یونگچیسچانّی دوس 16 - New Testament in Ladakhi Langageخُدا تھوگسثوے گورمو ردون۔ 1 تینے نگے بیت المقدِس سی نانگنے سکاد چھینموجیگی فرشتا ردونکوا زیرین تشور، ”سونگتے خُدے تھوگسثو سکانگسکھانّی گورمو ردونکا دُنیائیکا پھوستونگ۔“ 2 تینے فرشتا دانگپوبو سونگتے کھورانگی گورموے نانّگا یودکھانبو دُنیائیکا پھوستانگس۔ تے جیگسنانگچانّی سیمسچانی ستاگس یودکھان یانگ تیبوے سکونڈا چولکھان گُونی زوگسپویکا جیگسشیس تانگ زوگزیر ثانٹیچانّی چھورگانگ بینگ۔ 3 تینے فرشتا نیسپے گورموے نانّگا یودکھانبو گیاتشویکا لوگسپا، گیاتشو گانگپو روے ٹھاق ژوگس ناگپو گیور، یانگ گیاتشوے نانّگا یودکھانّی سروک یودکھان تشانگما شی۔ 4 تینے فرشتا سومپے گورموے نانّگا یودکھانبو لژانگسپو تانگ چھومیگ گونّیکا لوگسپا، تے چھوگونّانگ ٹھاقّا گیور۔ 5 یانگ نگے چھوگونّیکا وانگچھا یودکھانّی فرشتابوے زیرین تشور، نیرانگی ٹھیمسچادگون ٹانگپو این۔ نیرانگ جُوگستے یود، یانگ جُوگستے یودپین، یانگ نیرانگ ہلژخمہ جُوگستے این، چیاجونا نیرانگی اوسپے ٹھیمسچادگون زادتے اینوگ۔ 6 کھونگونی خُدے می تانگ پیغمبر گُونی ٹھاق پھوس پاسانگ، نیرانگی کھونگونلا ٹھاق تھونّگا سالس، کا بو اوسپا این۔ 7 تینے نگے قُربان تانگسا کانے سکادچیگی، ”کیے مسیح خُدے کھیود چان لدینبا نیرانگی ٹھیمسچادگون اوسپا تانگ ٹانگپو اینوگ“ مولین تشور۔ 8 تینے فرشتا جیپے گورموے نانّگا یودکھانبو نییمیکا پھوس پاسانگ، تیبوے تشادپوے میتشانگما میا تشیگچوگس۔ 9 اِین نانگ تے تشادّی تشیگکھان تشانگمے، کھورانگی دِیگپاگونّیکا گیودپا چوستے ای ردوگنگال تشانگمیکا وانگچھا یودکھانّی خُدا سیوا ماچوا، کھونگی تشانبوا رنگان تابدوگ۔ 10 تینے فرشتا ثناپے گورموے نانّگا یودکھانبو جیگسنانگچانّی سیمسچانی ٹھیسّیکا لوگستانگسپا کھوے گیالثید گانگپو مونڈیگی کابس تانگس۔ کھوے کھانیانکھانگونّی زوگزیر چھینمو یونگچیسپوے، رانگی لچیگونلا سوگا تابس۔ 11 یانگ کھونگونلا ردوگنگال چھینمو تانگ چھورگانگ یودچیسپوے، کھونگونی نامکھا ژوگسکھانّی خُدا رنگان تابس، اِین نانگ کھونگرانگونّی لاس نگانپا گونّیکا گیودپا چوستے خُدے چھوگسلا سیم ماگیورس۔ 12 تینے فرشتا ٹُوگپے گورموے نانّگا یودکھانبو فُرات دی لژانگسپو چھینموے نانّگا پھوس پاسانگ، لژانگسپو بو سکامس، تیبوے جاستے شار چھوگسّی گیالپوگونلا کھورانگونّی ماگمیگون گھاگسکیل میدپا، لو چھوگسلا کھیونگنیان۔ 13 یانگ نگے ڈُوگ، جیگسنانگچانّی سیمسچان تانگ زوسمے پیغمبر سومکوے کھانے بالپا تسوگسّی سیمسنید تشیتو بینّگا تھونگ۔ 14 تیگون معجزہ ستاگس گُون ستانچیسلا کھیود یودکھانّی ردودگونّی رُوح گون اینوگ، یانگ تیگون دُنیائیکا گیالپو تشانگما یودسا سونگتے مسیح خُدے گیابگالّا خُدے کھیود چانی ٹاگپو ٹھیمسچادّی جاگّا، ماگ تانگچیسلا دزومچوگس۔ 15-16 کھونگونی گیالپو تشانگما عِبرانی سکادّی نانّگا ارماگیدون زیرکھانّی ناسّابویکا دزومچوگس۔ حضرت عیسیٰ مسیح مولس ستوسشیگ، نگا ہونمیدلا کونما تسوگسلا یونگ زانے، لجیرنیالّا ٹھیلبا میچھاچیسّی پھیا، شانگ چوستے کوسلاگ ڈالڈیگ بورکھانگون برکت چان این۔ 17 یانگ فرشتا ردونپے گورموے نانّگا یودکھانبو لونگسپوے نانّگا پھوسپا، بیت المقدِس سی نانگنے خُدے جُوگسٹھیسّی کانے سکاد چھینموجیگ جُونگستے مولس، ”تا ڈوب تشار۔“ 18 تینے سکاملاگی ود، ڈوگلدیرکھانّی سکاد یانگ تیزوگ سانگّول جیگسپاجیگ دُنیائیکا یونگس، کا بو ای دُنیائیکا می زادپانے پھارلا داگسا تشوگپا مانے مایونگسکھانجیگ۔ 19 مینگچانّیبابلی گیالسابو پوسومّا بُود، یانگ گیالکھاگ تشانگمے گیالساگونّانگ ردیبستے سونگ۔ خُدے بابل پاگونّی دِیگپاگون رجید مارجید پاسانگ، کھونگی کھونگونلا کھونگی ما تھوگسثو ثانٹے چھانگی گنگستے یودکھانّی دونسکیوگپو تھونگ چوگّا زادس۔ 20 یانگ سانگّولّی جاستے تشولینگ (یانگنا چھوی سکورتے یودکھانّی ساچھا) تشانگما تشوے نانّگا نوبتے سونگ، یانگ ریگون ستورتے مانے ماتھونگ۔ 21 ہالام کییلو نییشو لچینتے یودکھانّی جیگسنانگچانّی سیرارو نامکھانے میگونّیکا بابس۔ تے سیرّاروی جیگسنانگچانّی ردوگنگال تھونگچیسپوے کھونگونی خُدا رنگان تابس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation