یونگچیسچانّی دوس 15 - New Testament in Ladakhi Langage

حضرت مُوسیٰؔ تانگ لوگوی سالکھانّی لو۔

¹ تینے نگا نامکھے نانّگا یانگ معجزہ ستاگس شیگ تھونگ، فرشتا ردونّی یونگچیسچانّی ردوگنگال ردون کھورتے دوگ، تینّاگون خُدے ستینگجوگی چھادپابو اینوگ۔

² نگا میے نیامپو ڈیسکھانّی شیلّی گیاتشو تسوگسشیگ تھونگ۔ یانگ تے تھاما لانگستے دوگکھانگونّی، جیگسنانگچانّی سیمسچانی کانے گیالکھا تھوبکھانگون اینوگ، چیازیرنا کھونگونی تے سیمسچان، یا تیبوے سکونڈا چھاگ ماپھولس یا تیبوے انگی ستاگس پو کھونگرانگّونّیکا چو ماچوگس۔ کھونگونی لاگپے نانّگا خُدے سالکھانّی تار مانگپوچانّی رولمو کھورتے دوگ۔

³ یانگ کھونگونی خُدے جابستوگپا حضرت مُوسیٰؔ تانگ لوگوی سالکھانّی لو تانگدوگ، ”کیے مسیح خُدے کھیود چان نیرانگی چھاگلاس گُون ٹاگپو تانگ ہالاسشیس اینوگ۔ گیالکھاگ تشانگمے گیالپو۔ نیرانگی زادکھان گُون اوسپا تانگ لدینبا اینوگ۔

⁴ کیے مسیح، نیرانّگا سو میجیگس؟ نیرانگی ژانلا سوی ستودپا میپھول؟ نیرانگ چیگپو ہلژخمہ جُوگستے این۔ گیالکھاگ تشانگما یونگستے نیرانگی سکوندونلا چولین، چیازیرنا نیرانگی رانگی چھاگلاس ٹانگپوگون سنگون چوگّا زادتے اینوگ۔“

فرشتا ردون تانگ ردوگنگال ردون۔

⁵ تے ستینگنے نگے نامکھے نانّگا بیت المقدِس یانگنا، خُدے سپانگپوے کوربو پھیستے تھونگ۔

⁶ ردوگنگال یونگچوگچیسّی وانگچھا سالتے یودکھان فرشتا ردونکو بیت المقدِس نے بینگتے یونگس۔ تے فرشتاگونّی لاگمو کوس کارپو گونتے ڈانگیکا سیرّی راس ثیلتے دوگ۔

⁷ تینے تے سروک یودکھان ژیکوے ٹونے چیگی، تے فرشتا ردونکوا سیرّی گورمو ریرے پھولس، کابوے نانّگا تُوسگیُونّے گیُون جوگسکھانّی خُدے تھوگسثو گیانگستے دوگ۔

⁸ بیت المقدِس بو خُدے ہالاسشیسچانّی شان تانگ کھیود پےتودپے گنگستے دوگ۔ ہلژخمہ بیت المقدِس سی نانّگا سوجیگّانگ جوگس مینیان نامتشوگپا، فرشتا ردونکوے ردوگنگال ردونکو کھیونگچیسّی لاسپو ڈانڈا ڈوب میڈوب۔