گیالکھا ک تھوبکھان، کھونگ نی تھیتسے ردونکو چاگستے شوقبُو پھیچیسّی اوسپاچانبو جُوگستے اینوگ“

⁶ تینے نگا سادتے یودکھان تسوگسّی لوگوجیگ تھونگ، کھونگ تے سروک یودکھان ژیکو تانگ اُسکیونگ 24 تھانے سکورتے یودکھانّی جُوگسٹھیسّی لدُونلا جانگستے دوگ۔ تے لوگوبوا راچو ردون تانگ میگ ردون دوگ، کا بو خُدے دُنیا گانگپوے نانّگا کالا زادکھانّی رُوح ردونبو اینوگ۔

⁷ تے لوگوبو سکیودتے ژوگسٹھیسّیکا ژوگسکھانّی چھاگ یاسپانے، تے ثیلکھانّی شوقبُو بو لینس۔

⁸ کھونگی شوقبُو بو کھونگرانگی چھاگّا نامسّاچیگ، سروک یودکھان ژیکو تانگ اُسکیونگ 24 گُونی لوگوی لدُونلا سجدہ تانگس ۔ یانگ کھونگ تشانگمے لاگا تارچانّی رولمو یانگ سپوس سکانگسکھانّی سیرّی گورمو ریگ دوگ، تے سپوسگون خُدے میگونّی دُعا گُون اینوگ۔

⁹ تیگونّی لو سوماجیگ تانگس، نیرانگ، تے ثیلکھانّی شوقبُو بو لینتے تھیتسیگون چاگچیسّی اوسپا اینوگ۔ چیاجونا نیرانگ ڈونگستے، نیرانگی سکو ٹھاق رینلا شالّا زادتے، ریگس تشانگما، سکادریگس تشانگما تانگ، گیالکھاگ تشانگمے میرگیودگونّے خُدے پھیا میگون نیوا زادتے اینوگ۔

¹⁰ نیرانگی تے میگون نگاتانگونّی خُدا جابشی چوچیسّی پھیا، گیالثید تانگ اِمام گُون چوا زادس۔ یانگ تیگونّی دُنیائیکا وانگثولین۔

¹¹ تینے نگے ستاچیگ، فرشتا ستونگٹاگ ٹیٹاگ مانگپوے سکاد تشور، تیگونّی ژوگسٹھیس، سروک یودکھان ژیکو تانگ اُسکیونگ 24 گُونلا تھانے سکورتے دوگپین۔

¹² سکاد چھینموے نانّگا تیگونّی لو تانگدوگپین، ”تے سادکھانّی لوگوبوا وانگ، نور، شیسرابس، شید، سیوا، سپال تانگ ستودپا تھوبچیسّی اوسپا این۔“

¹³ تینے نگے نامکھا، دُنیا، سے یوگا یودکھان تانگ، گیاتشوے نانّگا یودکھانّی ثوگچان تشانگمے، ”ژوگسٹھیسّیکا جُوگسکھان تانگ لوگوا ستودپا، سیوا، سپال تانگ وانگ گُون تُوسگیُونّے گیُون تھوبشیگ“ زیرین لو تانگین تشور۔

¹⁴ تینے تے سروک یودکھان ژیکوے جْوس ”امین، “ یانگ تے اُسکیونگونی چھاگپھولاین کھونگونلا چولس۔