یونگچیسچانّی دوس 20 - New Testament in Ladakhi Langage

لو ستونگ چیگ۔

¹ تینے نگا یانگ فرشتاجیگ نامکھانے بابسین تھونگ، کھونگی چھاگّا تھامانے میدکھانّی سادونگ تینگچانّی کولیگ تانگ لچاگتھاگ لچینتے چھینموجیگ نامستے دوگ۔

² ڈُوگ کابوا سنگونمے توسّی رُول، یا ردودگونّی گوبا، یا شیطان زیرّاد، کھونگی زومستے، لو ستونگچیگی پھیا کھوا لچاگتھاگ نیامپو تاگس۔

³ لو ستونگچیگپو تشارتشار تشوگپا شیطانی گیالکھاگ تشانگمے میگونلا گوبسکور میتانگچیسّی پھیا، تے فرشتے کھو تھامانے میدکھانّی سادونگ تینگچانّی نانّگا پھانگس، یانگ کھا کابستے تھیتسے گیابس۔ تے توسپو تشارتے ستینگنے کھو ثیبچیگی پھیا پھیلوگا بینگ چوگّا زادگوس۔

⁴ تینے نگا نامکھے نانّگا، ٹھیمسچادچیسّی وانگ سالّا زادکھان گُون جوگسٹھیسگونّیکا جُوگستے تھونگ۔ یانگ نگا گو چادکھان میگونّی سیمسنید گون تھونگ، چیازیرنا کھونگونی حضرت عیسیٰ سی گواہ تانگستے خُدے حُکم شادتے اینپین۔ کھونگونی جیگسنانگچانّی سیمسچان یا کھوے سکونڈا چھاگ ماپھولس، ماتشاد کھوے ستاگس پوانگ کھورانگونّی تھودپا یا لاگپیکا چو ماچُوگس۔ کھونگون سونتیا لانگس، یانگ مسیحا نیامپو لو ستونگ چیگ وانگثولس۔

⁵ کھونگون نی، شیتے لانگسکھان تانگپورانگ اینوگ (تے لو ستونگچیگپو تشانگستے مانے لوستے یودکھانّی شیکھانگون سونتیا میلانگس)

⁶ گومے سونتیا لانگسشیسّی نانّگا تھوسکھانّی میگون برکت چان تانگ ہلژخمہ اینوگ، چیازیرنا کھونگّونّیکا لان نیسپا شیچیسپوا وانگ مانے میدکیاگ، ماتشاد خُدے تانگ مسیح اِمام گُون گیورتے لو ستونگ چیگ تشوگپا مسیحا نیامپو وانگثولین۔

شیطان لا پھامکالس۔

⁷ لو ستونگ چیگ تشانّگادانگ شیطان تسونّے پھودین۔

⁸ کھو دُنیائی چھوگس تشانگمے گیالکھاگّی میگونلا گوبسکور تانّگالا گوگ تانگ ماگوگ زیرکھانّی ناسّیکا چھین۔ کھوے میتشانگما چھوگشیگّا ماگی پھیا دزومچوگاین، کا بو تشوے تھاما یودکھانّی پیما سی مینیانچیس ژوگس مانگپو یونگین۔

⁹ دُنیائی چھوگس تشانگمانے کھونگون بینگستے خُدے میگون تانگ کھونگ تھوگنییسّا زادکھانّی گیالسابوا سکورس، اِین نانگ نامکھانے میے تُھورلا بابستے، تے ماگمیگون ٹھیسّتور چوا زادس۔

¹⁰ تینے میتشانگمالا گوبسکور تانگکھانّی ردودگونّی گوبا، توگچانّی ردوا میے ژیناین یودکھانّی تشوے نانّگا پھانگس، کابوے نانّگا جیگسنانگچانّی سیمسچان تانگ پیغمبر زُوسما گُون پھانگستے اینپین۔ یانگ کھونگونلا تُوسگیُونّے گیُون تشاننین میدپا ردوگنگال تھونگین ۔

آخری جاگ۔

¹¹ تینے نگے جوگسٹھیس کارپو ٹاگپوجیگ تانگ تیکا جُژوگسکھانبو تھونگ۔ کھونگ سنگونّادانگ دُنیا تانگ نامکھا گُون کھونگی دونّے شورتے سونگ، یانگ تینیپھارلا سوجیگیانگ تیگون ماتھونگ۔

¹² تینے نگا شیکھان جیگسپو تانگ نیامشونگ میگون، خُدے جُوگسٹھیسّی لدُونلا لانگستے تھونگ۔ یانگ شوقبُو پھیکھانگونّی ٹوا تھامیدپے میتشیے شوقبُونانگا دوگ۔ کھونگونی چوسکھان شوقبُوگونّی نانّگا ڈِیازادتے یودکھان نانگجین، کھونگونلا ٹھیمسچاد سالدوگ۔

¹³ گیاتشوے تینانّگا شیکھانّی میگون پھودس، یانگ شیچیس تانگ شیکھانگونّی ناسّیانگ شیکھانّی میگون پھودس۔ تے شیکھان تشانگما کھورانگونّی لاس نانگجینلا ٹھیمسچاد سالّا زادس۔

¹⁴ تینے شیچیس تانگ شیکھانّی ناسّاگون میے بارین یودکھانّی تشوے نانّگا پھانگس، ای تشوبوا شیچیس نیسپا زیرّانوگ۔

¹⁵ تھامیدپے میتشیے شوقبُوئ نانّگا مینگ ڈِیستے میدکھان گُون، میے بارین یودکھانّی تشوے نانّگا پھانّگا زادس۔