یونگچیسچانّی دوس 14 - New Testament in Ladakhi Langageمی بُوم چیک نانگ لتونگ جِیبچوجابجی تانگ لوگو۔ 1 تینے نگے ستاچیگ صیُّون زیرکھانّی ریکا تینّا لوگوبو جانگستے تھونگ، یانگ تھودپیکا لوگو تانگ کھونگی یابّی تشان ڈِیازادکھانّی می بُوم چیک نانگ لتونگ جِیبچوجابجی کھونگ نیامپو دوگ۔ 2 یانگ نگا نامکھانے سکاد تاگپوجیگ تشور کا بو شیدچان گیوگکھانّی چھو سکاد ٹاگپو یا نگادچان ڈوگلدیرکھان ژوگس راگپین۔ تے سکادپو نی می مانگپوجیگی تار مانگپوچانّی رولمو رولکھان ژوگس راگپین۔ 3 کھونگونی ژوگسٹھیس، سروک یودکھان ژیکو تانگ اُسکیونگونی لدُونلا لو سوماجیگ تانگس۔ تے لوبو خُدے سکیوبّا زادکھاب بُوم چیک نانگ لتونگ جِیبچوجابجی میگون ماستوگس، سوانگ چانگ چھوگّا میدوگ۔ 4 کھونگون ہلژخمہ، بومو نیامپو لوسڈیل مانے میدکھان تانگ لوگو کارُو چھانانگ کھونگی ستینگرانگنے چھادپین۔ یانگ کھونگون میگونّی ٹونے نیوا زادتے ستونتھوگی ٹو گومابو تسوگسلا خُدے تانگ لوگوا پھولّا زادس۔ 5 کھونگونی کھانے زون مانے مابینگ، یانگ کھونگون سکیونمیدکھان اینوگ۔ فرشتا سُوم۔ 6 تینے نگے نامی سکیلّا اُورین یودکھانّی جان فرشتاجیگ تھونگ۔ کھوے تھا مانے میدکھانّی گاموےناتسُولبو، دُنیائی می تشانگما شادّوگ کا بو گیالکھاگ، میریگس، سکادریگس تانگ میگون اینوگ۔ 7 یانگ تے فرشتابوے سکاد چھینموے نانّگا مولس، ”تا خُدے ٹھیمسچادّی توس لیبسپا، کھونّگا جیگسشیگ یانگ سیوا چوشیگ۔ نامکھا، ساکیاد، گیاتشو تانگ چھوی چھومیگ گُون زادکھانّی خُدا چولشیگ۔“ 8 فرشتا تانگپوے ستینگرانگنے جانیانگ فرشتاجیگ سکیودتے مولس، ”بابلی گیالسا مینگچان نگانپابو شیگستے مید، کابوے دُنیائی گیالکھاگ تشانگمے میگونلا، کھوے لوسڈیلّی دودپا نگانپے چھانگبو تھونگچوگس۔“ 9 کھونگونی ستینگرانگنے فرشتا سومپابو سکیودتے ما سکاد چھینمو نیامپو مولس، سوجیگی تے جیگسنانگچانّی سیمسچان تانگ کھوے سکونڈا چولنا، یا کھوے ستاگس پو کھورانگونّی تھودپا یا لاگپیکا چوچوگنا، 10 کھونگونلا خُدے تھوگسثوے رگونچھانگبو تھونگّوساین، کا بو کھونگی تھوگسثوے دونسکیوگی نانّگا چانگ ماثیکھان کاربا لوگّا زادتے این۔ یانگ کھونگونلا خُدے ہلژخمہ فرشتا تانگ لوگوی سکوندونلا میے تانگ توگچانّی ردوا ژیناین یودکھانگونّی نانّگا ردوگنگال تھونگین ۔ 11 کھونگونی ناگسّی دودپابو تُوسگیُونّے گیُون بینگین دوگین۔ آرام مانے میدپا، کھونگونلا تشاننین گانگپو باردو تھونگین ، چیازیرنا کھونگونی جیگسنانگچانّی سیمسچان تانگ تیبوے سکونڈا چولس، یانگ کھوے مینگی ستاگس پو کھورانگّونّیکا چوچوگس۔ 12 تینّابویپھیا خُدے میگونّی ناگسباردوگون زودپا نیامپو کھورتے خُدے حُکم گون نیانچیس تانگ ایمان بو حضرت عیسیٰ سی نانّگا ستانپو بورگوس۔ 13 تینے نگے نامکھانے سکادچیگی زیرین تشور، ”یبو ڈیس، تانیپھارلا مسیح کا ایمان چوچیسپوے شیگوسکھانگون برکت چان این۔“ ہلژخمہ رُوح بوے مولس، ”اونا لدینبا، کھونگونلا برکت تانتان تھوبین۔ کھونگونلا لاس کاگسپوگونّے آرام تھوبین چیازیرنا کھورانگونّی لاس زانگپوے ڈاسبو نامکھے نانّگا کھونگ نیامپو لیباین۔“ دُنیائی ستونتھوگ۔ 14 تینے نگے ثین کارپوجیگ تھونگ، یانگ تے ثینّیکا جُوگستے یودکھانبو اِبنِ آدم ژوگس دوگ۔ کھونگی اویکا سیرّی تاج تانگ چھاگّا زورا نونپوجیگ نامستے دوگ۔ 15 تینے جانیانگ فرشتاجیگی، نامکھے بیت المقدِس سی نانگنے بینگتے سکاد چھینمو نیامپو ثینّیکا ژوگسکھانبوا مولس، ”نیییرانگی زورا نیامپو رنگا زاد، چیازیرنا توسپو رانتے دُنیائیکا ستونتھوگپو تشوستے یودتے اینوگ۔“ 16 ثینّیکا ژوگسکھانّی کھونگرانگی زورا دُنیائیکا گیابسپا دُنیا گانگپو رنگاستانگس۔ 17 تے ستینگنے یانگ فرشتاجیگ نامکھے بیت المقدِس سی نانگنے بینگتے سکیودس، کھونگی لاگّانگ زورا نونپوجیگ دوگ۔ 18 تینے میکا وانگ یودکھان یانگ فرشتاجیگ قُربان تانگسا دونّے سکیودتے زورا نونپو نامستے یودکھانّی فرشتا مولس، ”نیرانّگا یودکھانّی زورا نونپوبو کولتے دُنیائی رگونّی لچانگماگونّی کانے رگونگون لدوس، چیازیرنا تیگون تشوستے دوگ۔“ 19 یانگ تے فرشتابوے کھورانگی زورابو دُنیائیکا ثولتے رگونگون لدوستے، کھوا پھینّگالا خُدے تھوگسثوے رگون تسیرچیسّی ناسّا چھینموے نانّگا پھانگس۔ 20 تے رگون تسیرسے ناسّابو گیالسانے پھیلوگا یودپین۔ کھونگونی ٹھاق پو، رگون تسیرسے ناسّانے ہالام کیلومیٹار 300 تشوگپا گیوگس، یانگ ٹھاق ّی تھونپو ستے کھا تشوگپا لیب۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation