یونگچیسچانّی دوس 4 - New Testament in Ladakhi Langage

زیرّجیدچانّی خُدے ژالزیگس۔

¹ تیبوے ستینگنے نگے نامکھے نانّگا پھیستے یودکھانّی گھوجیگ تھونگ، یانگ سنگونلا تشورکھانّی تونگ تسوگسّی سکادپوے نگا، ”کیینلا یونگ، نگے کھیورانّگا ستینگنے جونگّوشیسچانگون ستانین“ مولّاراگ۔

² تینّامالّا خُدے رُوح نگیکا بابستے نگے نامکھے نانّگا ژوگسٹھیسّیکا جُوگستے یودکھانبو تھونگ۔

³ تیکا جُوگستے یودکھانبو ما لدانگشان۔ رینچان یو تانگ چھورو ژوگس دوگ، یانگ تے ژوگسٹھیسپو، ردوا رینچان لجانگکھو ژوگس لدانگشان زاچھوتھونگی سکورتے دوگ۔

⁴ تے ژوگسٹھیسپو یانگ ٹھیس 24 سکورتے دوگ، تیگونّیکا اُسکیونگ 24 جُوگستے یودکھانگونّی نامزا شان چان کارپو یانگ، کھونگونی گویکا سیرّی تاج نامستے تھونگ۔

⁵ یانگ تے ژوگسٹھیسپوے کانے سکاملاگی اوت تانگ ڈوگلدیرکھانّی سکادگون بینگدوگ۔ جُوگسٹھیسّی لدُونلا نگادچان بارین یودکھانّی مارمے ردونّانگ دوگ، کاگون خُدے رُوح ردونبو جُوگستے اینوگ۔

⁶ یانگ تیبوے لدُونلا شیل زیرکھانی گیاتشو ژوکشیگ دوگ، کا لام بو سالپو ٹھاسالسال تھونگدوگ۔ تے جوگسٹھیس پوا سروک یودکھان ژیی سکورتے دوگ، تیگونّی گیابدون نیسکو میگی گنگستے دوگ۔

⁷ تے سروک یودکھان دانگپوبو سینگّے ژوگس، نیسپابو بیتوژوگس، سومپابوے لدونگبو می ژوگس، یانگ جیپابو ورکھانّی لاگ ژوگس دوگ۔

⁸ سروک یودکھان ژیکوا شوگپا ڈوگڈوگ دوگ، تے شوگپاگونّی ستاگیوگ تشانگما میگی گنگستے دوگ۔ یانگ تشاننین میدپا چھادمیدلا تیگونّی جُوروگ، ”ہلژخمہ، ہلژخمہ، ہلژخمہ مسیح خُدے کھیود چان این۔ سنگونلا جُوگستے یودکھان، داگسانگ جُوگستے، یانگ سکیودچیسچان این۔“

⁹ نام سروک یودکھانگونّی ژوگسٹھیسّیکا جُوگسکھان کا بو تُوسگیُونّے گیُون جوگسانوگ کھونّگا ستودپا، سیوا تانگ، شُکر پھول زانے،

¹⁰ اُسکیونگ 24 بُوی ژوگسٹھیسّیکا جُوگستے یودکھان کا بو تُوسگیُونّے گیُون جوگسانوگ کھونگی لدُونلا چھاگپھولاین کھونّگا چولس۔ کھونگونی رانگرانگی تاج پو جُوگسٹھیسّی لدُونلا بورتے مولس،

¹¹ ”نگاجے مسیح تانگ نگاجے خُدے، نیرانگ نی سپال، سیوا تانگ وانگ تھوبچیسّی اوسپا، چیازیرنا نیرانگی چیتشانگما چوا زادتے نیرانگی تھوگّونگس نانگجین تیگون سونپو ناسشوگّا زادس۔“