یونگچیسچانّی دوس 21 - New Testament in Ladakhi Langage

یروشالیم سوما۔

¹ تینے نگا دزامبولینگ سوما تانگ دُنیا سوما گُون تھونگ۔ سنگونلا یودکھانّی دزامبولینگ تانگ دُنیا میدکھان سونگ، یانگ گیاتشوانگ ستورتے میدوگ۔

² ناما کھورانگی ماگپے پھیا زابستے لدیمو چوکھان تسوگسلا نگے گیالسا ہلژخمہ، یروشالیم سوما نامکھانے خُدے سکوندونّے بابسین تھونگ۔

³ یانگ نگا جُوگسٹھیسّی کانے سکاد چھینموجیگی مولین تشور، تا خُدے خیمہ گاہ میگونّی ٹوا دوگ، یانگ کھونگ میگون نیامپو جوگساین۔ کھونگون خُدے می تانگ خُدے کھونگونی خُدے گیورین، یانگ خُدے کھونگرانگ کھونگون نیامپو جوگساین۔

⁴ کھونگی کھونگونی میگنے چھیماگون پھیا زادِین۔ تیرو شیچیس، یا ردوگنگال، یا نگوچیس، یا زوگزیر مییونگ، چیازیرنا ای تشانگما مانے میدکھان سونگتے اینوگ۔

⁵ ژوگسٹھیسّیکا جُوگستے یودکھان خُدے مولّا زادس، ”ستوسشیگ نگے چیتشانگما سوما چواد۔“ یانگ کھونگی نگا مولس، ”یبو ڈیس چیازیرنا ای سپیرا تشانگما ایمان چان تانگ ٹانگپو اینوگ۔“

⁶ کھونگی نگا یانگ مولس، تا چیتشانگما ڈوب تشار۔ نگا نی الپھا تانگ اومیگا زیرکھانبو این، گوزوگنے پھارلا یودکھان یانگ تھاما تشوگپا لوسکھان۔ سکومستے یودکھانگونلا نگے میتشے تانگکھانّی چھومیگی چھوبو چھونلا تانگین۔

⁷ گیالکھا تھوبکھانگونلا ای برکت تشانگما تھوبین، یانگ نگا کھونگی خُدے تانگ کھونگون نگے ٹھوگو گیورین۔

⁸ اِین نانگ زون تانگکھان تشانگما، جیگسبود، ایمان میدکھان، تشیتو سچودپا، میساد، لوسڈیل نگانپا، جادُو چوکھان، تانگ سکونڈا چولکھان گُون توگچانّی ردوا میا ژیناین یودکھانّی تشوے نانّگا پھانگین، کابوا شیچیس نیسپا زیرّاد۔

⁹ یانگ تھامے ردوگنگال ردونّی گانگسکھان گورمو کھورتے یودکھان فرشتا ردونّی نانگنے چیگ یونگستے نگا مولّاراگ، ایرو یونگ؛ نگے کھیورانّگا لوگوی ناما چوکھانّی بوموبو ستانین۔

¹⁰ یانگ کھونگی نگا رُوح بوے نانّگا ما ری تھونپوجیگیکا کھیرّا زادتے نگا نامکھانے خُدے سکوندونّے بابسین یودکھان گیالسا ہلژخمہ یروشالیم بُو ستانّا زادس۔

¹¹ تے گیالسابو، خُدے شان ّی نانّگا ٹاردو رینچان تسوگسلا ٹھاچھیم چھیم چوروگ، کا بو شیل ژوگس سالپو یودکھان یاشاب زیرکھانّی ٹاردو ژوگس دوگ۔

¹² گیالسے کیانگرابو مانگستے تھونپو تانگ ثانٹے دوگ، کابوے گیاسگھو چوگنییسپو فرشتا چوگنییسّی ثونگستے دوگ۔ بنی اِسرائیل پے میریگس چوگنییسّی مینگّون، تے گیاسگھوگونّیکا ڈِیستے دوگ۔

