یونگچیسچانّی دوس 19 - New Testament in Ladakhi Langageنامکھے نانّگا خُدائی ستودکھہ تانگس۔ 1 تے ستینگنے نگے نامکھے نانّگا میتشوگس چھینموے کُوچو ژوگس تشور کاگونّی زیرّاراگ، ”مسیحا ستودپا پھولشیگ، تھارپا، شان تانگ وانگ نگاتانگی خُدے اینوگ۔ 2 کھونگی ٹھیمسچادگون نی اوسپا تانگ ٹانگپو اینوگ۔ کھونگی تے زوگستسونگما جیگسپو گیالسا بابِیلیونلا ٹھیمسچاد زادس، کابوے لوسڈیل نگانپے لاسگونّی دُنیائی می گونلا دِیگپے لامیکا ڈولچوگس۔ خُدے تے بوموبوا، کھونگی جابستوگپاگون سادچیسّی تشابسلا لانسالتے اینوگ۔“ 3 کھونگونی یانگسکیار شید تانگ زیرس، ”مسیحا ستودپا پھولشیگ، تے گیالسے نانگنے دودپا تُوسگیُونّے گیُون بینگین۔“ 4 تینے تے مالِک 24 تانگ سروک یودکھان ژیبوے تخت پیکھہ جُوگسکھان خُدے سکوندونلا سجدہ تانگس یانگ مولس، ”امین، ہلَلُویاہ (خُدا لہ ستودکھہ سونگ شِک)۔“ 5 تینے گیالٹھیسّی کانے ای سونگسکادپو تشور، ”خُدے جابستوگپا، خُدا جیگسکھان، نیامشونگ تانگ جیگسپو تشانگمے نگاتانگی خُدا ستودپا پھولشیگ۔“ 6 تینے نگے میتشوگس چھینمو، چھو ٹاگپو گیوگکھان، ڈوگ ٹاگپو لدیرکھانّی سکاد تسوگسّی سکادچیگی مولین تشور، ”مسیحا ستودپا پھولشیگ، مسیح نگاتانگی خُدے کھیود چانی وانگثولّا زادّوگ۔ 7 یونگشیگ، نگاتانگونّی تھادپو تانگ سکیدپو چوین، یانگ نگاتانگونّی خُدا سپال تونگشیگ۔ چیاجونا لوگوی باگستونّی توسپو ران تشارتے کھونگی نامے کھونگرانگ کھونگی پھیا ڈالڈیگ زادتے اینوگ۔ 8 ناما کوسلاگ رینچان۔ کارپو تانگ ژانگماجیگ گونّالا سالس“ (کوسلاگ رینچانبو نی، خُدے میگونّی چھاگلاس ٹانگپوگون اینوگ)۔ 9 تینے فرشتے نگا مولّاراگ، ”یبو ڈیس، لوگوی باگستونّی ڈونلا بودکھانگون برکت چان این۔“ کھونگی یانگسکیار مولس، ”تیگون خُدے مولکھانّی کاگون اینوگ۔“ 10 تینے نگے کھونّگا چولچیسلا کھونگی ژابسّیکا گییلپین۔ اِین نانگ کھونگی مولس، ”نگا چول ماچول۔ حضرت عیسیٰ سی سکورلا گواہ تانگچیسّی نانّگا ستانپو دُوگکھان کھیرانگ تانگ کھیرانگی فونو گون ژوگس نگانگ خُدے جابستوگپاجیگ این۔ خُدے چیگپوا چول، چیازیرنا خُدے رُوح بوے حضرت عیسیٰ سی سکورلا گواہ جانماگونلا تانگچیسّی کھیود سالّانوگ۔“ ستا کارپویکا جونکھان۔ 11 تینے نگا نامکھا بیستے تھونگ، ستا کارپو یانگ تیبویکا جونکھانبوے جانلا ایمان چان تانگ ٹانگپو جُوروگ، چیازیرنا کھونگی، اوسپا نیامپو ٹھیمسچاد زادتے ٹانگپوے ماگپو سالّا زادّوگ۔ 12 کھونگی میگ نی، میے میلجاب ژوگس یانگ کھونگی اویکا تاج مانگپوجیگ دوگ۔ کھونگی کا ڈِیستے یودکھانّی مینگی دُونبو کھونگرانگ مانپا یانگ سوانگ شیسّا میدوگ۔ 13 کھونگی ٹھاقی نانّگا چُوگستے یودکھانّی نامزا گونتے دوگ، یانگ کھوے مینگ پو کلمةُاللّٰہ جُوروگ۔ 14 نامکھے ماگمی، ستا کارپوا ژونتے کوسلاگ کارپو ژانگما رینچان گونتے یودکھانگون کھونگی ستینگرانگنے یونگدوگ۔ 15 یانگ ایمان چان تانگ ٹانگپو ژوکھانبوے ژالنے رایَ نونپوجیگ بینگدوگ، کا بو کھونگی گیالکھاگگونلا پھامکالچیسّی پھیا کولین۔ یانگ ”کھونگی چھاتشانگ وانگچھا نیامپو وانگثولّا زادِین۔“ کھیود چان خُدے تھوگسثو چھینموے ناسّے نانّگا ستا کارپوا ژونکھانبوے تیگون رگون تسوگسلا تسیرّا زادِین۔ 16 کھونگی شالدیگ تانگ کوسیکا ای مینگبو ڈِیستے دوگ، ”گیالپوگونّی گیالپو تانگ تسوبوگونّی مسیح۔“ 17 تینے نگے فرشتاجیگ نییمیکا جانگستے تھونگ، کھونگی نام تھومپے نانّگا ورین یودکھانّی چاگونلا سکاد چھینمو نیامپو بودّا زادس، ”یونگ خُدے دونتانگ چھینموے پھیا ایکا دزومشیگ۔ 18 گیالپو، ماگمی سپونبو، ماگمی ٹاگپو، ستاگون تانگ تیگونلا ژونکھان، رانگوانگچان تانگ تشییوگ، نیامشونگ تانگ جیگسپو تشانگمے شاگون زالا یونگشیگ۔“ 19 تینے نگے تے جیگسنانگچانّی سیمسچان، دُنیائی گیالپوگون یانگ تیگونّی ماگمیگون، ستا کارپویکا ژونکھان تانگ کھونگی ماگمی گُونی گیابگالّا نولچیسلا دزومین تھونگ۔ 20 اِین نانگ تے جیگسنانگچانّی سیمسچان تانگ کھوے پیغمبر زوسمابو زومس، کابوے جیگسنانگچانّی سیمسچانبوے تشابسلا معجزہ ستاس مینڈا مینڈا ستانّادپین۔ تے ستاگس گُونی میگونلا گوبسکور تانگس پاسانگ، کھونگونی جیگسنانگچانّی سیمسچانی ستاگس پو چوچوگستے کھوے سکونڈابوا سجدہ تانگس یانگ چولس۔ جیگسنانگچانّی سیمسچان تانگ کھوے پیغمبر زُوسما نیسکو سونتیا توگچانّی ردوا میا جینین یودکھانّی تشوے نانّگا پھانگس۔ 21 یانگ ستا کارپویکا جونتے یودکھانبوے جالنے بینگین یودکھانّی رایبو نیامپو کھوے ماگمی تشانگما سادس۔ یانگ شا زاکھانّی چا تشانگمے کھونگونی روگُون تشیمس تشیمس زوس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation