یونگچیسچانّی دوس 18 - New Testament in Ladakhi Langage

بِیلیونّی گیالسا جیگسپو ٹھیسّتور زادس۔

¹ تے ستینگنے نگے یانگ فرشتاجیگ ما وانگ چھینمو نیامپو نامکھانے بابسین تھونگ، یانگ کھونگی لدانگسّی دُنیا گانگپو اودّی گانگ۔

² تے فرشتابوے کُوچو ثانٹے سالین مولس، ”مینگچان بابلی گیالسابو ٹھیسّتور سونگتے تیبو ردودگون دُوگسے ناسّا، گونگژوگسگونّی ڈانگسا یانگ تشیتو تانگ کھاملوگ چاگونّی تشانگس گیور۔

³ دُنیائی می تشانگما تے بوموے لوسڈیل نگانپے چھانگ تھونگستے راروستے دوگ۔ دُنیائی گیالپو تشانگمے، تے بومو نیامپو لوسڈیل نگانپا بورس۔ یانگ تے بوموے گیونور مانگپوے وانگبوے، دُنیائی تشونگپاگون چھوگپو گیور۔“

⁴ تینے نگا نامکھانے یانگ سونگسکادچیگی مولین تشور، ”نگے میگون، تے بوموے دِیگپے نانّگا ڈیس میڈیسشیسّی پھیا، تے گیالسے نانگنے بینگتے یونگشیگ، تے مانے کھیوجاگونّانگ، تے بومو نیامپو چھادپا پھوگین۔

⁵ چیازیرنا تے بوموے دِیگپاگون مانگپو سونگتے نامکھا تشوگپانگ لیبستے اینوگ۔ یانگ خُدے کھوے لاس نگانپاگون رجیدّا مازادس۔

⁶ کھوے جانماگونلا نگانپا چوکھان ژوگس، کھو نیامپو چوس۔ کھوے چوکھانّی نییلدابّو کھو نیامپو چوس۔ یانگ کھوے ناگسّی کورے تھونگچوگکھانبو نییلداب چوستے کھوا تھونگچوگ۔

⁷ تے بوموے کھورانّگا سپال تانگ گیونور تھوبکھان ڈانڈا کھوا باردو تانگ ردوگنگال تونگ، چیازیرنا تے بوموے کھورانگی سنینگی نانّگا پھوسو چوستے، ’نگا نی گیالمو ٹھیسّیکا دُوگستے این۔ نگا نی انے مارانگمو مان، یانگ نگا مانے تشیرکھا چو میگوس‘ زیردوگ۔

⁸ تینّابویپھیا جاگ چیگی نانّگا نگے تے گیالسے میگونلا زُومو، شیچیس، سیمستشیر تانگ موگے گُونی چھادپا پھاباین۔ میے تے گیالسابو ثاگ تانگین، چیازیرنا تے گیالسا، ٹھیمسچاد سالکھانّی مسیح خُدے نی ستوبسچان این۔“

بابِیلیونّی پھیا نگوس۔

⁹ تے بومو نیامپو لوسڈیل نگانپا تانگ کھوے گیونورگونّیکا تھادپو چوکھانّی دُنیائی گیالپوگونّی، بابِیلیونّے دودپا بینگین تھونگستے کھوے پھیا نیانگان چوستے نگواین۔

¹⁰ تیگونّی تے بوموبوے چھادپا ثانٹیبو تھونگتے جیگستے تھاگرینّگا دُوگستے نگواینجیگ زیرس، ”وا ٹاگپو گیالسا تسامشیگی جیگسنانگ جیگسنانگ، بابلی گیالسا جیگسپو، توس ما نیونگونجیگی نانّگا خُدے کھیورانّگا چھادپا سالس۔“

¹¹ دُنیائی تشونگپاگونّیانگ بابِیلیونّی پھیا نگواین، تشیرکھا چوین، چیازیرنا تانیپھارلا کھونگونی چالاگ نیوکھان سوجیگّانگ میلوس۔

¹² سپیرنا سیر، مول، ٹاردو رینچان، موتیگ، رینچان گیالپوگونّی کوس تانگ کوشین، ٹیجیم یودکھانّی شینگی ریگس تشانگما، لانگپوچھین راچونے چوکھانّی رینچانّی چالاگّون، رینچان شینگّون، راگان، لچاگس تانگ ردوا کامارو،

¹³ یانگ ژیمپو تشے ریگس سپیرنا دالچینی، ماسالا، سپوس، میر زیرکھانّی ٹیجیم سکوچیس، جان ٹیجیم چانّی سپوس، رگونچھانگ تانگ ذیتونی مارناگ، میدّا تانگ ٹو، بالانگ، لُوگ، ستا تانگ شینگستا گُون تانگ، تشییوگّون، ای تشانگما گیالسے نانّگا نیوبتشونگ تانگچیسّی پھیا کھیونّگادپین۔

¹⁴ یانگ تشونگپاگونّی تارُوانگ سکاد چھینمو نیامپو زیرس، ”وا بابِیلیون، کھیرانگی دودپا چوکھانّی شینگتوگّون میدکھان سونگتے اینوگ۔ کھیرانگی چھوگنگومس تانگ گیونور تشانگما ستور یانگ لوگستے مانے میتھوب۔“

¹⁵ تے گیالسے نانّگا تشونگ تانگستے چھوگپو گیورکھان تشونگپاگون، جیگسنانگچانّی تے گیالسے چھادپا جیگسپا تھاگرینّگا دُوگستے نگواین نیانگان چوین

¹⁶ یانگ تشیرکھا چوستے زیرین، ”وا ٹاگپو گیالسا تسامشیگی جیگسنانگ جیگسنانگ۔ کوسلاگ رینچان کارپو، سنگونپو تانگ مارپو، یانگ سیر، رینچان ٹے ریگس تانگ موتیگ تاگسکھانّی بوموے

¹⁷ گیونورگون ثیبچیگی نانّگا، میدکھان سونگ۔“ تے ٹُھوزینگّونّی اُسکیونگ، تینانّگا ڈولکھانّی میگون، ٹُھوزینگ ثولکھان تانگ تشو گیُودتے پینے چوکھانگون، ما تھاگرینگجیگّا لانگستے دوگین۔

¹⁸ گیالسابو میا ژینتے دودپا بینگین تھونگ زانے، کھونگونی نگواین زیرین، ”ای گیالسا تسوگسّی جیگسپو گیالساجیگ مانے میدڈو۔“

¹⁹ کھونگونی نگواین تشیرکھا ستانچیسلا رانگی گویکا تھالبا یوگستے زیرین، وا ٹاگپو گیالسا تسامشیگی جیگسنانگ جیگسنانگ۔ ٹُھوزینگی داگپو تشانگما تے گیالسے گیونور، تشو گیُودتے ینگو انگوا سکیالچیسپوے چھوگپو گیورتے اینپین۔ کھوے نورگون ثیبچیگی نانّگا، میدکھان زادس۔

²⁰ سکادچیگی مولس، ”نامکھے نانّگا یودکھانگون، تے گیالسا ٹھیسّتور چھاکھانبویکا تھادپو چوشیگ۔ خُدے میگون، رسُول گُون تانگ پیغمبر گون تھادپو چوشیگ۔ چیازیرنا کھیوجا گیابگال چوچیسپوے خُدے کھوا ٹھیمسچاد زادتے اینوگ۔“

²¹ تینے فرشتا جیگسپو جیگی رانتھاگی ردوا تسوگسشیگ کھورتے، تیبو گیاتشوے نانّگا پھانگس تانگس یانگ مولس، ”تینّا تسوگسّی شید نیامپو بابلی گیالسا جیگسپوبوانگ تُھورلا مانے میتھوبچیسّی پھیا پھانگین،

²² تارچانّی رولموی سکاد، لوتانگکھان، لینگبو پھوکھان، تونگ پھوکھان گُون تے گیالسے نانّگا یانگسکیار مانے میتشور۔ لاس سناتشوگس چوکھانّی میگون یانگسکیار مانے میتھوب۔ رانتھاگی سکادّانگ یانگسکیار مانے میتشور۔

²³ سکیونگتسے اوت پو یانگسکیار مانے میتُھونگ۔ تھادپوچانّی ماگپا تانگ باگمی سکادگونّانگ یانگسکیار میتشور۔ کھیرانگی تشونگپاگون دُنیا گانگپوے نانّگا تشانگمیسانگ مینگچان تانگ وانگچان گُون اینپین۔ یانگ کھیرانگی جادُو چوستے، دُنیائی می تشانگمالا گوبسکور تانگس۔

²⁴ کھیرانگی ثانگّونّی نانّگا خُدے پیغمبر تانگ کھونگی میگونّی ٹھاق گیوگدوگ۔ اونا، لدینبا، کھیرانگ نی دُنیا گانگپونے میگون سادچیسپوے نونگسچان اینوگ۔“