¹³ شار چھوگسلا گیاسگھو سوم، چانگ چھوگسلا گیاسگھو سوم، لو چھوگسلا گیاسگھو سوم، یانگ نوب چھوگسلا گیاسگھو سوم دوگ۔

¹⁴ یانگ تے گیالسے کیانگرا، سیگسّمانگ چوگنییس دوگ، تیگونّیکا لوگوی رسُول چوگنییسّی مینگّون ڈِیستے دوگ۔

¹⁵ نگا سپیرا تانگکھانّی فرشتابوے کھورانگی چھاگّا، گیالسا، تیبوے گیاسگھو تانگ کیانگرے تشادگون تابچیسلا، سیرّی تشاد تابچیسّی بیرگاجیگ نامستے دوگ۔

¹⁶ گیالسابو ڈوبژی، کابوے ژانگ تانگ رینگ تانگ تھون گُون ڈانڈا دوگ۔ فرشتے گیالسابو تابّاچیگ، تیبوے ژانگ، رینگ تانگ تھون گُون ڈانڈا، کیلومیٹار نیس 400 بینگ۔

¹⁷ کھونگی کیانگرابو تابس، تیبو میٹار 70 جانگچان دوگپین، تیگون تابچیسلا فرشتے می کولکھانّی تشاد تابچیسپو کولّا زادّوگ۔

¹⁸ کیانگرابو ٹاردو رینچان یاشاب زیرکھان، یانگ گیالسابو سیر کیانگی سیگستے دوگ کا بو شیل ژوگس سالپو دوگ۔

¹⁹ گیالسے کیانگرے سیگسّمانگّون ٹاردو رینچان سنا 12 نیامپو سیگستے لدیمو چوا زادتے دوگ۔ سیگسّمانگسّی ٹاردوگون، ٹانگپو یاشاب، نیسپا نیلیم، سومپا ساپھٹیگ، جیپا پانیر،

²⁰ ثناپا گومید، ڈوگپا ماناگ، ردونپا پیدمانی، گیادپا فرِعونؔ ، گُوپا پوگراج، رچوپا لیہیسنیا، رچوگچیگپا دومارکان تانگ چوگنییسپا چانراکاند گُون اینوگ۔

²¹ یانگ گیاسگھو چوگنییسپو موتیگ چوگنییس، یانگ تے گیاسگھو ریرے موتیگ چھینمو چیگی زادتے دوگ۔ تے گیالسے لام تانگ ثانگ گُون شیل تسوگسّی سالپو سیرّی زادتے دوگ۔

²² نگاتی نانّگا بیت المقدِس چیگ مانے ماتھونگ، چیازیرنا مسیح خُدے کھیود چان تانگ لوگو تیگونّی بیت المقدِس اینوگ۔

²³ تے گیالسابوا نییما یا لزاوے اودّی گھوسدوم میدوگ، چیازیرنا خُدے شان ّی، تے گیالسابو ودچان زادتے لوگو نی تیبوے سکیونگتسے اینوگ۔

²⁴ یانگ گیالکھاگّی میگون تے اودّی نانّگا ڈولین ۔ دُنیائی گیالپوگونّی کھورانگی گیونورّی سپال گُون، تے گیالسے نانّگا کھیونگین۔

²⁵ تے گیالسے گیاسگھوگون مانے چوگّا مانوگ، چیازیرنا تیرو تشان مانے میدکیاگ۔

²⁶ گیالکھاگّی کھورانگونّی ستیر تانگ گیونورّی سپال گُون، تے گیالسے نانّگا کھیونگین۔

²⁷ نگانپا چیگّانگ تینانّگا چھا میچوگ، ماتشاد ٹھیلبے لاس چوکھان، یا زون تانگکھانگونّانگ۔ اِین نانگ لوگوی تھامیدپے میتشیے شوقبُوئ نانّگا مینگ ڈِیستے یودکھانّی میگون تینانّگا چھانیانین۔