یونگچیسچانّی دوس 12 - New Testament in Ladakhi Langage

بومو تانگ ڈوگ۔

¹ یانگ نامکھے نانّگا معجزہ ستاس چھینموجیگ چونگ، تینانّگا نییما کوس تسوگسلا گونتے، کانگپے یوگا لزاوا تانگ گویکا سکارما چوگنیسّی تاج گونکھانّی بوموجیگ تھونگ۔

² تے بوموبوا ٹھوگو جورچیس دوگ، یانگ کھوا ٹھوگو جورچیسّی زُومو تانگ ردوگنگال یودچیسپوے، کھوے ثانٹے کُوچو تانگدوگ۔

³ تینے نگے نامکھے نانّگا یانگ ستاسشیگی نانّگا، گو ردون تانگ ریچو رچُو یانگ گو یکا تاج ردون یودکھانّی ڈُوگ چھینمو مارپوجیگ تھونگ۔

⁴ کھوے رنگامابو نامکھے نانّگا سکارما کھاگ سومی نانگنے کھاگ چیگّا گیابستے دُنیائیکا پھانگس، یانگ ڈُوگ گی ٹھوگوبو زاچیسّی پھیا تے بوموے ٹھوگو جورچیسچانّی لدُونلا سونگتے دُوگس۔

⁵ تے بوموبوا بُوژا جیگ جور، کھونگی گیالکھاگ تشانگمیکا وانگچھا تشانگما نیامپو وانگثولّا زادِین۔ ڈوگّا زا ماچوگّا ہونمیدلا تے بوموے ٹھوگوبو کھونگرانگی ٹھیسّیکا خُدے سکوندونلا کھیرّا زادس۔

⁶ یانگ تے بوموبو ریستونگی نانّگا شورتے سونگ، کابوے نانّگا مسیح خُدے ناسّاجیگ ڈالڈیگ زادتے یودپین، کارُو جاگ 1,260 تشوگپا کھوا ستاستوگ چوا زادِین۔

⁷ یانگ نامکھے نانّگا ماگ تانگچیس گوزوگس۔ فرشتا میکائیل تانگ کھونگی فرشتاگونّی، تے ڈُوگ تانگ کھوے ٹوپا فرشتا گونلا نولس، یانگ ڈوگ تانگ کھوے ٹوپاگونّی لوگستے نولس۔

⁸ اِین نانگ ماگی نانّگا ڈوگ پھامس پاسانگ، کھو تانگ کھوے ٹوپاگون نامکھے نانگنے پھینّگا زادس۔

⁹ تے جیگسنانگچانّی ڈُوگ، ردودگونّی گوبا شیطان زیرکھانبو نی، سنگونمے توسّی رولبو اینوگ۔ کھوے دُنیا گانگپوے میگونلا گوبسکور تانگستے اینپین۔ کھو تانگ کھوے ٹوپاگون دُنیائیکا تُھورلا پھانّگا زادس۔

¹⁰ تینے یانگ نگا نامکھانے سکاد چھینموجیگ تشور، ”تا نگاتانگی خُدے تھارپا، وانگ تانگ گیالثید تانگ کھونگی مسیح وانگثولبو لیب تشارتے اینوگ۔ تا خُدے سکوندونلا نگاتانگی فونو گُونلا تشان نین میدپا سکیون کالکھانّی شیطان بو، تُھورلا دُنیائیکا پھانّگا زادتے این۔

¹¹ یانگ نگاتانگونّی فونو گُونی لوگوی سکو ٹھاق تانگ گاموےناتسُولّی گواہ تانگچیسپوے، شیطان لا پھامکالس۔ تے گواہ تانگچیسلا کھونگون سروک تانگچیس تانگ شیچیسلانگ جیگس ماجیگس۔

¹² تیبویپھیا نامکھا تانگ تینانّگا ژوگسکھانگونّی سکیدپو چوشیگ۔ اِین نانگ ساکیاد تانگ گیاتشویکا دوگکھانگونلا تسامشیگی جیگسنانگ مانوگ، چیازیرنا ردودگونّی گوبا کھیوجاگون یودسا تُھورلا یونگدوگ۔ کھو ثوے گنگستے دوگ چیازیرنا کھوے لاگا دُنیائی می گونلا گوبسکورچیسّی توس، نیونگونجیگ مانے میدزیرکھانبو کھوا گیوس اینّوگ“

¹³ ڈُوگپوا کھورانگ تُھورلا دُنیائیکا پھانگستے اینکھانبو گیوسچھاچیگ، کھوے، بُوژا لتامسکھانّی بوموبوا تیدتے کھیرس۔

¹⁴ اِین نانگ تے بوموبوا ریستونگی نانّگا ڈالڈیگ چوا زادکھانّی ناسّابویکا بورتے چھانیانچیسلا لاگ چھینموے شوگپا ژوگس نیس سالتے دوگ، کارُو خُدے لو سوم نانگ پھید تشوگپا، تے بوموبوا رُولی کانے سکیوبّا زادتے ستاستوگ زادِین۔

¹⁵ تینے تے رُولی کھوے کھانے بینگکھانّی چھولوگ تسوگسّی چھوی نانّگا تے بوموبو نوبچوگستے سادچیس چوس۔

¹⁶ اِین نانگ تے بوموا روگس چوچیسلا ساکیادپو پھیستے ڈُوگ گی کھانے بینگکھانّی لژانگسپو ے چھوبو سمید تانگس۔

¹⁷ تینے ڈُوگپوا تے بوموبویکا ماثانٹے ثو یونگس، یانگ بوموے لُوستے یودکھانّی اولاد، خُدے حُکم کھانیانتے حضرت عیسیٰ سی لابجا گُونلا ستانپو تھامستے دوگکھانگونّی گیابگالّا ماگ تانگچیس تھاگچادس۔

¹⁸ تینے ڈوگ گیاتشوے تھامے پیمیکا لانگستے دُوگس۔