یونگچیسچانّی دوس 11 - New Testament in Ladakhi Langage

گواہ سالکھان نیس۔

¹ تینے تشاد تابّا کولکھانّی بیرگاجیگ سالتے نگا مولّاراگ، ”سونگتے خُدے بیت المقدِس تانگ قُربان تانگسا تشادپو لین، یانگ تیرو چولین یودکھان تشانگمے ٹانگسکا گون لین۔

² اِین نانگ بیت المقدِس سی پھیلوگا یودکھانّی ناسّابو تاب ماتاب، چیازیرنا نگے تیبو تے گیالکھاگگونلا ستادتے این، کابوے یروشالیمّی ہلژخمہ گیالسابو لزاوا 42 تشوگپا وانگی یوگا نانتے بورین۔

³ نگے نگارانگی گواہ نیسلا وانگچھا تانگین، کھونگونی ردوگّوس گونتے جاگ 1,260 لونگستان شادین۔“

⁴ ای گواہ نیسکو نی، دُنیائی وانگثولپا مسیح لدُونلا یودکھانّی ذیتونی لچانگما نیس تانگ اُود ستاگس نیسکو اینوگ۔

⁵ کالتیس سوجیگی تے نییسکوا نودپا تانگچیس چونا، تے نیسکوے کھانے میے بینگستے ڈاو گون میدکھان چوین، یانگ تے نییسکوا نودپا چوچیسّی سونڈوس چوکھانگون تینّا تشولّا شِین۔

⁶ کھونگونی لونگستان شادّی توس گانگپو چھارپا میبابسشیسّی پھیا نامکھا کابچیسّی وانگچھا کھونگونلا سالّا زادس۔ یانگ چھو تشانگما ٹھاقّا گیورچوگچیس تانگ نام کھونگون تھادنانگ، دُنیائی ایمان میدکھانّی میگونلا ردوگنگالّی ریگس تشانگما یونگچوگچیسّی وانگچھا سالس۔

⁷ کھونگ نیسکوے خُدے حُکم شادچیسگون ڈانڈا ڈوب تشارّاچیگ، جیگسنانگچانّی سیمسچانبو مانگستیانگ کونڈو یودکھانّی سادونگنے بینگستے، کھونگ نییسکویکا حملہ چوین، یانگ پھامکالتے ساداین۔

⁸ کھونگ نیسکوے روگون ای گیالسا مینگچانبوے ثانگّونّی نانّگا لوسین، کابوا خُدے سدُوؔم تانگ مصر ناسّا ژوگس تھیا زادس۔ تے ناسّے نانّگا حضرت عیسیٰ مسیح کیانگشینگیکا کیانگستے اینپین۔

⁹ یانگ جاگ سوم نانگ پھید تشوگپا میریگس، سکادریگس تانگ گیالکھاگ تشانگمے میگونّی، کھونگ نیسکوے روگونلا ستاستے دوگین، یانگ تیگونّی سوجیگّانگ تے روگون قبرستانی نانّگا سوب میچوگ۔

¹⁰ دُنیائی می ایمان میدکھانگونّی، کھونگ نیسکو شیکھانبویکا تھادپو چوین، چیگ تانگ چیگّا سکییسگون تانگستے گاستون چوین، چیازیرنا تے پیغمبر نیسکوے دُنیائی می گونلا ناگس ستانتے اینپین۔

¹¹ اِین نانگ جاگ سومنانگپھیدّی ستینگنے خُدے سالکھانّی ثوگی اوگسپو کھونگونی نانّگا جُوگستے کھونگ نیسکو کواگ لانگس، یانگ کھونگ نیسکو تھونگکھان تشانگما ماثانٹے جیگس۔

¹² تینے نامکھانے سکاد چھینموجیگی کھونگ نییسکوا مولس، ”یرو کیینلا یونگ۔“ کھونگ نیسکو نامکھے نانّگا ثینّیکا ژونتے سکیودس، نام کھونگ نیسکوے ڈاو گون ستین یودپین۔

¹³ تینّامالّا سانگّول ثانٹیجیگ یونگستے گیالسے کھاگ رچوی نانگنے کھاگچیگ زامشیگ ٹھیسّتور سونگ۔ می ستونگردون شی۔ سونتیا لوسکھانگون ماثانٹے جیگس، یانگ نامکھے نانّگا جُوگسکھان خُدے نی کھیود چان اینکھانبو کھا ستورتے زیرس۔

¹⁴ جیگسپا نیسپابو بودتشار، اِین نانگ ستوسّانگ، جیگسپا سومپابو گیوگسپا لیبچیسدوگ۔

تونگ ردونپابو پھوس۔

¹⁵ فرشتا ردونپے تونگ پھواچیگ، نگا نامکھانے سکاد چھینموجیگی مولّاراگ، ”دُنیائی گیالثیدپو تا مسیح خُدے تانگ کھونگی مسیح گیالثید گیورتے اینوگ، یانگ کھونگی تُوسگیُونّے گیُون وانگثولّا زادِین۔“

¹⁶ خُدے سکوندونلا کھورانگونّی ژوگسٹھیسّیکا جُوگستے یودکھانّی اُسکیونگ 24 بوے خُدا چھاگپھولاین کھونّگا چولس۔

¹⁷ کھونگونی مولس، ”کیے مسیح خُدے کھیود چان، نیرانگ داگسا جُوگسکھان تانگ سنگونلا جُوگستے یودکھان اینوگ، نگاجا گُونی نیرانّگا شُکر جُواد، چیازیرنا نیرانگی رانگی وانگ ٹاگپو کولتے نیرانگی وانگثولبو گوزوگّا زادتے اینوگ۔

¹⁸ ایمان میدکھانّی گیالکھاگگون ثوے گنگستے اینوگ۔ اِین نانگ تا نیرانگی تھوگسثوے توسپو لیبتے اینوگ، یانگ شیکھانگونلا شاگس چادچیس، نیرانگی جابستوگپاگون، پیغمبر گون، ہلژخمہ میگون، اُتھوکس تانگ جیگسپو نیرانّگا جیگسکھان تشانگمالا، شزدے سالچیس یانگ دُنیا ٹھیسّتور چوکھانگون ٹھیسّتور زادچیسّی توسپو لیبتے اینوگ۔“

¹⁹ یانگ نگے نامکھے نانّگا خُدے بیت المقدِس پھیستے یودکھانّی نانّگا کھونگی وعدہ ّی گھامبو جال۔ یانگ سکاملاگی اود، جیگسشیسچانّی سکاد، چھادمیدلا ڈوگٹاگپولدیر، سانگّول یونگس، یانگ جیگسنانگچانّی سیرارو چھینمو بابس۔